بووبێ ئەسەر
نەتەوەبوون خالەکا سەرەکی یا ھەمی مللەتێن جیھانێ یە. ھەر مللەتەک ل گۆر نەتەوەیا خوە ئانکو نیژادا خوە دژیت. شکل و رەنگێ جڤاتا خوە دگرە و ل گۆر وێ خوە ب رێڤە دبە. ھەر کەسێ خوە، نژادا خوە ئینکار دکە، نە ئەو ب کێر خوە، نە ژی ب کێر نژادا خوە ناهێن. دبێژنە مرۆڤێن وەھا کەسێن بێ ئەسل و فەسل. کەسێن ل گۆر باوەریا مللەتێ خوە، ل گۆر ھێژایی، خوەشی و نەخوەشیێن گەلێ خوە نەژین ئەو ژ بۆی مللەتێ خوە نابن مال و کەسێن وەھا تم دکارن ل سەر ھەر وەریسی و ل گۆر ھەر مەقامێ ژی بلەیزن.
بارزانی ژ رۆژا ئەول دە ل سەر ڤێ سەکینینە و خوەستنە کو گەلێ وان ل گۆر باوەریا خوە وەکە مللەتێ کورد بژی. ئەو کەسێن ژ مللەتێ خوە حەز نەکن، نکارن ژ مللەتەکی دن ژی حەز بکن. ئەو کەسێن خزمەتا مللەتێ خوە نەکن، نکارن ژ بۆ مللەتەکی دن بکن.
لۆما ژ کەسێن وەھا رە تێ گۆتن بێ ئەسل. رامانا وێ ئەوە کو کەسێن بێ ئەسل، نە ژ خوە و نە ژی ژ مللەت ئانکو نیژادا خوە شەرم ناکن. کەسێن شەرما وان ژی تونەبە دکارن ھەر خەرابی و نەباشیان ژی بینە سەرێ ملەتێ خوە، کەس و کەسایەتێن خوە. ب سالانە کو کورد ژ بەر کەسێن وەھا د شەرێ ئازادیا گەلێ خوە دە وەندا کرنە ئانکو کەسێن وەھا رێبەر و سەرۆکێ شۆرەشێ ب ئەرزانی فرۆتنە دژمن و تالی ئەو ژی ھاتنە کوشتن. میناکێن ڤێ ل باکورێ کوردستانێ گەلەکن.
ژ بۆنا ھەر کەسایەتیەکی کورد بکاربن ژ گەلێ خوە، ژ مللەت و ژ نیژادا خوە حەز بکن، ئەڤ خال د رێبازا دە ھاتیە ب جھ کرن. ژ بەر کو بارزانیی مەزن تم ئانیبوو زمان و گۆتبوو: “ئەو کوردێ کو نەتەوەیی نەفکرە، ئەو دکار رۆژەکێ خوە و گەلێ خوە ژی بفرۆشە”. ئەم ئیرۆ وەکە کورد ھێژاییا ڤێ گۆتنێ دزانن کو چما بارزانیان سەد سالان بەرێ ئەڤە گۆتیە و بارزانیێ مەزن ژی ئەو وەکە خالەکا ڤێ رێبازا پیرۆز پێشکێشی گەلێ خوە کرییە.
وەکە بەرێ ژی ھاتبوو گۆتن کو ھەمی خالێن ڤێ رێبازا پیرۆزن. ژ بەر دیتن، کرن و شاھدیان ھندەک تشتێن بوونە، پێک ھاتنە. ژ بەر کو ھەر مللەتەک ل گۆر ژیان و پێدڤیێن خوە ژ بۆی خوە رێبازەکی ئانکو فەلسەفەیەکی دئافرینە. لۆما بارزانیان ژی د ئافراندنا رێبازێ دە، رەوشا گەل و باوەریا وی دانە بەر چاڤان و ھەر تشتەکی قەومی، ھاتنە سەرێ وان، ژ بۆنا دەرس ژێ گرتنێ کرنە خالەک ژ خالا رێبازێ و پێشکێشی مە کوردان کرییە. پێشکێشی مە کریە دا کو شاشی نەبە ئانکو تشتێن خەراب دوبارە نەبن و تشتێن باش بێنە پاراستن.
