ھندەک جاران گۆتوبێژێن دکەڤن رۆژەڤێ دە گەلەک ل سەر نایێ سەکناندن، هەلبەت ھەلوەستێن د دەربارێ ڤان گۆتوبێژان دە دەردکەڤن ھۆلێ، گەلەکی گرینگن. ئەڤە چەند رۆژن ژ بۆ ناڤێ شێخ سەعید ل ۆلانەکا دیاربەکرێ ھاتیە کرن گەلەک نیقاش چێدبن و گەلەک کەس ھەلوەستا خوە ددن دیارکرن.
ل ترکیێ ھەلوەستا ئالیێن ھەیی گەلەکی بالکێشە. پارتیێن وەک مەھەپێ، پارتیا سەرکەفتنێ، IYI پارتیێ کو وەک پارتیێن قەومی تێنە ناسکرن ژ یەک سەروکانیا ئایدۆلۆژیک تێنە خوەدی کرن، وەک دن پارتیا کۆمونیستا ترک و چەپێن ترکا و ئالیێن خوە سۆسیالست ددن ناساندن ژی، ژ سەروکانیەک جودا تێن خوەدیکرن. لێ د ئەنجام دە، دەما بەحسا کوردا و ھندەک نرخێن کوردا تێ کرن، ئاڤا ھەردو سەروکانیان د جویەکی دە دحەرکە.
وەک دن ھەلوەستا تەڤگەرا کورد، کەسایەتێن کوردا ژی گەلەکی گرینگە. پارلەمەنتەرێ ئاکەپێ غالب ئەنساریۆگلو، پارلەمەنتەرێ ھودا پارێ سەرکان رامانل و فاروک دنچ، پارلەمەنتەرێ IYI پارتیێ سالم ئەنساریۆگلو ل گۆرا دیتن، بیر و باوەریا خوە ل شێخ سەعید خوەدی دەرکەتن و کەسایەتا شێخ سەعید ژ ئالیی جڤاکی و ئۆلی ڤە نرخاندن.
ژ ئالیەک دن ڤە ھندەک ئالیێن کورد پارتی و دەزگەھێن سڤیل ل ناڤێ شێخ سەعید خوەدی دەرکەتن و ھەلوەستا نژادپەرەستێن ترک شەرمەزار کرن.
گەلۆ دەم یانی ھەدەپە یانی پەکەکە د ڤێ دەربارێ دە چما بێ دەنگە. یان ژی ب دەنگەک گەلەک لاواز بەحسا شێخ سەعید دکە. سەدەمێ ڤێ یەکێ ئەشکەرەیە، سەدەم دیتن و گۆتنێن سەرۆک و رێبەرێ وان عەڤدللا ئۆجالان یێن د دەربارێ شەخ سەعید دەیە.
ئۆجالان د داخوویانیەکا خوە دە بەحسا شێخ سەعید دکە و دبێژە: شێخ سەعید نە رزگاریخوازەکی نەتەوی یێ کورد بوو، ئۆتۆنۆمیستەکی فەۆدال یێ ئۆلی بوو. (…) سەرھلدان ژ بەر کو نە پێشڤەروو و زانستی نە، تێک دچن. ژ ئالیە فەیلەسۆفی ڤە ژی ئەڤە وسایە. ئەگەر تشتەک ل جھەکی تێکبچە، ئەو تەمسیلا پاشڤەرووتیێ دکە. مستەفا کەمال د وان شەرت و مەرجان دە نوونەرتیا کەسێن پێشکەتی دکر. ئەز نابێژم کورد پاشڤەروو بوون، سەرۆکێن وان پاشڤەروو بوون. وان کورد سەدسالەکی پاشڤە خستن. ئەم ئیرۆ ژی ژ ڤێ ئێشێ دکشینن. کی بەرپرسێ ڤێ یەکێیە؟ ئەو بەرپرسیارن. (ANF 22.9.2014 ژ تێبنیێن ھەڤدیتنێن ئیمرالیێ)
نە پیدڤییە کو ئەڤ گۆتنێن ئۆجالان بێنە شرۆڤەکرن. ژ بەر کو نەرینا ئۆجالان د دەربارێ رێبەر و سەرۆکێن کوردان دە یێن کو شۆرەش و سەرھلدان کرنە ئەشکەرەیە. ئەو ژ خوە پێڤە کەسەکی ناس ناکە و ئەڤ یەک ژی د پرۆپاگاندە و دەزەنفەرماسیۆنێن پەکەکێ دە بوویە سەدەمێ ونداکرنا نرخێن نەتەوی د ناڤا جڤاکا کورد ل باکورێ کوردستانێ دە.
ھەلوەستا ئالیێن ترک د دەربارێ سەرکردەیێن کوردان دە تێ فامکرن. ئەو ژ خوە دژمنێن ھەموو نرخێن کوردا نە. ترک چ کۆمونست بن، چ چەپ بن، راست بن یان ژی ئیسلامیبن ھەمان ئاوایی دژمناتیا کوردا دکن. ژ خوە تشتا کو ئالیێن سیاسی یێن ترکا دکە یەک و یەکدەنگیەکی د ناڤا وان دە پەیدا دکە، ب تەنێ پرسا کورد دە.
لێ گەلۆ دەما کورد داخویانیێن پارتی و کەسایەتێن ترک د دەربارێ نرخەک نەتەوی وەک شێخ سەعید دە شەرمەزار دکن، چما بەحسا گۆتنێن ئۆجالان ناکن؟ ئەڤ یەک بالکێشە. ئەگەر ئالیەک ترک ئێریشێ ناڤێ شێخ سەعید بکە بێ شەرمەزارکرن، گەرەک دەما یەک ب ناڤێ کوردا ئێریشێ ناڤێ شێخ سەعید بکە ژ شەرمەزاریێ وێدەتر بێ رەجماندن.
شێخ سەعید سەرۆکێ سەرھلدانەک نەتەوی یا کوردانە. شێخ سەعید نرخێک گەلەک ب بھا یێ نەتەوەیا کوردە. شێخ سەعید ب ئیرادەیەک ب ھێز دۆزا مافێ کوردا کریە و د ڤێ رێیێ دە ھاتیە دارڤەکرن و ھەتا وەک ئیرۆ ژی جھێ مەزارێن وی و ھەڤالێن وی نە دیارە.
خوەدی لێ دەرکەتنا شێخ سەعید ، د ھەمان دەمی دە خوەدی لێ دەرکەتنا نرخێن جڤاکی و نەتەوی یێ کوردا و کوردستانێ یە.
13.12.2023
رۆژەڤاکورد
