8 سال بەرێ وەکە ئیرۆ شەنگال ژ چەتەیێن داعشێ ھات پاقژکرن. “ئۆپەراسیۆنا ئازادیا شەنگالێ” یا کو ژ ئالیێ ھێزێن پێشمەرگە ڤە د بن فەرمانداریا سەرۆک بارزانی دە ل شەنگالێ ھات دەستپێکرن، ھەم قەدەرا داعشێ گوھەرت و ھەم ژی، ژ بۆ کوردێن ئێزدی بوو  جھێ شانازی و دلسۆزییێ.

ژ بلی ھێزێن پێشمەرگە هیچ ھێزەکا دن بەشداری ئۆپەراسیۆنا رزگارکرنا شەنگالێ نەبوو

7 ھەزار و 500 پێشمەرگە بەشداری ئۆپەراسیۆنا کو 12 مژدارێ دەست پێ کری ببوون. ھێزێن پێشمەرگە زێرەڤانی، یەکینەیێن پێشمەرگەیێن رۆژئاڤا، فەرماندەیا شەنگال، فەرماندەھیا پشتەڤانییێ یا یەکەم، فەرماندەیا بارزان، ھێزا تایبەت یا یەک و دو، پێشمەرگێ گولان، ھێزا دژەتەرۆرێ، ھێزا 32، ھێزا ژینگەھێ یا دوھۆکێ، لیوایێن ب سەر وەزارەتا پێشمەرگە یا 4، 8 و 12 و ھێزا خوەبەخش بەشدار ببوون. ل گۆری چاڤکانیێن ئامەریکی، داعشێ ژ بۆ ئۆپەراسیۆنەکێ ل ھەرێمێ خوە ئامادە کربوو و تەنێ ل ناڤەندا شەنگالێ ھەژمارا خوە گەهاندبوو 600 چەتەیان. ھەر وھا گەلەک یەکینە ژی رێکخستبوون.

ژ بلی ھێزێن پێشمەرگە چ ھێزەکا دن بەشداری ئۆپەراسیۆنێ نەبوونە. سەرۆکێ ئاژانسا پاراستنا ھەرێما کوردستانێ مەسروور بارزانی کو وێ دەمێ بەشداری ئۆپەراسیۆنێ ببوو، د ھەڤپەیڤینەکا لگەل BBC دە راگھاند، ب ئۆپەراسیۆنا کو رۆژا چارشەمبێ دەست پێ کری، مە بەشەکا گرینگ یا شەنگالێ ئازاد کر و گۆت، ئارتێشا ئیراقێ پشتگری نەدایە ئۆپەراسیۆنێ.

مەسروور بارزانی گۆت، “مە داخوازا پشتەڤانیا چەکێن گران ژ ئارتێشا ئیراقێ کر. لێ مخابن جەبلخانە ژ بۆی مە نەرێکرن. “بەشداریا وان د ئۆپەراسیۆنێ دە سفر بوو.” ھێزێن هەڤپەیمانیا ل دژی داعشێ ب ئێریشێن ھەوایی پشتگری دان ئۆپەراسیۆنێ.

ئۆپەراسیۆنەکا لەشکەری یا پر سەرکەفتی ھاتە ئەنجامدان

شەنگال ژ بۆ داعشێ جھەکی پڕ گرینگ بوو. ئەو کەلھا سەرەکی یا  د ناڤبەرا ھەر دو ناڤەندێن ئیداری یا داعشێ، رەقا و مووسلێ دە بوو. واتە رۆژئاڤا و باشوور ب ھەڤ را گرێ ددا. ژ بەر ڤێ سەدەمێ ژی ب رەحەتی ژ ھەرێمێ دەرنەدکەت. ئەمەریکا د دەستپێکا مەھا مژدارێ دە راگھاندبوو کو ل دژی ئیحتیمالا ئۆپەراسیۆنەکا چەتەیێن داعشێ کو ھەژمارا ھێزێن خوە تەنێ ل ناڤەندا شەنگالێ گهاندینە 600 کەسان، ل بەندێ بوو کو ئۆپەراسیۆن 6-7 رۆژان بدۆمە. فەرمانداریا ئۆپەراسیۆنا ل دژی داعشێ ژی وسا تەخمین دکر، لێ ئۆپەراسیۆن د ناڤا 48 دەمژمێران دە ب سەرکەفتی ب داوی بوو.

ھێزێن پێشمەرگە د رۆژا یەکەما ئۆپەراسیۆنێ دە رێیا ناڤدەولەتی و رێیا 47 یا کو باشوورێ کوردستانێ و رۆژئاڤا ب ھەڤ رە گرێددە، ژ بۆ کو ھێزێن پشتگریێ بۆ داعشێ نەھێن ھاتبوو کۆنترۆل کرن. ھێزێن داعشێ یێن بێ ئالیکاری مایی، دەست ب تەسلیمبوونێ کرن. تەنێ د دەمژمێرێن دەستپێکێ یێن ئۆپەراسیۆنێ دە نێزی 40 چەتەیێن داعشێ خوە رادەستی ھێزێن پێشمەرگە کرن. د داخویانیا فەرمانداریا گشتی یا پێشمەرگە دە ھات راگھاندن کو د رۆژا یەکەما ئۆپەراسیۆنێ دە ھەری کێم 100 چەتەیێن داعشێ ھاتنە کوشتن و ل قادەکا 150 کیلۆمەترێن چارگۆشەیی دە ھاتیە کۆنترۆلکرن.

