د په‌كه‌كێ ده ستراته‌ژییا دژمنكاریێ ژ كو هاتیه؟
دژمنكاری كۆنسه‌پته‌كه تێ بكارئانین دەما کو کەسەک ئان ئالیەک هێزەک نەقانوونی، نەمرۆڤی و نەهەق ل دژی کەسەک ئان پارتیەک ئان نەتەوەیەکێ بکار بینە، هنگێ خوەدیێ کارئانینا وێ هێزێ دبە دژمنێ ئالیێ بێ هێز و بێ ده‌ستهلات.
هەگەر کەسەک کو د وارێ ئەردنیگاری، دیرۆک، جڤاک و تەڤگەرا سیاسی دە هایا وی ژ نەتەوەیا کورد تونە بە، پرتووک، مەدیا و هەڤپەیڤینێن پارتیا کارکەران بخوینە، گوهداری بکە و ببینە، دێ بگهێژە وێ قەناعەتێ کو هەموو سیاسەتمەدار، پارتیێن سیاسی و هزرمه‌ند و رەوشەنبیرێن کورد یێن کو وه‌كه فكر نه ب پارتیا كاركه‌ران ره نه، دكه‌ڤن د خانه‌یا ئیخانه‌تێ ده و ب دژمنێن كوردان تێن حه‌ساب كرن و یێن كو به‌رخوه‌دانێ ژ بۆی گه‌لێ كورد دكن ته‌نێ ئه‌ون، هه‌ر وها ته‌نێ ئه‌ون پێشه‌نگییا شۆره‌شا كورد دكن، ب گۆتنه‌ك دن كوردایه‌تی تێ واتەیا په‌كه‌كه و سەرۆکاتیا تەڤگەرا کورد تێ واتەیا عه‌بدوللا ئۆجالان و فكر، هش و زانست تێ واتەیا سه‌رێ عه‌ڤده‌لی، وه‌كه كو جەمیل بایک د پرتووکا خوە یا ب ناڤێ «دیرۆكا پارتیا كاركه‌ران» ده گه‌له‌ك ب زه‌لالی راڤە کری.
ب خوەندن، دیتن و گوهداریکرنا چاپەمەنیا په‌كه‌كێ مرۆڤ تێ ڤێ قەناعەتێ کو د ناڤا کوردان دە تەنێ کەسەک هەیە كو سەری وی هه‌به، دفكره و رێنیشانده‌ره ئه‌و ژی عه‌بدوللا ئۆجالانه و گه‌لێ كورد ته‌ڤ بێ سه‌ره، نه‌زانه و فكر و هشێ وی تونه.
من هەول دا کو ببینم کا کۆنسەپتا فكری یا کو ئیرۆ چاپەمەنیا په‌كه‌كێ ژ بۆ تنەکرنا نەتەوەیا کورد ب کار تینە، ئانگۆ کۆنسەپتا «دژبەریا پارتیێن کوردێن یێن ل دەرڤەیی چەمبەرا په‌كه‌كێ خه‌باتێ دکن»، نوویە. یان دیرۆكه‌ك كه‌ڤنار هه‌یه، ژ به‌ر كو خوه‌یایه كو چاپەمەنیا په‌كه‌كێ رۆژەکێ ژی بێی دژایەتیا پارتیێن کوردستانی و حکوومەتا رەوا یا هەرێما کوردستانێ دەرباس ناکە، چ ب بەلاڤکرنا ئاگاهیێن بێبنگەهـ و چ ژی ب پرۆپاگاندایێن ژەهرین.
ئەز گهشتم وێ ئەنجامێ کو ئەڤ نەدیاردەیەکە نوویە کو ئەڤ پارتی ل سەر کار دکە، لێبه‌لێ ژ رۆژا دامەزراندنا ڤێ پارتیێ و هەتا نها ئەڤ یێك خەتا سەرەکە یا ڤێ پارتیێ یە و تێكۆشینا خوه ل سه‌ر ڤێ ئه‌ساسێ دمه‌شینه و ئەنجامێن باش ژێ بدەست خستیە. به‌لگه ژی ئه‌ڤه كو په‌كه‌كێ به‌شا هه‌ری مه‌زن ئا كوردان ل باكور كرن دژبه‌رێن پارتیێن كوردی ژ بلی پارتیا خوه.
