بووبێ ئەسەر

د ناڤا مللەتێ پێشکەتی دە سۆز و قەرار دو ھەڤۆکن کو رەنگ و دەنگێ رێڤەبرێن جڤاتێ ددە خویاکرن. ژ بەر ڤێ گرینگیێ بوو کو بارزانیێ نەمر ئەڤ ژی کریە خالەکا رێبازا پیرۆز کو رێڤەبرێن گەلێ کورد بکاربن ل گۆر وێ تەڤبگەرن.

سۆز، گرینگ و جھێ باوەری یان نە باوەریێ یە. دەما تە سۆز دا و پێک نەئانی ئێدی تو دێ بیە جھێ نە باوەریێ. ھەگەر تو بوویە جھێ نەباوەریێ ژی ئێدی چ قیمەت و ھێژاییا تە د جڤاتێ دە نامینە. لۆما کەسێن نە ل سەر سۆزا خوە بن، نکارن رێڤەبریا گەلێ خوە ژی بکن.

ھەگەر ئەم ل دەم و دەورانێن بەرێ بنێرن کو کەسێن سۆز ددان، محەقەق ئەو سۆزا خوە پێک دئانین. لۆما نھا د ڤێ دەورا مە دە،  مرۆڤ دبینە کو چ قیمەت و ھێژاییا سۆزێ نەھشتنە. لۆما ئیرۆ دەما ھندەک سۆزێ ژ دل ددن و دخوازن یێن ل ھەمبەر ژ وێ باوەر بکن، دبێژن: “ب سۆزا مێرێن بەرێ”. د ڤردە تێ خویاکرن کو تێگەھا سۆزێ ھێژاییا خوە، روومەت و قیمەتا خوە وەندا کریە.

 قەرار ژی وەکە سۆزێ گرینگە. دڤێت مرۆڤ بەری ھەر تشتی خوەدێ قەرار بە کو مرۆڤ بکاربە د کارێ خوە دە ب سەر بکەڤە. ھەگەر تو د کارێ خوە دە دودلی بووی ئاھا ئەو کار چ جاران ب سەرناکەڤە.

بالا خوە بدنێ ژ رۆژا بارزانیان دەست ئاڤێتن چەکا ژ بۆنا ئازادیا کوردستانێ، ب قەرار و خوەدی ھەلوەستەکا نەتەوەیی بوون. ژ بەر کو وان قەرار دان کو دڤێت “یان کوردستان یان نەمان”. د شەرێن خوە یێن سەد سالان دە ئەو قەرارا خوە ب بەدەلێن مەزن پێک ئانین.

ھەگەر بارزانی نە خوەدی ئیرادە و قەرارێن  نەتەوەیی بانا، ئەو نەدکارین سەد سالان شەرێ چار دەولەتێن داگیرکەر بکن. ژ بەر کو ئەو ب خوە و قەرارێن خوە باوەر بوون. لۆما قەرارا “یان کوردستان یان نەمان” گرتن و ل سەر ڤی ئاساسی مەشیان.

مەشا وان یا ب قەرار ئەم کورد ئیرۆ ل باشوورێ کوردستانێ کرنە خوەدی وەلاتەکی ئازاد. کار و خەباتێ دکن کو کوردان بکن خوەدی کوردستانەکا سەربخوە.  ئاھا ژ بەر ڤێیە کو قەرار گرتن یان دایین ژی بوویە خالەک ژ رێبازا پیرۆز.

ھەلبەت سۆز گرتن و دایین رەنگێ جڤاتێ، پارتی و تەڤگەرێن ھەیی ددە خویاکرن. سۆز، ھەلوەستا سەرۆک و سەرۆکاتیێ ددە زانین کا ئەو چقاسی خوەدی سۆزا خوە نە.

ئیرۆ پر ئەشکەرە تێ دیتن و زانین کو ھەمی جیھان ب سۆزا کو سەرۆک مەسعوود بارزانی ددە باوەرن. ژ بەر کو رێزدار بنگەهەک ژ بنگەهێن ڤێ رێبازێیە. ب ڤێ ژی و ب سۆزێن دانە ژی بوویە خوەدی شەخسیەتەک ناڤنەتەوەیی. لۆما گۆتنا وی ب خوە ژی سۆزە.

ھەگەر کورد ژی ب ھەمی ھەبوونێن خوە و ھێژاییێن خوە بکاربن ل سەر سۆزێن ددن راوەستن، بسەکنن محەقەق دێ رۆژەکێ سەرکەتن ببە پارا وان ژی.

ئەزێ ڤێ نڤیسا خوە ژی ب میناکەکێ بقەدینم و دڤێت ھەر کەسێن کو دبێژن ئەز یان ئەم ل سەر رێبازێنە، دڤێت ڤێ رێبازێ باش فێر ببن دا کو تشتێن وێ پێک بینن.