ھەگەر ئەم چاڤەکی ل سەر دیرۆکا گەلێ خوە بگەرینن، ئەم دێ ب رەحەتی ببینن کو بێ چما نەتەوەبوون بوویە خالا رێبازێ. ل ھەر چار پەرچێن کوردستانێ دە ژ رۆژا وەلاتێ مە پەرچە کرن و ھەتا نھا ژی تەکۆشین و بەرخوەدانا ل ھەمبەر داگیرکەران رانەوەستیایە. لێ تێ دیتن کو د گەلەک سەرھلدان و بەرخوەدانان دە، ھندەک ژ کوردان ژ بۆنا بەرژەوەندیێن خوەیێن مالباتی ئان شەخسی ل با دژمنێ گەلێ خوە جھ گرتنە. ژ بۆنا وێ بوو کو بارزانیێ نەمر ئانیە زمان، “کەسێن نەتەوەیی نەفکرن ب رەحەتی دکارن خوە و مللەتێ خوە بفرۆشن” و فرۆتنە ژی.
نەتەوەبوون ئەوە کو تو بەرژەوندیا گەلێ خوە، وەلاتێ خوە د سەر ھەر تشتەکی خوە را بگری. بەرژەوەندیا مللەتێ خوە د سەر یا خوە دا گرتن، تێ واتەیا کو تو رۆژەکێ خوە و مللەتێ خوە ئازاد بکی. ژ بەر کو چ دەما کەس و کەسایەتی نەتەوەیی نەفکرن تم بەرژەوەندیێن وان یێن شەخسی ل پێشن. ئەو ژی زەرارێ ددە گەل و مللەت.
ئەم وەکە مللەتێ کورد د ھەمی سەرھلدان و بەرخوەدانێن خوە دە ل گەل ھەڤ بانا، مە ھەمیان ژ بۆنا یەک ئارمانج و ھەدەفێ زانین، کارین و ئاقلێن خوە ژ بۆنا نەتەوەیا خوە ب کار ئانیبانا، ئەم ژی دا ئیرۆ وەکە ھەر مللەتەکی ڤێ جیھانێ ل سەر ئەردا خوە ب ئازادی ژیابانا. لێ ژ بەر کێمبوونا روحیەتا نەتەوەیی ئەم ھەر بندەست و وەکە کۆلە مانە.
دڤێت کورد کێفخوەش بن کو ئازادیا ئەم تم بەحسا وێ دکن، پشتی تەکۆشینا سەد سالان ل باشوورێ کوردستانێ ب دەست کوردان کەتیە و ئەو ژی ب سایا ڤێ رێبازا پیرۆزە. ھەگەر بارزانیان ژ رۆژا ئەول یا کو ل دژی داگیرکەران شەرێ ھەبوون و نەبوونا گەلێ خوە، نیژادا خوە ل سەر خەتەکا نەتەوەیی نەدابانا، ھوون باوەر بکن ئیرۆ دا ئەو پەرچا ئازاد ئانکو باشوورێ کوردستانێ ژی نەدبوو. نەتەوەبوون، تالیا تالی تە دگهینە ئازادی و سەرخوەبوونا تە…
بالا خوە بدنێ، پشتی دامەزراندنا کۆمارا ترکیێ و ھەتا نھا، شەر و پەڤچوون د ناڤا کوردان و داگیرکەرێن مە دە رانەوەستیایە و کوردان ب وێرەکی ل ھەمبەر ھەمی زۆرداتیا داگیرکەران ئانکو ل دژی کۆمارا ترک شەرێ ئازادیا گەلێ خوە دانە. لێ ھەتا نھا یەک ژ وان بەرخوەدان و سەریھلدانان ب سەرنەکەتنە. چما؟
سەدەم دیارە کو مللەتێ کورد پشتی پارچەبوونا خوە ھێدی ھێدی ب پلان و پرۆژەیێن داگیرکەران ژ نەتەوەیا خوە ب دوور کەتنە و دکەڤن. ھەر سەرھلدانەک ل باکور کوردستانێ ل سەرانسەرێ وێ گەش و فرەھ نەبوویە و وەکە ھەرێمی مایە. ل دەرەکێ ئانکو ل ھەرێمەکێ شەرێ ئازدیێ دەستپێکرییە و ل ور قەدیایە. لێ شۆپ و بەرخوەدانێن بارزانیا د ھەمی پەرچێن کوردستانێ دە تێ دیتن. ژ بەر کو ئەو خوەدی رێبازەکێ بوون و تم نەتەوەیی فکرینە و ل گۆر وێ تەڤگەریانە.
