ل ترکیێ پرانیا کەسایەتیێن کو خوە وەک مرۆڤێن پێشڤەروو، دەمۆکرات ددن ناسنادن و د جڤاتێ دە ب ڤی ئاوایی تینە قەبوول کرن، رۆژانە د بەرنامەیێن تەلەڤزیۆنا دە، بەحسا سکۆلاریزمێ دکن، بەحسا جڤاتەک دەمۆکراتیک و پێشڤەروو، بەحسا ئازادیا رامانی و مافێ مرۆڤان دکن. واتە دەما مرۆڤ گوھ ددە وان دلێ مرۆڤی ڤەدبە و کەیفخوەشییەک د کەسایەتیا مرۆڤی دە پەیدا دبە. ھەتا جارێ دلسۆزیەک بۆ وان چێدبە.
گەلەک کەسایەتی، رەوشەنبیر، ئەکادمسیەن و سیاسەتمەدارێن ترک ب ڤی ئاوایی ھەنە و د جڤاتێ دە ژ بۆ ڤان بیر و باوەریێن کو دبێژن ژی وەک کەسایەتیەک زانا، مۆدێرن و دەمۆکرات رێزگرتنەکی تایبەت دبینن.
وەک گەلەک وەلاتان ل ترکیێ ژی گرۆپێن جودایێن خوەدی بیر باوەرێن چەپاتیێ ھەنە، پارتیێن وەک پارتیا کۆمونیستا ترکیێ و گەلەک پارتیێن دن ب ناڤێن جودا یێن چەپان د قادا سیاسی دە ھاتنە ئاڤاکرن. ئەو ژی وەک گەلەک کەسان بەحسا دەمۆکراسی و وەکھەڤییێ دکن، بەحسا ژیانەک ئازاد د وەلاتەک وەک ترکیێ دە دکن، دبێژن کو دڤێت کەسەک ژ بۆ فکرا خوە نەیێ گرتن و دارزاندن.
ل ترکیێ رێخستنێن ئیسلامی ھەنە، بەحسا ئومەتێ دکن، بەحسا وەکھەڤی و براتیێ دکن، بەحسا دادوەری و عەدالەتێ دکن. ب دەنگەک بلند دبێژن “ئەم مسلمان برایێ ھەڤن” ب ناڤێ مسلمانەتیێ پشتگیرییا مسلمانا ل فلستینێ و دەڤەرێن دن یێن جیھانێ دکن.
ھەروەھا ل ترکیێ نژادپەرەست ھەنە، پارتیێن ل سەر بیر و باوەریێن قەومی ئاڤاکرنە. ئەو ڤەکری ژ بلی ترکا ل ترکیێ ئینکارا ھەرکەسەکی دن دکن، ڤەکری دبێژن کورد تونەنە و دژمناتیا کوردا دکن و وەک نوونەرێن نژادپەرەستێن ترکا تێنە ناساندن.
کێشەیا کوردێن ل باکورێ کوردستانێ یا ھەری مەزن، ئەوە کو، پرانیا ئالیێن سیاسی ڤان جورەیێن سیاسەتمەدار و رێخستنێن کو ل ژۆر بەحسا وان ھاتی کرن ژ خوە رە وەک میناک دبینن و ڤێرژنێن وان ل کوردستانێ ئاڤادکن. واتە د ئەسلێ خوە دە دخوەیە کو پرانی د سیاسەتا ئالیێن ل باکورێ کوردستانێ رێخستن و پارتیێن ترکا ژ بۆ خوە وەک رۆل مۆدەلەکی دبینن. ژ خوە مالخرابیا کوردا یا مەزن ئەڤەیە.
ئەڤ ئالیێن ترکا یێن کو بەحسا وان ھاتیە کرن، ھەموو کێم زێدە د پراسا کورد و کوردستانێ دە وەک ھەڤ دفکرن و دەما بەحسا کوردستانێ و مافێ رەوایێ کوردا تێ کرن ھەموو دبن یەک و کین و نەفرەتا خوە ل ھمبەر داخوازیێن کوردستانی دڤەرشن.
گەلەک جاران د بەرنامەیێن تەلەڤیزیۆنی دە، دەما گۆتوبێژەکی دکن، دەنگێ خوە لھەڤ بلند دکن، ھەڤدو ب تشتێن خراب ئیتھام دکن، رادبن ھەڤ و گەلەک جارا ل ھمبەر ھەڤ توندوتیژیێ ژی ب کار تینن، تشتا نەمایی تینن سەرێ ھەڤ. لێ دەما بەحس تێ سەر کوردا ب جارەکی دبن یەک، ل روویێ ھەڤدو دکەنن ،بەحسا راستیا گۆتنن ھەڤ د دەربارێ پرسا کورد دە دکن. واتە تشتا کو وان دگھینە ھەڤ دژمناتیا کوردایە. ھا ھندەک ژی جارێ وەسفا کوردا ددن. لێ وەسفا کوردێن وەک خوە لێ کرن ددن.
دەمۆکراتبوون، پێشڤەروویی، مسلمانبوون و چەپاتیا ترکا ئەڤەیە. ڤێجا کی چ ناڤی ل ڤێ بکە کەیفا خوەیە. دەما مرۆڤ دبێژە ل باکورێ کوردستانێ زمانێ کوردی وندا دبە، ھەستێن نەتەوی ئالۆزن، ئەڤ یەک سەدەمێ بنگەھینە.
گەرەک کورد ژ بەری ھەر تشتەکی، ل بیر و باوریێن کوردستانی خوەدی دەرکەڤن، ئەڤ خوەدی دەرکەتن، ل خوەدی دەرکەتنا، ئاخا کوردستانێ، دیرۆکا کوردستانێ، نرخ و دەرباسبوونا جڤاتا کوردیە، پاراستنا مافێن رەوا یێن گەلێ کوردستانێ یە، خوەدی لێ دەرکەتنا ناسنامە و زمانێ کوردایە، خوەدی لێ دەرکەتنا ئالا و سەمبۆلێن کوردایە و پاراستنا جورەکی ژ جورەیێن دەولەتبوونا کوردایە.
نابە ھەر جارێ مرۆڤ گازندا ژ ترکا بکە، دڤێت ئەم بەرێ خوە بدن خوە و خوە ناسبکن، بزانبن گەلۆ ئەم کینە و چ دکن. دڤێت ئەو کەس و ئالیێن ب ناڤێ کوردا تەڤدگەرن ب پیڤانێن کوردستانیبوونێ بێنە نرخاندن. گەلۆ راستی خزمەتا ملەتێ خوە دکن یان ھەولددن، جڤاتا کورد ژ ھەموو نرخێن کوردایەتیێ بشوون و د ناڤا ترکیێ و جڤاتا ترک دە ئاسمیلە بکن، دڤێت کورد ب خوە ڤێ یەکێ ببینن و ببن خوەدی ھەلوەست.
پێوەندی و دانوستاندن ل گەل ئالیێن ترکان دە نە خەلەتە. دڤێت پێوەندی ھەبن، دەما پێوست ھەڤکاری بێنە کرن، لێ د ڤێ چارچۆڤەیێ دە مافێن کوردا بنگەھ بهێنە گرتن و ھەر گاڤا کو مرۆڤ باڤێژە د بەرژەوەندیا دەستخستنا مافێن نەتەوی دە بە.
رۆژەڤاکورد
