بووبێ ئەسەر
ئەز دێ د ڤێ نڤیسێ دە و د نڤیسێن پێشدە ل سەر کوردستانیبوونا رێبازێ راوەستم. ژ بەر چ، چما و چاوا ئەڤ رێباز کوردستانییە. ژ بەر گرینگی و ھێژابوونا ڤێ رێبازێ ئەوە کو شۆپێن وێ پر ڤەکری و ئەشکەرەیی ل پەرچێن دن ژی تێ دیتن. ئەڤ ژی ب مە ددە زانین کو ئەڤ رێباز نە ژ بۆنا پەرچەکی بەلکو ژ بۆنا ھەرێمەکێ یە. ژ بۆنا ئازادی و سەرخوەبوونا کوردستانا مەزنە.
لۆما ئەزێ ئێدی ڤێ رێبازا پیرۆز ل کیژان پەرچێ کوردستانێ چ کرییە، چ شۆرەش پێک ئانییە ڤەکم. ڤەکم دا کو بێ زانین کو ژ بۆنا ئازادیا کیژان پەرچی چ بەدل، خەبات و زەحمەتی دایە و پێک ئانییە ژ بۆنا وێ ھێژایان بنڤیسینم. بنڤیسینم دا کو ھوون و ئەم وەکە ملەتێ کورد ب تەڤایی ڤێ رێبازێ ئانکو فەلسەفەیا خوە ناس بکن. ب ناسینا وێ ئەمێ بکاربن خوە ژی باشتر ناس بکن.
ھەتا کو ئەم ڤێ رێبازێ باش ناس نەکن، ل سەر یەک ب یەک خالێن وێ رانەوەستن ئەم دێ نکاربن شەرێ ئازادی و سەرخوەبوونا کوردستانێ ژی ل سەر ئەساسی راستیێ، ب ھەلوەستەکە نەتەوەیی، ب باوەریەکە ژ خوە باوەر تەکۆشینا ئازادی و سەرخوەبوونا کوردستانێ بدن.
ئەز دێ د ڤێ نڤیسا خوە دە ھنەکێ ڤێ ژی ڤەکم. دەما ئەم ل دیرۆکا گەلێ خوە دنێرن، تێ دیتن کو د سەردەما دەولەتا ئالی عۆسمانی دە، (ئیمپەراتۆریا ئۆسمانی) ژ بەر زلم و نەحەقیێن ل کوردان دکرن، شێخ عەبدولسەلام بارزانی ل دژی ڤێ ھەلوەستا دەولەتا عۆسمانی دەرکەت کو مافێ کوردان یا د ناڤا ڤێ دەولەتێ دە ب ئاوایەکی کو حەقێ کوردان ھەبە و بکاربن کارێن خوە ب دەستێن خوە بکە، سەری ھلدا.
لێ مخابن ژ بەر خوەفرۆشێن کورد ب سەرنەکەت. ژ لایێ دەولەتێ و ب ئالیکاریا ھندەک سیخورێن وێ شێخ عەبدولسەلام تێ گرتن و وی ل مووسلێ دارڤە دکن. پشتی ڤێ ژی بارزانیان ب سەرپەرەشتیا نەمر شێخ ئەحمەد ل گەل بارزانیێ نەمر ل ھەمبەر دەستھلاتا ئیراقێ سەری ھلدان لێ ب سەرنەکەتن.
ژ بۆنا کورد ب تەمامی وەندا و تونە نەبن، بەرێ وان بەر ب رۆژھلاتا کوردستانێ ڤەکرن. ل ور دەما بارزانیان دیتن کو تەڤگەر و لڤەکا خەتا نەتەوەیی یا گەلێ کورد کو ل ھەمبەر دەستھلاتا ئیرانی سەری ھلدانە، بارزانیان بێ کو بفکرن، ب ھەمی ھێز و قاوەتێن خوە ئالیکاری دانە ور. مل ب مل، ل گەل برایێن خوە کوردێن رۆژھلات تەکۆشینا ئازادی و سەرخوەبوونا کوردستانێ کو ب سەرپەرەشتیا پەدەکێ و سەرۆکێ وێ قازی دەستپێ کرن.