د سەردەما شێخ ئەحمەد بارزانی دە کو ھێژ بارزانیێ نەمر وەکە شاگرتەکی وی یە. وەکە تێ زانین بارزانی ھەمی ل دەڤەرا بارزان دژیان و دژین. ژ بەر کو بارزان جھێ سەرھلدان و بەرخوەدانا کوردان یا تەکۆشینا ل دژی داگیرکەرانە. بارزان سیوانەکە کو ھەمی دلسۆزێن گەلێ خوە د بن وێ دە، یەکیتیا وان پێک ئانینە.

رۆژەکێ بارزانی نەمر پێدڤی هنەک پاران دبە. ژ بۆنا وێ ژی دچە جەم جامێرەکی و داخوازا وێ یەکێ دکە کو ھندەک پارەیان ب قەرز بدە وی. جامێر ژی داخوازا وی ئەرێ دکە و دبێژە:

-سەر چاڤان. تو چقاسی بخوازی ئەز دکارم ب قەرز بدم تە. لێ گەلۆ تو دێ ڤی پارەی چ دەمێ ل من ڤەگەرینی؟ بارزانیێ نەمر ژی دبێژە:

-تو مەھەکێ وەختی بدە، ئەز دێ پارەێن تە ل تە ڤەگەرینم. بەری کو دەما بارزانی قەرزێ خوە بدە ب چەند رۆژا دچیتە جەم کەسێ کو پارە ژێ قەرز کربوون و دبێژە:

-من سۆز دابوو کو دڤێت من پارێن تە ل تە ڤەگەراندبان. لێ رەوش پیچەکێ خەرابە. گەلۆ تو دکاری دو ھەفتەیێن دن ژی وەختێ بدەی من:

خوەدیێ پارەیان دبێژە نا و ئەز دێ چم جەم شێخ ئەحمەد گلیێ تە بکم کو تو قەرزێ خوە د وەختی دە نادەی. رۆژەکێ دەما بارزانیێ نەمر بەرب مالدە دچە، دبینە کو خوەدیێ پارەیێن کو وی ژێ قەرز کربوو، دەما چاڤ ل بارزانیێ نەمر دکەڤە، تزبیا خوە د ناڤا دەستێن خوە دە ھلددە و دفیکینە. بارزانی یەک سەر فێم دکە کو تشتەک د ڤێ دە ھەیە. لۆما ژێ رە دبێژە:

-خێرە، ئەڤ کێف ژ بەر چ تێ؟ جامێر تەنێ دبێژە:

-شێخ ئەحمەد ل بەندا تەیە. ھەرە با وی بلا ئەو ژ تە رە بێژە؟

پشتی کو نەمر بارزانی دچە با شێخ ئەحمەد فێم دکە کو خوەدیێ پارەیان ھاتیە با وی و گلیێ نەمر بارزانی کرییە کو ئەو دێ د وەختی دە پەرێن قەرز کربوو لێ ڤەنەگەرینە. لێ شێخ ئەحمەد پارەیێن جامێری دابوونێ و شێخ ئەحمەد ژ بارزانی رە دبێژە:

-بنێرە بارزانیێ ھێژا، دەما مرۆڤ سۆزەک دا دڤێت مرۆڤ وێ پێک بینە. تە ئەڤە نەکر و تشتێن وەھا قیمەت و روومەتا مرۆڤی دخە کو مرۆڤ نکارە پێشکێشیا گەلێ خوە و خەلکێ خوە بکە. من پارەیێن جامێری دانێ.

پشتی ڤێ بوویەرێ، گرینگیا سۆزێ تێ فێم کرن کو سۆز داین د سەر ھەر تشتەکی رەیە. سەرۆک، رێبەر و پێشەڤانێن گەل دڤێت د سۆزێن خوە دە راستەقینە بن. ئەو کەس و کەسایەتیێن کو د سۆزێن خوە دە نە خوەدی ھەلوەستەک باش بن، کەسێن دن ژی دێ ب وان باوەریێ نەینن.

ژ بەر ڤێیە کو نەمر بارزانی ئەڤە کریە خالەکا گرینگ یا رێبازێ. سۆزێن بەرپرسان عەینک و نەینکا وانە. سیاسەتمەدارێن نە خوەدی سۆزا خوە بن، چ جاران نکارن ب سەرکەڤن. ئاھا د ڤردە ئەم دبینن کو بارزانی ب قەرار و ب ئیستیقرار خوەدی سۆزا خوە نە و بوون،  لۆما ئەم کورد ئیرۆ کرنە خوەدی پەرچەکا کوردستانا ئازاد.

تێبنی: ژ بەر موناسەبەتا سەرێ سالێ و بێھنڤەدانێ، ئەز ژی ھەتا 6/1/2024 بێھنا خوە بدم. پشتی وێ نڤیسێن ل سەر رێبازا پیرۆز دێ ھەر بەردەوام بن. سالا نوو ل گەلێ خوە، ل پێشمێرگەیێن قەھرەمان و کەسێن خوەدیێ رێبازا پیرۆزن، پیرۆز دکم.