ل کو شۆرەش تێکچووبە، داگیرکەران ھەمی کوردستان دشەوەتاندن و پشتی وێ شەواتێ کورد ژ نوو دە دھاتنە سەر ھەشێ خوە، لێ ئێدی دەرەنگ دمان. ڤێ رەوشێ ھەر بەردەوام کرییە و ژ بەر ڤێ ژی ل پارچا مەزن کوردان چ دەستکەفتی ب دەست نەخستنە. نھا ژی رۆژ ب رۆژ ل باکورێ کوردستانێ ژ بەر کێمبوونا روحیەتا نەتەوەیی زمانێ کوردی وەندا دبە ئانکو تێک دھەرە. ھزرا نەتەوی کێم دبە و بەرێ کوردان بەر ب ترکبوونێ ڤەیە. دەما ئەم ڤێ رەوشێ دبینن و خالا نەتەوەیی کو د رێبازێ دە مسۆگەر بوویە، ددن بەر چاڤان، ئەم فێم دکن کو بارزانیان ژ بۆنا چ ئەوقاسی گرینگی دانە ھزرا نەتەوەیی..
لێ دەما ئەم ل تەڤگەرا بارزانیان و رەوشا باشوورێ کوردستانێ یا نھا دنێرن، دبینن کو چما ور گھشتە ئازادیا خوە. ژ بەر وێ ھزرا نەتەوەیی بوو کو ھەمی بارزانیان تم ل گۆر رێبازا خوە تەڤگەریان و ب رێنیشاندانا وێ، تەکۆشینا ئازادیا گەلێ خوە دانە. ھەگەر ئەو ھزرا نەتەوەیی یا د رێبازا بارزانیان دە ھاتبوو مسۆگەرکرن نەبا، ئەم ئیرۆ نەدبوونە خوەدیێ خوە و پارچەکا ئەردی یا ئازاد ل باشوورێ کوردستانێ بانا.
ژ بۆنا بسەرکەتنا مللەتێ داگیرکری و بندەست، بەری ھەر تشتی دڤێت ھزرا نەتەوەیی د ناڤا وی دە خورت بە دا کو خوە و گەلێ خوە نەفرۆشن. ھەگەر ئەم ڤێ بدن بەر چاڤان ئەم دێ ببینن کو رێبازا بارزانیێ نەمر چقاسی گرینگ و پێویستە کو دڤێت کوردێن ھەر چار پەرچان ل گۆر وێ خوە ب رێخستنی بکن دا کو بکاربن د شەرێ ئازادیا گەلێ خوە دە وەکە بارزانیان ب سەربکەڤن.
ژ بەر کو مللەتێ بێ رێباز، وەکە جێشەکا بێ چەکە، وەکە دارەکا بێ فیقی و وەکە سەرەکی بێ مەژییە. ژ بۆنا ڤێ ژی دڤێت گاڤا یەکەم ھەمی کورد ببن نەتەوەیی دا کو بەرژەوەندیا نەتەوەیا خوە ئانکو نیژادا خوە د سەر ھەر تشتەکی رە بگرە کو بکاربە ژ بۆنا نەتەوەیا خوە ھەمی جوورە فەداکاریان بکە.
