شێخۆ عەفرینی
گەل ب ئالا خوە ناسکرییە، د ھەر کۆربەندەکێ یان جڤینەکێ دە، ئالێن ھلدایی نیشان و ناسنامەیا ھەر بەشداربوویەکی ددن ناسکرن، راستە ئەم کورد نەبوون خوەدی وەلاتەکی سەربخوە، لێ ئەم خوەدی خاک، ئال، گەل و ناسنامە نە، دڤێی ئەم پێ ڤە وەرن گرێدان دا کو حەزکرن و دلگەرمی زێدە ببە، وان ھەست و نەستان رادەستی نفشەکی دن بکن.
د 17 بەرچلەیا ھەر سالەکێ دە، ئالا کوردستانێ تێ ببیرئانین، کو پەرلەمانا ھەرێما کوردستانێ، 1990 وەکە رۆژا ئالا کوردستانێ ل ھەموو دەڤەرێن ھەرێمێ دەستنیشان کریە. د سالا 1992 دە ژی وەکە سەمبۆل و ئالا ھەرێما کوردستانێ ب فەرمی ھاتیە راگھاندن. د ھەر سالەکێ دە کۆلان، تاخ، باژار، باژارۆک و گوند ب ھلدانا ئالا کوردستانێ دخەملن.
کەسێن وەلاتپارێز، ل ھەر چار پەرچەیێن کوردستانێ، و ل رەڤەندا کوردی ل ئەورۆپا، پارزەمین و وەلاتێن دن، رۆژا ئالا کوردستانێ پیرۆز دکن، ژ رایا گشتی رە ددن ناسکرن کو ئالا وەلاتەکی بندەست و داگیرکرییە، و ژ مافێ 50 ملیۆن کوردانە ب وەلاتەکی سەربخوە شا ببن.
چاوا ئەمێ ڤێ ئالێ ژ خوە رە وەکە سەمبۆل نەبینن، و ل کۆمارا کوردستانێ ل مەھابادا رۆژھلاتێ کوردستانێ سالا 1946 ھاتیە ھلدان، رێبەر و سەرۆکێ کۆمارێ شەھید قازی محەمەد، رادەستی مەلا مستەفایێ بارزانیێ نەمر کریە، ئەو ژی ل سەر پاراستنا ئالێ بەردەوام بوویە، ب ھەزاران پێشمەرگەیێن دلسۆز جانێ خوە کرنە قوربانیا خاکا پیرۆز د بن ئالێ دە شەھید بوونە، و بوویە نیشانا ھەر شۆرەشەکێ د ئیلۆن، گولان، راپەرینا 91 و ب دەھان ھەولێن رزگاریخوازا کوردستانێ دە، تا ب فەرمی ل ھەرێما کوردستانا ئازاد، پشتی ھن دەستێوەردان ھاتیە کرن، ھاتیە پەسەندکرن.
کا ھندەکی ئەم ل سەر رەنگ و واتەیێ وێ راوەستن، ژ ژۆر ڤە، رەنگێ سۆر، نیشانا خوینا شەھیدان خەباتا ژ بۆ ئازادی، روومەتی و سەربەستیێ یە. رەنگێ کەسک، نیشانا سروشت و خوەزایا کوردستانێ یە. رەنگێ زەر نیشانا ژیان و ژێدەرا مرۆڤانە، 21 تێریژێن رۆژێ د ناڤەراستا ئالێ دە نیشانا 21 ئادارێ سەرسالا کوردی و نەورۆزا کوردییە. رەنگێ سپی نیشانا ئاشتی و وەکھەڤیێ یە.
ئەرکە، ل سەر وەلاتپارێزەکی خوەدی ل ڤێ ئالێ دەرکەڤە، دیرۆکا وێ باش ناس بکە، و حەزکرنا وێ بەرداسی دلێ زارۆکێن خوە بکە و تێ دە بچینە، ئەرکەکی مەزن ل پێش رەڤەندا کوردییە کو جیھانێ ب ڤێ ئالێ بدن ناسین و ناسکرن، پشت رە ئێش و دەردەسەریا گەلێ کورد، ستەمباری و زۆرداریا کو ھاتیە سەرێ وی گەلی ببن وانە و پێناسین بەربەلاڤ ببن.
رۆژا ئالا کوردستانێ ل گەلێ کورد پیرۆز دکم، ب ھێڤی مە رۆژا کو سەرۆک مەسعوود بارزانی و نەڤیێن بارزانیێ نەمر یێن جوان ھەر دو برێز نێچیرڤان بارزانی، سەرۆکێ ھەرێمێ، و مەسروور بارزانی سەرۆکێ حکوومەتێ، ئالا پیرۆز بەرەڤ کوردستانا مەزن ببن، ببینن و ل سەر ھەر باژارەکی داگیرکری ھلدن، و چاڤێن کوردستانیان پێ گەش بکن.
