نووری چەلیک
د مژارا کورد و کوردستانێ دە ھەموو یەکن، ھەموو ژ یەک حەودی ئاڤێ ڤەدخون و ھەموو نەیارن. چەپێن وان، راستێن وان، ئۆلدارێن وان، سۆسیال دەمۆکرات و ھەتا ب شڤان و گاڤانێن وان نەیارێن کوردانە. ئیستیسنا هەنە تێ دە، لێ ژ سەدی 99ێ وان کوردان ژ خوە رە وەک دژمن دبینن و خزمەتا سیاسەتا دەولەتا خوە دکن.
شارەدارییا باژارێ مەزن یا دیاربەکرێ، یا کو د بن کۆنترۆلا قەیوومان دەیە، ل سەر حەسابا خوە یا مەدیایا جڤاکی دیمەنێن خەباتێن بوولڤارا شێخ سەعید یا کو وێ رێیا زەنگل و رێیا زەنگییا ئەلعەزیزێ بگھینە ھەڤ پارڤە کر.
پشتی دیمەنان د دەربارێ ناڤێ “شێخ سەعید” دە نیقاش ھاتن کرن و گەلەک رێڤەبرێن پارتی و سازیێن دەولەتێ بەرتەک نیشان دان، ل دژی ناڤێ شێخ سەعید دەرکەتن و وەک ھەر جارێ د کەسایەتییا شێخ سەعید دە دەست ب نەیارتییا کوردان کرن.
بەرتەک و نەیارتییا پارتی و رێڤەبرێن وان یێن نیژادپەرەست و فاشیست ھەتا ب رادەیەکێ تێ فێھمکرن. دل دخوەست کو قەت نەبە چەپ و کۆمونیستێن وان نەکەڤن ھەمان خەلەتییێ و نەیارتییا شێخ سەعید و کوردان نەکن. لێ جارەک دن ئەشکەرە بوو کو د مژارا کورد و کوردستانێ دە چەپ و کۆمونیستێن وان ژ فاشیستێن وان زێدەتر خزمەتکارێن دەولەتا خوەنە و سۆسیالشۆفینی و سۆسیالفاشیستی یا خوە جارەک دن سەپاندن.
پارتییا کۆمونیستا ترکیێ (TKP) سۆسیالفاشیستییا خوە جارەک دن ئەشکەرە کر، ل دژی شێخ سەعید دەرکەت و گۆت: “شێخ سەعید عەشیرەتە، دژمنێ کۆمارێیە”.
تەشکیلاتا پارێزگەھا دیاربەکر یا تەکەپێ، د دەربارێ بوولڤارا دیاربەکرێ یا کو ناڤێ شێخ سەعید لێ ھاتیە کرن دە داخویانی دا. تەکەپە شێخ سەعید وەک “عەشیرپارێز، سەردەست، دژمنێ کۆمارێ، ئالیگرێ ئاخا و خیلافەتا عەشیران” ب ناڤ کر.
تەشکیلاتا پارێزگەھا دیاربەکرێ یا پارتیا کۆمونیستا ترکیەیێ (تەکەپە) دەربارێ ناڤێ “بوولوارا شێخ سەعید” یا ل باژێر بێ چێکرن دە داخویانی دا.
تەشکیلاتا پارێزگەھا دیاربەکرێ تەکەپێ د داخویانیا خوە یا دەربارێ مژارێ دە تایبەتیێن شێخ سەعیدێ کو د سالا 1925 دە ل دیاربەکرێ ب بریارا مەحکەمەیا ئیستقلالێ ھات سێدارەدان، وەک “دژمنێ کۆمارێ، ئالیگرێ ئاغا و خیلافەتا عەشیران “بکار ئانی”.
ئەڤێن کو ناڤێ کوردێن کۆمونیست ل خوە دکن و د بن سییا تەکەپێ یا سۆسیالفاشیست دە د کەسایەتییا شێخ سەعید دە نەیارتییا کوردان دکن، د داخویانییا خوە دە دبێژن “ئەم وەک کوردێن کۆمونیستێن دیاربەکرێ ئەم دێ تێبکۆشن کو ناڤێ جگەرخوین، مووسا عەنتەر و یلماز گونەی یێن کو ئالیگرێ رۆناکبیری، وەکھەڤی، سەرخوەبوون و پێشکەتنێ نە، نە ناڤێ خیلافەتێن دژمنێن کوردستانێ و کۆمارێ نە، ل سەر رێ، کوچە و کۆلانێن باژارێ خوە دەینن”.
سۆسرەتەک مەزنە. ھەم کوردێن کۆمونیستن، ھەم خوە د بن سیوانا تەکەپێ یا سۆسیالشۆفینیست دە ڤەدشێرن، ھەم جەگەرخوین، مووسا عەنتەر و یلماز گونەی وەک سەرخوەبوونخواز ب ناڤ دکن و ھەم ژی وان ب سەرخوەبوونا کۆمارا ترکیێ ڤە پینە دکن. راستە، جەگەرخوین، مووسا عەنتەر و یلماز گونەی سەرخوەبوونخواز بوون، لێ سەرخوەبوونخوازێن کوردستانێ بوون، نەیێن کۆمارا ترکیێ بوون. د ھەمان دەمێ دە شێخ سەعید ژی دۆزا حەق و حقووقێ مللەتێ کورد دکر و ئەڤ یەک ژی پارچەیەک ژ سەرخوەبوونخوازییێ یە. لێ ئۆلدارییا وی، باوەرمەندییا وی ژ بۆی خوە دکن سیپەرا نەیارتییێ و د بن ڤێ یەکێ دە ژی راستەراست نەیارتییا کورد و کوردستانێ ھەیە.
ب کورت و کورمانجی؛ ئەو کەسێن کو ب ناڤێ کۆمونیستییێ، ب ناڤێ کۆمونیستێن کورد و د بن سیوانا تەکەپێ و چەپێن ترکان دە نەیارتییا شێخ سەعید و مەزنێن کوردان دکن، لگەل گورگی دکوژن، لگەل شڤانی دخون و لگەل خوەدییێ پەزی شینێ دگرن وەسسەلام…
