ل ترکیێ دەما جەنازەیێ لەشکەرەکی تێ، ئالیێن سیاسی دکنە بابەتێ پرۆپاگاندەیا سیاسی. ب رۆژا مەدیایا ترکی ل سەر بوویەرێ دسەکنە، بەرنامەیێن تایبەت چێدکن و ھەستێن نژادپەرەستی بەلاڤ دکن و ھەولددن دژمناتیا کوردا بێخن مەژیێ ھەر ھەموەلاتیەکی ترک دە. واتە د راستیا خوە دە ئەگەر فەیدەیەکا ڤی شەری ھەبە ترک فەیدێ ژێ دبنن و کورد خوسارەک مەزن دبینن.
پرسەک دن ھەیە، گەلۆ پەکەکە شەرێ دژێ دەولەتا (!) ترک ژ بۆ چ ل باشوورێ کوردستانێ دکە و ل باکورێ کوردستانێ ڤی شەری ناکە؟ ئەڤ یەک بەلکی نهێنیا ھەری مەزنە کو د تێگەهشتنا واتەیا ڤی شەری دە ڤەشارتیە.
پەکەکە شەری گور دکە، لێ “DEM” دۆزا ئاشتیێ دکە. ئەڤ یەک نە ناکۆکیەک ھەری مەزنە؟ بلا کەس ھەولنەدە سیاسەتا کو ئیرۆ یا “دەم” و پەکەکێ ژ ھەڤ جودا بکە. ئەگەر ھندەک جارا دەم گاڤا باڤێژە کو، مرۆڤ ئەرێنی بنرخینە ژی، نە جھێ باوەریێیە، بەلکو سیاسەتا تەکتیکی یا پەکەکێ یە.
ل ترکیێ و باکورێ کوردستانێ، پەکەکە و ھەموو رێخستن و پارتیێن گرێدایێ پەکەکێ، د مژ و مۆرانێ دە، د ئاڤێن شێلۆ دە سیاسەتێ دکن. ئەگەر ئارامییەک ھەبە، خەلک دەنگێ شەر و چالاکیێن چەکداری نەکە و د ناڤا ئارامیەکی دە جڤاک ل سەر پرسگرێکێن جڤاکی و سیاسی گۆتوبێژان بکە، رەوشا پەکەکێ و دەردۆرا وان تێک دچە. ئەو ناخوازن ئینسان ب ئاوایەک رێکوپێک بفکرن. ژیانا وان یا سیاسی ل سەر پرۆپاگاندەیێن دەرەو و سەختەکاریان ھاتیە ئاڤاکرن.
ئەڤ شەرێ کو د ڤێ پێڤاژۆیا ھلبژارتنێن ھەرێمی دە تێ کرن، ژ مەترسیا وندا کرنا دەنگێن پەکەکێ ل باکورێ کوردستانێ نە. پەکەکە تەنێ ب شەر و چالاکیێن چەکداری ھەول ددە ترسەکی بێخە ناڤا جڤاکێ دە.
ل ڤێ دەرێ پرسا بنگەھین دەردکەڤە ھۆلێ. گەلۆ پەکەکە خزمەتا کی و ژ بۆ چ دکە؟
ئیرۆ تەنێ ل باشوورێ کوردستانێ دەستکەفتیێن ھەیی ھێڤیەکە کو بەر ب دەولەتبوونێ ڤە ھەرە. سەدەما کو ئەڤ شەرە ل باشوورێ کوردستانێ روو ددە ب تەنێ ھەولا ئاستەنگکرنا دەولەتبوونا کوردایە.
