رۆژئاڤا د بن ئاگرێ دەولەتا ترک دە دشەوتە، پەکەکە ژی ب دارێ زۆرێ گەل دەردخینە کۆلانان، دخوازە گەل وێنەیێن ئۆجالان بھەژینە و درووشمەیان بقیرە. راگەھاندنا پەکەکێ یا رۆژئاڤا ھاوار نیوس ب سەرناڤێ “گەل پشتگری ددە گەریلا و چالاکیان وان” ب ڤی شێوازی ئێریشێن دەولەتا ترکێن ل سەر گەل رەوا دکە.
رۆژئاڤا دو جاران د بن بۆردوومانا دژوار یا دەولەتا ترک دە ما.
رۆژئاڤا ڤێ پاییزێ دو جاران راستی بۆردوومانێن دژوار ھات.یا یەکەم د دەستپێکا جۆتمەھێ دە پێکھات. ل ھەمبەری ئێریشا خوەکوژی یا پەکەکێ یا ل ئەنقەرەیێ، ل رۆژئاڤا ب دەھان بنکەیێن ئابۆری و ئەنەرژیێ ھاتن بۆردوومان کرن. نھا ژی رێڤەبەریا رۆژئاڤا راگھاند کو دەولەتا ترک ژ 25 کانوونێ و ڤر ڤە ل 72 بنکەیێن ژییانا جڤاکی خستیە. دەولەتا ترک سانترالێن ئەنەرژیێ، کارگەھ و بنکەیێن ئابۆری یێن جڤاکی دکە ئارمانج. گەل د ناڤا ترسەکە مەزن دەیە و ژ بلی پرسگرێکێن ئەولەهی، ئابۆری، بێ کارەبایی و سۆتەمەنییا بھا گران گەلێ رۆژئاڤا راستی نەخوەشیێن دەروونی تێ. ئێریشا دەولەتا ترک یا ب ھنجەتا پەکەکێ یا ل سەر گەل، ستاتوویا رۆژئاڤا ژی دخە بن مەترسییێ.
دەولەتا ترک ئێریشێن ل سەر رۆژئاڤا ب کریارێن تەرۆریستی یێن پەکەکێ ڤە گرێ ددە و ئەڤ ئێرشێن ترکان ژ ئالیێ جیھانێ ڤە ئاسایی تێ قەبوولکرن.
د بن ئێرشێن دەولەتا ترک دە، ھاوار نیوس، لگەل خەلکی دا ھەڤپەیڤینا چێدکە و دخوازە خەلک پشتگرییا خوە بۆ چالاکییێن گەریلا راگەھینن. ب ئیحتمالەکە مەزن کەسێن کو دئاخڤن ئەو کەسن یێن کو بەرێ د ناڤا کۆمیتەیێن پەکەکێ دە جھ گرتنە. لۆما ژی ھەر تشتێ کو نووچەگھان ژ وان بخوازە ئەو دێ وێ گۆتنێ ببێژن.
لێ یا کو دڤێت رۆژئاڤا بکە ئەوە کو ژ رایا گشتی یا جیھانێ رە راگھینە کو ئەو تەڤگەرەکا گەل یا رەوا نە. لێ پەکەکە رۆژئاڤا ژ بۆ خوە وەک جھەکی ستراتەژیک و گرینگ دبنە. فەرمیبوونا ستاتوویا رۆژئاڤا ژ بۆ بەرژەوەندیێن پارتییا خوە مەترسیدار دبینە. مخابن ھەموو باجا شەرێ پەکەکێ خەلکێ رۆژئاڤا ددە. چالاکییێن پەکەکێ زرارەک مەزن دگھینن رۆژئاڤا.