د ئەنجاما ئۆپەراسیۆنێ دە 2 پێشمەرگە شەھید بوون و نێزیکی 10 پێشمەرگەیان ژی ب گرانی بریندار بوون. لێ بەلێ پشتی ئێریشێن چەتەیێن داعشێ یێن سالا 2014، ھێزێن پێشمەرگە ژ بۆ ڤەکرنا رێ و رزگارکرنا شەنگالێ ب گشتی نێزیکی 600 شەھیدان دابوون.

سەرۆک بارزانی “ئۆپەراسیۆنا ئازادکرنا شەنگالێ” دیاری ژنێن ئێزدی کر

پشتی کۆنترۆلکرنا تەڤاھیا دەڤەرێ، سەرۆک بارزانی ل سەر چیایێ شەنگالێ داخویانیەک دا و ئۆپەراسیۆنا رزگارکرنا شەنگالێ دیاری ژنێن ئێزدی کر.

سەرۆک بارزانی گۆت؛ “ئەم یەک بھۆست ئاخا پیرۆزا کوردستانێ ژی د دەستێ تەرۆریستێن داعشێ دە ناھێلن، دێ ھەموویێ رزگار کین” و بال کشاند سەر گرینگیا ئازادکرنا شەنگالێ و گۆت، “ئەڤ سەرکەفتنە بەدەلا ھەموو جیھانێ یە.”

سەرۆک بارزانی ئۆپەراسیۆن ژ ئالیێ تەکنیکی ڤە نرخاند و راگھاند، ھێزێن پێشمەرگە د 48 دەمژمێران دە رووبەرەکێ 3 ھەزار کیلۆمەترێن چارگۆشە ژ چەتەیێن داعشێ پاقژ کرن.

سەرۆک بارزانی ئاخافتنا خوە وھا بەردەوام کر: “ئازادکرنا شەنگالێ ژ دەستێ تەرۆریستێن داعشێ ب دەستێن پێشمەرگەیێن مەیێن قەھرەمان سەرکەفتنەکا دیرۆکی و مەزنە ژ بۆ گەلێ کوردستانێ د وارێ لەشکەری و سیاسی دە. ئەڤ سەرکەفتن ژ ھەموو ئالیان رە نیشان ددە کو ئەو رۆژێن کو داگیرکەر و میتینگەران ھەول ددان گەلێ کوردستانێ تەپەسەر بکن، نھا ل پشت مە مان. گەلێ کوردستانێ نھا ب سەرێ خوە پاراستنا خوە دکە، دژمنی تێک دبە و نرخێن مرۆڤاتیێ ژی دپارێزە.”

  قەشمەرییێن پەکەکێ یێن ل ھەمبەری ئۆپەراسیۆنێ

ھێزێن پەکەکێ د سەر رۆژئاڤا را ھاتن شەنگالێ و ھەول دان ئەفسانەیا کو ب 12 کەسان شەنگال پاراستنە د ناڤا گەل دە بەلاڤ بکن. پەکەکێ ژی لگەل ھێزێن ئیراقی ب ئاوایەکی ھەڤبەش ژ بۆ ئاستەنگکرنا ئۆپەراسیۆنا رزگارکرنا شەنگالێ کار کر. تەڤی ڤێ یەکێ ژی دەما دیت کو دێ ئۆپەراسیۆن هێت ئەنجامدان، ھندەک ھێزێن وان ژ چیایێ شەنگالێ خوە بەر ب ھەرێمێن ژ ئالیێ پێشمەرگە ڤە ھاتنە رزگارکرن ڤە بەردا. دیسا ب رێیا چاپەمەنیێ ھەول دا کو خوە بکن ھەڤپشکێ سەرەکی یێ ڤێ سەرکەفتنێ. ھەر وھا ئالایێ خوە ل سایلۆیێن گەنم و جھێن گرینگێن ھەرێمێ دالەقاند. لێ بەلێ ھێزێن پەکەکێ د تەڤاھیا ڤێ ئۆپەراسیۆنێ دە یەک فیشەک ژی نەئاڤێتیە داعشێ. ل ھەرێمێن ھاتیە رزگارکرن دە دەست ب نمایشێن راگەھاندنی کر.

ئانکو، تەڤلیبوونا پەکەکێ یا ئۆپەراسیۆنا شەنگالێ تەنێ ژ بۆ چاپەمەنیێ بوو. د راستیێ دە پەکەکە بەشداری ئۆپەراسیۆنێ نەبوویە.

پەکەکێ وەکە ھەر جار د دیرۆکا خوە دە کری ل شەنگالێ ژی ھێزا خوەیا دەست ب سەر داگرتنا دەستکەفتیێن کەسێن دن نیشان دا و خوەست وێ سەرکەفتنێ وەکە یا خوە دەستنیشان بکە. پەکەکە د ڤان 2 سالێن داوی دە ب گەلەک شانۆیێن سییاسی-راگەھاندنێ ھەول ددە کو ببێژە تەنێ پەکەکێ ئۆپەراسیۆنا رزگارکرنێ پێک ئانیە. لێ ئۆپاراسیۆنا ئازادکرنا شەنگالێ داستانا پێشمەرگە د بن فەرماندارییا سەرۆک بارزانی دا یە.