سمکۆ عەبدولعەزیزی
مرۆڤ جانداره‌كێ ئالوزه و هەیا نها تو زانایەک نەکاریە بگهە راستیا شیرۆڤه‌كرنا مرۆڤى ب ئاوایەکی ره‌ها، ب ئاوایەکی گەلەمپەری زانا گهانە وێ ئه‌نجامێ كو مرۆڤ ژ سێ به‌شێن سه‌ره‌كە پێك تێ (سه‌ر، لا‌ش، جان ) ، ده‌ما به‌شه‌ك ژ ڤان به‌شان نەمینە، ل وێ ده‌مێ مرۆڤ ب هه‌بوونا خوە نامینە.
هه‌ر به‌شه‌ك ژ ڤان بەشان، چه‌ندین وەزیفەیان ئه‌نجام دده و پێكڤه کارکرنا ڤان وەزیفەیان دبه سەدەما هه‌بون و پێناسا مرۆڤ، ئه‌ڤ کارکرنە سروشتێ مرۆڤ به‌رچاڤ دكه، ره‌فتارێن مرۆڤان گرێداىی وەزیفە و كارێ ڤان سێ به‌شانه.
سه‌ر وەکە كارگه‌ها کۆمكرنا پێزانین کار دکە و ب دروستكرنا هش و داهینانا هزرێ و سه‌ركردایه‌تیا ره‌فتارێن مرۆڤ رادبە.
لا‌ش زێده‌تر ب ئاموورێن وێ كارگه‌هێ تێ پیناسەکرن و چقاسی ئه‌و ئاموور پێتر ساخله‌م بن واته ئه‌و كارگه‌هـ دێ بکارە زێده‌تر به‌رهه‌ما ساخله‌متر و جوانتر بەرهەم بینە .
دەربارا جانێ مرۆڤ، هەیا نها زانست نکاریە ب درستاهى جانێ مرۆڤان شیروڤه بكه و بگهە ئه‌نجامه‌كی وها کو جهێ ره‌خنەدایینێ نه‌بە.
ئەز دخوازم زێدەتر ل سەر سەرێ مرۆڤ بپەیڤم، سه‌ر دبه دینا‌مۆیا رێڤه‌برنا مرۆڤ.
ئاگاهیێن دچن مەژیێ مرۆڤ دە رۆله‌كی مه‌زن دبینین ژبۆی ئافراندنا ژیانا مرۆڤ، چقاسی مرۆڤ پێتر ئازاد بە ژ وه‌رگرتنا ئاگاهیان وێ زێده‌تر ئازاد بە ل ره‌فتارین خوە دە و زێده‌تر وێ بکارە داهێنانان د به‌رهه‌مێن خوە دە بکە، ئه‌ڤجا چ به‌رهه‌مێ مەعنه‌وی بە یان ژی ماددى.
ده‌ما مرۆڤ ل چاپەمەنیا پەکەکێ دنێرە، هه‌ست ب وێ یەکێ دكه كو ئه‌و هەموو نە مرۆڤێن نۆرمالن، بەلکو هن کەسن کو د قالبێ مرۆڤان دە نە، لێ د راستیا خوە دە بوونە ربۆت و مرۆڤ دکارە وان وەکە مرۆڤێن بێی سه‌ر یان بێی ئافراندنا هزرێ پێناسه بکە، واته چاپەمەنیا پەکەکێ كادرۆ و گه‌ریلا و گرسەیا پەکەکێ وەکە ئاموورێن کو مەژیکێ وان ب رێیا ریمۆتکۆنترۆلێ تێ شۆغلاندن بەرچاڤ دکە.
چما ئه‌ز وان ب ڤی ئاوا دبینم و پێناسە دکم؟ ژ بەر کو ل گۆر چاپەمەنیا پەکەکێ هەر تشت و هەر بوویەرەک ب سایا سەرێ رێبەرێ وان ئانکۆ عەڤدللا ئۆجالان روو ددە، تەڤ چالاکی، تەڤ باشی و سەرکەتن، بەرخوەدان و شۆرەش ب سایا سەرێ سەرۆکێ وان روو ددن، دەما بنکەتن یان نەباشی یان شاشتیەک ژی روو ددە ئەڤ ژ ئەنجاما وێ یەکێ یە کو ل گۆر تەعلیماتێن سەرۆکێ پەکەکێ تەڤ نەگەریانە، لۆما نەکارینە ب سەر بکەڤن.
ئەڤ ژی هن میناکن ل سەر وێ یەکێ دەما کادرۆ یان گەریلا یان ژی ئالیگرەکی وان کارەکی ئەنجام ددە، د چاپەمەنیا خوە دە ب ڤی ئاوا ل سەر وان دنڤیسن:
ب پارادیگمایا رێبەر ئاپۆ، هه‌ڤالێن مه چالاکیەکە خوەکوژی ئەنجامدا، ئەڤ د دەمەکی دە یە کو پێش سه‌رۆك ئاپۆ بناسن ئەو نەدکارین کارەکی ب ڤی ئاوا بکن.
ئیرۆ ل ژێر روناهیا هزرا رێبەر ئاپۆ، هه‌ڤالێن مه د زیندانێ دە کەتن گرەڤا برچیبوونێ. پێش هه‌بونا سه‌رۆك ئۆجالان د قادا خه‌باتێ دە،ت کوردەک نەکاریە خەباتەکە ب ڤی ئاوا ئەنجام بدە!
د بن رۆناهیا هزری یاسه‌روكێ مه دە، هەژمارەک جوانان ل باژارێن كوردستانێ ده‌ست ب خوەپێشاندانێ كرن و دروشما یان مرن یان ئازادی ئا رێبەر ئۆجالان بلند كر!
ل گۆر پارادیگمایا سەرۆک ئۆجالان گه‌ریلا جل و بەرگێن كوردى ل بەر خوە دکن، پێش دەرکەتنا سه‌رۆك ئۆجالان كوردان نه‌دزانى جلێن كوردی ل بەر خوە بکن.
پارادیگمایا رێبەر ئاپۆ، پارادیگمایا هەری سەرکەتیە و ب ڤێ یەکێ ئەم دکارن تەڤ گەلێن جیهانێ ئازاد بکن!
ئازادیا رێبەر ئاپۆ ئازادیا کورد و کوردستانێ یە!
پارادیگمایا رێبەر ئاپۆ وێ ژ بۆی تەڤ جیهانێ ببە چارەسەری!
پارادیگمایا رێبەرێ گەلێ کورد عەڤدللا ئۆجالان یەکانە چارەسەریا پێڤاژۆیا کائۆتیک یا ل جیھانێیە و …..هتد!