د شەرێ سەرخوەبوونا رۆژھلاتا کوردستانێ دە نەمر بارزانی بوو یەکەم جەنەرالێ کورد. ئەڤ ژی ب مە ددە زانین کو د دەستپێکا شەرێ بارزانیان یێ ل ھەمبەر داگیرکەران، ل سەر خەتا نەتەوەیی ھاتبوو دایین و ئەڤ ھێ ژی وەھا ددۆمە. بارزانیێ نەمر، ژ بەر خەبات و تەڤگەرێن کو پشتگریا برایێ خوە کربوو خەلاتا جەنارالیێ وەرگرت.
ئەم ل ڤر دبینن کو ئەڤ رێباز، رێبازەکا گەلێ کوردە کو ب سایا وێ کورد دکارە خوە بگهینن کوردسانا مەزن. ژ خوە ئارمانج و ھەدەفا ڤێ رێبازێ ژی ئەڤە. لۆما من گرینگ دیت کو ڤێ رێبازا پیرۆز ژ دەستپێکێ دە و ھەتا نھا چاوا و ب ئالیکاریا برایێن خوە یێن پەرچێن دن ڤە رابوو بێژم و بنڤیسینم. بنڤیسینم دا کو بێ فێم کرن، ژ بەر چ ئەم ڤێ رێبازێ وەکە یا گەلێ کورد دزانین و ناس دکن.
لێ دەما ب سایا ھن دەولەتێن مەزن کو ب ئالیکاری و پشتگریا ئیرانێ ڤە رابوون، کۆمارا کوردستانێ ل مەھابادێ قەدەرێ سالەکێ ژیانا خوە دۆماند و تێک چوو ئانکو تێک برن. پشتی تێکچوونا کۆمارا کوردستانێ ل مەھابادێ بارزانیێ مەزن فێم کر کو ھەگەر ئەو و پێشمێرگەیێن خوە، خوە ژ بەر غەزەبا دەستھلاتا فارسان ناپارێزن ھم ئەو ھم ژی وێ خەیالا کوردستانەکە ئازاد و سەربخوە ژی تێک ھەرە.
ژ بۆنا کورد ب تەمامی وەندا نەکن و دەرفەت چێ ببە کو جارەکە دن شەرێ ھەبوون و نەمانا کوردستانێ بدن، دەمەکە درێژ ل سۆڤیەتێ دمینن. ژ خوە چیرۆکا بارزانیانیان دەما کو ل سۆڤیەتێ بوون، چ دیتن و ھاتنە سەرێ وان، ب سەرێ خوە رۆمانەکە. لێ مژارا مە نە ئەڤە.
دەما کو بارزانی ژ سۆڤیەتێ ڤەگەریان وەکە گەلەک جاران دیسا دەستھلاتا ئیراقێ سۆزا دابووی بارزانیان پێک نەئانین. لۆما ژی کورد ناچار مان کو ل ھەمبەر زلم و زۆرداریا ئیراقێ شەرێ ھەبوون و نەبوونا گەلێ خوە بدن.
ژ بەر ڤێ بوو کو شۆرەشا ئیلۆنا د سالا 1961 دە ب سەرپەرەشتیا پارتیا دەمۆکراتا کوردستانێ و سەرۆکاتیا بارزانیێ نەمر و ھێزا پێشمێرگەیێن قەھرەمان، ھاتە دەستپێکرن.
د نڤیسا بێ دە ئەز دێ ل سەر شۆرەشا ئیلۆنا مەزن، ھێژایی و ئارمانجا وێ راوەستم کا رێبازێ د ڤر دە ئەرکێ خوە یێ نیشتیمانی چاوا ئانی جھ.
گرینگ و پێویستە ئەم ڤێ رێبازا پیرۆز ناس بکن. ھەر وەھا دڤێت ئەم کرن و پێکانینێن وێ ئانکو شۆرەشێن وێ یێن ل ھەر چار پەرچان ژی باش ناس بکن دا کو ئەم بزانبن ئەڤ رێبازە ژ بۆنا ئازادی و سەرخوەبوونا ھەرچار پەرچێن کوردستانێ ھاتیە دانین…
