94 رۆژن جنێد سەید مەجید ئەندامێ ئەنجوومەنا ھەرێمی یا پارتیا دەمۆکراتا کوردستان – سووریا ژ ئالیێ چەکدارێن پەیەدێ ڤە ل گرکێ لەگێ هاتیە رەڤاندن و تا نھا چ ئاگاھی ل سەر چارەنڤیسا وی تونە نە.
مەجید ژ 15ێ تەباخێ ڤە ل گەل بەرزان حسێن رۆژنامەڤان د پارتیا دەمۆکراتا کوردستان – سووریا دە ھاتیە گرتن، د 30یێ ئیلوونێ دە بەرزان ھات بەردان لێ جنێد تا نھا گرتی یە.
د دەربارێ رەڤاندنا جنێد سەید مەجید دە رێخستنا دەنگێ گرتیان، ل سەر رووپەلا خوە ل سەر تۆرێن جڤاکی دو جاران، داخویانیا تایبەت ب ناڤبووری بەلاڤ کریە، تێ دە ژ پەیەدێ خوەست کو د زووترین دەم دە چارەنڤیسا وی دیار بکە و سەربەست بەردە.
تەڤی بانگێن بەردەوام ژ ئەنجوومنا نشتیمانی یا کوردی، چالاکڤان و رێخستنان ڤە بۆ بداوی ئانینا ڤان کریار و بنپێکران، پەیەدێ ل سەر پلانا خوە رژدە، و ھەر دەم و دەمەکێ ئەندام، و ئالیگرێن ئەنەکەسێ و پارتیێن د ناڤ دە دکە ئارمانج و بن چاڤ دکە، ئەنەکەسە ژی تەکەز دکە کو ئەڤ کریار بەرێ شێنیێن کورد ددە کۆچبەریێ.