د دەستپێکا سالێن 1980ی دە، داربەیەکە مه‌زن پێک هات، هەموو پارتیێن ئۆپۆزسیۆنێ وێران بوون و گەلەک ژ ئەندامێن وان پارتییان ب کورد وترک ڤه كه‌تن زیندانان و گه‌له‌كێن دن ژی ب قاچاخی ژ ترکیێ دەردکەتن و ب رێیا وەلاتێن جیران دەرباسی ئەورۆپایێ بوون، نەمازە د سووریێ رە.
بەری داربەیێ ب سالەکێ، عه‌بدوللا ئۆجالان دزانبوو کو دێ داربە چێببە، لەوما چوو سووریێ و راستەراست پشتگری دا هێزێن سیاسییێن فلستینێ و ب ئاگاهیا دەولەتا سووریێ کاریبوو ژ خوە رە جهەکی رێخستنی ئاڤا بکە.
دەما کو دەربە ب داوی بووی، ئۆجالان خوەست ژ ڤێ دەرفەتێ سوود وەربگرە و پرۆژەیا ب ناڤێ «پرۆژەیا ئاشتیێ» بوەشینە و تێ دە داخواز کر کو هەموو هێزێن سیاسی یێن ترکیێ ب هەموو ئیدەئۆلۆژیێن خوە ئه‌نیه‌كه هه‌ڤپار پێكبینن. مژارا مه جارێ نه ئه‌ڤ ئه‌نیا هه‌ڤپاره، به‌لكو ل رۆژێن پێش مه ئه‌مێ ل سه‌ر بئاخڤین. لێ تشتێ کو ئەز دخوازم د ڤێ گۆتارێ دە بێژم ئەوە کو دەما ئەڤ داخویانی هاتی وەشاندن، کەسایەتیێ سیاسییێ کورد «کەمال بوركای» کو سەرۆکێ پارتیا سۆسیالیستا کورد ل باکور بوو، یەکسەر چوو سووریێ ژ بۆ كو دەربارێ ڤێ پرۆژەیێ ب عه‌بدوللا ئۆجالان ره بجڤه.
ب کورتی کەمال بوركای دبێژە، جارەکێ ئەز ژ بۆی جڤینێ ده‌ربارێ «پرۆژەیا ئاشتیێ» چووم جه‌م ئۆجالان، ل وێ ده‌مێ جەلال تالەبانی و چەند کەسێن دن ژی ل ور د ئامادە بوون، پشتی گۆتووبێژەکە درێژ من ژ عه‌بدوللا رە گۆت، بەری کو ئەڤ ئه‌نیه وەرە ئاڤاكرن، دڤێ تو داخویانیەکێ بدی و لێبۆرینێ و عه‌فۆیێ ژ هەموو هێزێن سیاسی یێن کوردستانی بخوازی، ژ بەر کو ئەڤ 10 سالن هوون و پارتیا وە تێدکۆشن کو مللەت ل دژی پارتیێن کوردستانی راببه، وە تۆڤێ نەفرەتێ د ناڤ گەل دە بەلاڤ کریه، واته دڤێ تو ڤێ چاره‌سه‌ر بكى و ژ نوو ڤه بهێی داخوازا ئاڤاكرنا ئه‌نیه‌كه هه‌ڤپار بكی.
ب كورتاسی تشتا کو ئەم نها د چاپه‌مه‌نییا په‌كه‌كێ دە دبینن، ئانگۆ كۆنسه‌پتا دژمناتی و ئێریشا ل سەر هێزێن سیاسی یێن کورد و حکوومەتا هەرێما کوردستانێ، نە کۆنسەپتەکە نوویە، لێ خەتەکە ستراتەژیکا په‌كه‌كێ ژ رۆژا دامه‌زراندنا خوه و هه‌یا رۆژا مه یا ئیرۆ ل سه‌ر برێڤه دچه و كرییه ستراته‌ژییا خوه.
