شەڤا بۆری سوپایێ پاسدارێن ئیرانێ ب دەھ مووشەکان ئێرشی 8 جھێن ھەولێرێ کر و ب سەدەما ڤێ ئێریشێ 4 کەس یەک ژێ زارۆکەک 11 مەهی بوون قوربانی. ڤێ ئێریشێ نەرازیبوونێن مەزن ل پەی خوە ئانین و د مەدیایا ناڤخوییی و جیهانی دە بوو مژارا هەری گرنگ و پێترین نیقاش ل سەر هاتن کرن و زێدەترین نووچە ل سەر هاتن چێکرن، لێ بەلێ وەکە کارێ خوە یێ هەر تم پەکەکێ ئەڤ ئێریش ژی ژ بۆی خوە وەک فەرسەند دیت و ل شوونا شەرمەزارکرنا ئەنجامدەرێن ڤێ ئێریشێ ب ئاوایەک پڕ بێ ئەخلاقانە ئێریشی سەر سەرۆک وەزیر مەسروور بارزانی کر.
پەکەکێ د چاپەمەنیا خوە دە کێمترین گرینگی ب ڤێ ئێریشێ دا و ت داخویانی ژی ژ بۆی شەرمەزارکرنا ئیرانێ نەدا، ل شوونا ڤەگوهاستنا زانیاریێن ل سەر ڤێ ئێریشێ و ئێریشا مەدیایی ل سەر دەولەتا داگیرکەر یا ئیرانێ، بەرەڤاژی ئێریشی سەر کاربەدەستێن حکوومەتا هەرێما کوردستان کر و د نووچەیا خوە یا د رۆژ نیوسێ دە وەها نڤیساند، “هەولێر د بن ئێریشێ دە ما و بارزانی ژی بەرێ خوە دا سویسرایێ”.
فەساد و بێبەختێن پەکەکێ یێن وەکە رۆژنامەگەر د رۆژ نیوسێ دە دخەبتن، د ڤێ نڤیسا خوە یا بێئەخالقانە دە ل شوونا دەولەتا دگیرکەر یا ئیرانێ شەرمەزار بکن، ئەڤ ئێریش ژی کر ئاموورەک دن ژ ئاموورێن خوە یێن ئێریشکرنە سەر مالباتا بارزانی، وان د نووچەیا خوە دە نڤیساند، “د دەمەکی دە کو هەولیر د بن ئێریشێ دە مایە، مەسروور بارزانی ژ بۆی زێدەکرنا پەرەیێن مالباتا خوە، بەرێ خوە دایە داڤۆسێ”! ب تەنێ ئەڤ رێزک ژ نڤیسا چاپەمەنیا پەکەکێ بەسە کو مرۆڤ زهنیەتا دژە کورد و مەژیکێ ژەنگ گرتی یێ پەکەکێ و دووڤەلانکێن وێ ناس بکە.
پەکەکە هەر تشتی ب فەرسەند دزانە ژ بۆی کو ئێریشی سەر بارزانیان، پەدەکێ و حکوومەتا هەرێما کوردستانێ بکە، ژ پەکەکێ رە ب ت ئاوا نە گرینگە چ قەومیە، خوینا چەند بێ گونەهان رژایە و خوینا چەند بێ گونەهێن دن وێ برژە، تشتا ل جەم پەکەکێ گرینگ ب تەنێ بەرژەوەندیێن وێ یێن شەخسی نە، لۆما د دەمەکی دە کو ل پایتەختا تاکە پەرچەیا کوردستانێ یا ئازاد خوین دحەرکە، زارۆکەک 11 مەهی ب دایک و بابێ خوە ڤە دبە قوربانی، دیسا پەکەکە ل بەندا وێ یەکێ یە کو دێ چەوا ژ ڤێ بوویەرێ قەزەنج بکە و ژ خوە رە هن دەستکەفتیێن بچووک ب دەست بخە و ئالیگرێن خوە پێ بخاپینە.
بەلێ، پەکەکە ب ئاوایەکی وسا بێ ئەخلاق تەڤدگەرە کو کارەساتێن ب سەر کوردان دە ژی تێن ژ خوە رە وەک فەرسەند بکارتینە و ئێریشی سەر نرخێن کوردان دکە.
هەرکەس ژ خەینی ئالیگرێن پەکەکێ یێن کو مەژیکێ وان ب دەرەوێن قرێژ یێن پەکەکێ هاتیە شۆشتن باش دزانە، سەرۆک و رێبەرێن تەڤ جیهانێ یێن کو نها ل داڤۆسێ نە ژ بۆی چ ل ورن، هەر کەس دزانە سەرۆکوەزیر مەسروور بارزانی د چارچۆڤەیا بەشداریا د کۆربەندا ئابۆری یا جیهانی یا داڤۆسێ دە، وێ ب هەژمارەک ژ سەرۆکوەزیر و بەرپرسێن پایەبلندێن رۆژهلاتا ناڤین، ئەورۆپا و جیهانێ بجڤە و د هەڤدیتنێن خوە دە، وێ چەندین مژارێن ناڤخوەیی، ناڤچەیی و جیهانی ژ وان ژی پێشخستنا پێوەندیێن دوئالی ب تایبەتی د وارێن ئابۆری و وەبەرهێنانێ دە گۆتووبێژ بکە، ئەڤ یەک ژی ب ئاوایەکی راستە راست دکەڤە خزمەتا هەرێما کوردستانێ دە، لێ بەلێ پەکەکە دخوازە ڤێ یەکێ ژی سەختە بکە، ژ بەر کو پەکەکە ناخوازە باشوور ت پێشکەتنەکی ب خوە ڤە ببینە، پەکەکە ژی مینا دەولەتێن داگیرکەرێن کوردستانێ پێشکەتنا باشوور ژ خوە رە وەک خەتەری دبینە.
د نووچەیا مەدیایا پەکەکێ دە دیار دبە، تشتا کو پەکەکێ دئێشینە نە ئێریشا ئیرانێ یا ل سەر هەولێرێ یە، بەلکو بەشداربوونا سەرۆکوەزیر مەسروور بارزانی و هەڤدیتنێن وی یێن ب بەرپرس و رایەدارێن ولاتێن زلهێز یێن جیهانی پەکەکێ دئێشینە، ژ بەر کو هەر پێنگاڤەکە ژ ئالیێ هەر کەسی ژ بۆی بهێزکرنا ستاتویا هەرێما کوردستانێ و خوەشکرنا ژیانا گەلێ باشوور بێ ئاڤێتن پەکەکە پێ دئێشە، هەر وەک چەوا دژمنێن گەلێ کورد ب پێنگاڤەکە ب ڤی ئاوا دئێشن.
