بووبێ ئەسەر
من ب قاسی زانین و تێگهشتنا خوە و ژ بۆنا فێم کرن و ناسینا رێبازا پیرۆز، ھنەکی ل سەر نڤیسی بوو. ھەلبەت نڤیساندنا رێبازێ و شرۆڤەکرنا وێ نە کارێ شەخسانە. ژ بۆنا وێ ژی دڤێت ژ کەسێن پسپۆر کۆمیتەیەک بێ دامەزراندن دا کو ب ھەڤرە و ب ئاوایەکی بەرفرەھ ڤێ رێبازا پیرۆز ژ گەلێ کورد و جیھانێ رە بدن نڤیساندن و زانین.
زانین و ناسینا ڤێ رێبازا پیرۆز ھم دکارە تەڤاھیا کوردستانێ رزگار بکە، ھم ژی ئەڤ رێبازە دکارە ژ بۆنا گەلەک وەلاتێن ھاتنە داگیرکرن ببە سەدەما ڤەکرنا رێیەکێ ل بەر بەرخوەدان و سەرھلدانێن وان ژی. لۆما ئەز دبێژم؛ پێویستە ئەڤ رێبازە ب ئاوایەکی بەرفرەھ ژ تەرەف پسپۆر و فەلسەفەزانان ڤە بێ نڤیسێن وەکە پرتووک بێ چاپکرن و ل دبستانێن کوردستانێ وەکە دەرس بێ خوەندن. ئەز ژی وەکە رەوشەنبیرەکی گەلێ خوە، نھا ب ڤی کاری ڤە مژوولم و ھێڤیدارم ئەزێ ڤێ رێبازێ وەکە پرتووکەکێ پێشکێشی گەلێ خوە، خوەندەڤانێن خوە و خوەدیێ ڤێ رێبازا پیرۆز بکم.
رێباز ئانگۆ فەلسەفە ئەوە کو ملەتێ بندەست ب رێیا وێ بکاربن زینجیرێن بندەستیێ بقەتینن و ملەتێن خوەدی وەلاتێن سەربخوە ژی بکاربن ل گۆر وێ خوە ب پێشڤە ببن و دەمۆکراسیێ ل وەلاتێ خوە ب جھ بکن. ژ بەر ڤێ ئەز د وێ باوەریێ دە مە کو دەما ئەم کورد ژی ب ئاوایەکی بەرفرەھ خوەدی ل ڤێ رێبازا پیرۆز دەرکەتن، ئەم دێ خوە بگهێژینن ئارمانجا کوردان یا کوردستانا مەزن.
ئەزێ ئێدی ھەول بدم کو کوردان ب سایا ڤێ رێبازێ چ ب دەست خستنە و ل سەر چ ئەساسان ئەڤ رێبازە بوویە ھێز و قاوەت کو کورد بکاربن ل ھەمبەر چار داگیرکەران شەرێ ئازادی و سەرخوەبوونا گەلێ خوە بدن. خوەدیێ ڤێ رێبازێ ئانگۆ دامەزرینەرێ ڤێ، ئەڤە سەد سالن کو تەکۆشینا گەلێ خوە چاوا دانە و ددن، ئەم ب ھەڤرە فێر ببن.
پشتی سەد سالان ژ بۆنا مە کوردان پەرچەک ئەردێ ئازاد ب دەست خستیە و ژ بۆنا پەرچێن دن ژی د ناڤا لێ گەرینێ دەیە کو دێ چاوا ور ژی بگهێژینن ئازادیا وان، بێ وەستان کار و خەبات تێنە کرن، ب ھەڤرە ببینن…
لۆما گرینگ و فەرزە کو دڤێت کورد ڤێ رێبازێ ژ بۆنا ئازادیا گەلێ کورد کو ئەڤ سەد سالن د ناڤا تەکۆشینێ دەیە، باش فێر ببن و ل گۆر وێ تەڤبگەرن دا کو بکاربن وەلاتێ خوە بگهینە ئازادیا وی. ملەتەکی بێ رێباز چقاسی خورت و وێرەک ژی بە نکارە وەلاتێ خوە ئازاد بکە. گرینگە کو بارزانیان ئەم ژی کرن خوەدی رێبازەکێ کو ئەم ب سایا وێ وەلاتێ خوە کوردستانا پەرچەکری، بکن یەک. ئازادی و دەمۆکراسیێ ژ گەلێ کورد رە بینە.
ئەم باش دزانن کو ب گولەکێ نابە بھار. لێ دیسا تێ زانین کو ڤەکربوونا گولەکێ مزگینیا بھارێ یە. ئەرێ ئیرۆ ئەم ل باشوورێ کوردستانێ خوەدی ئازادیەکێ نە. لێ یا د دلێ رێبازێ و داخوازا وێ کوردستانا مەزنە. ژ بەر کو د رێبازێ دە ئازادی و سەرخوەبوونا کوردستانا مەزن ھەیە. ژ بەر ڤێیە شۆپێن رێبازێ ل ھەر چار پەرچان تێ دیتن…
لێ ھەگەر کورد ژی ل گۆر وێ و ل سەر ئەساسێ ڤێ رێبازێ خوەدی ل پەرچێ ئازاد دەرکەڤن، دێ سبێ ب سەرپەرەشتیا پێشمێرگەیێن قەھرەمان، ب ئەساس و بیرەوریا ڤێ رێبازێ پەرچێن دن ژی بگهن ئازادی و سەرخوەبوونا خوە. تێ زانین کو فەدەرالیا باشوورێ کوردستانێ، ھەبوونەکە ژ بۆنا ھەمی کوردان. ئەم دزانین کو کوردستان نەبوویە سەربخوە. لێ ھەبوونا ور ب مە کوردان ددە زانین کو پاراستن و خورتبوونا ور، ئازادی و سەرخوەبوونا پەرچێن دنە ژی.
نھا ژ بۆنا مە کوردان، گولەکێ سەرێ خوە ژ بن ئاخا کوردستانێ دە ھلدایە و ئەڤ سینیال ئانگۆ ئیشارەتا، ئازادیا پەرچێن دن ژی ددە مە. ژ بەر ڤێیە کو دڤێت بەرێ کورد ڤێ رێبازێ ناس بکن. ژ بۆنا ئازادیا کوردستانەکە مەزن خال ب خال وێ د ژیانێ دە پێک بینن.
ھەر ملەت و خەلک خوەدیێ خوە و رێبازەکێ نە. ژ بەر کو ھاتیە ئیسپاتکرن کو بێ رێباز وەلاتێن کۆلۆنی وەکە کوردستانێ، زەحمەتە کو خوە ئازاد بکە. مادەم رەوش ئەڤە، دڤێت ئەم ژی رێبازا خوە ئانگۆ فەلسەفەیا خوە فێر ببن کو خەیالا کوردستانا مەزن پێک بینن.
ئەزێ د نڤیسێن پێشدە یەک ب یەک ل سەر مفایێ ڤێ رێبازێ کو گھشتیە کوردان و ل سەر چ ئاساسی پێک ھاتیە ژ بۆنا وە ڤەبێژم. ڤەبێژم دا کو ئەم ببینن، بێ ڤێ رێبازێ ل پەرچێن دن چ شۆرەش پێک ئانییە، ب ھەڤرە بخوینن…
