ژ بەرێ پێدە د ناڤا سیاسەتا کوردان دە، تشتەک گەلەک بالکێش ھەیە، پرانیا جاران بوویەرەک د ناڤا کوردان ب خوە دە رۆژان ھەتا مەھان و سالان تێ گۆتوبووژ کرن. پرانیا ئالیێن سیاسی گەلەکی گوھ نادن ڤان گۆتوبێژان. لێ پشتی دەمەک درێژ دەما رۆژنامەڤانەک بیانی یان ژی سیاسەتمەدارەک بیانی بەحسا ھەمان تشتێ بکە، ئەو د ناڤا ئالیێن سیاسی یێن کوردان دە دبە مانشێت و ب رۆژان د رۆژەڤێ دە دمینە. وەک کو چ جاران کەسەکی بەحسا ھەمان مژارێ نەکریە. ھەتا ھندەک ئالیێن سیاسی ھەولددن ڤێ یەکێ وەک پرۆپاگاندەیەکی ب کاربینن.
نھا ل کوردستانێ ھەر کەسەک ئالیەک و ئنسانەک نۆرمال رەوشا سەرۆکێ یەنەکێ بافل تالابانی دزانە چیە. ھەرکەس دزانە کو پێوەندیەک د ناڤبەرا تالەبانی و پەکەکێ دە ھەیە و ئەڤ یەک نە ڤەشارتیە. لێ چ حکمەت بە، پشتی وەزیرێ دەرڤە یێ ترکیێ بەحسا پێوەندیێن بافل تالابانی و پەکەکێ کری، وەک تشتەک نوویە د مەدیایێ دە جھ گرت و تایبەتی د مەدیا ترکان دە بوو جھێ گۆتوبێژان، بەرنامەیێن جور ب جور ل سەر ڤێ مژارێ ھاتن چێکرن.
نھا پرس چیە؟ گەرەک ئەم کورد ب خوە بەحسا برینێن خوە بکن و ژ بۆ ساخکرنا برینان ھەولبدن.
پەکەکە وەک پەنجەشێرێ د ناڤا لاشێ کوردستانێ دە بەلاڤ بوویە. ھەتا نھا هیچ پارتیەک یان ژی ئالیەک کورد تونەیە کو توشی ڤێ نەخوەشییێ نەبووی. لێ بەلکی ھندەکان خوە ب ئاوایەکی ژێ رزگار کریە و ھندەک ژی کەتن ئێشا گران و کا ب ڤێ نەخوەشییێ دمرن یان ژی خوە رزگار دکن نایێ زانین.
تێ زانین کو، پەکەکە، قەندیل د بن کۆنترۆلا ئیرانێ دەیە. پەکەکێ پێوەندیێن گەلەک بهێز لگەل ھێز شیعەیێن ئیراقێ ژی ھەنە و ئەڤە نە یا ڤەشارتیە. گرێدایی ڤێ یەکێ و بەلکی ژی ب سەدەما ھندەک پرسگرێکێن ناڤبەرا پەدەکێ و یەنەکێ دە بافل تالەبانی ب گەرمی پشتگریا پەکەکێ دکە. لێ د پێوەندیێن پەکەکێ و یەنەکێ دە، پەکەکێ یەنەکە کریە د بن باندۆرا خوە دە. ئەڤ یەک کەنگێ ب چ ئاوایی خوە ددە کەشفکرن نایێ زانین. لێ رۆژا کو ئەڤ یەک دەرکەڤە روویێ ئەردێ و یەنەکە بخوازە بەرخوە بدە کەس نزانە دێ چ بقەومە.
رۆژا پەکەکە ھاتیە دامەزراندن ھەتا ئیرۆ، ژ ئالیێ ھندەک سیاسەتمەدار و ھندک بە ژی ژ ئالیی سیاسەتڤانان ڤە بەحسا رەوشا پەکەکێ و ئارمانجێن وان یێن ل دژێ کوردستانێ تێنە کرن. لێ کەسەکی گەلەکی گوھ نەدا ڤێ یەکێ. ھەر ئالیێ سیاسی وەلێ زانی کو پەکەکێ ژ بۆ خوە ب کارتینن. لێ دیتن کو، پەکەکە فەیدەیەک مەزن ژ وان دبینە و ھەولدان راستیا خوە فام بکن.
گەلۆ نھا دەما وەزیرێ دەرڤەیێ ترکیێ بەحسا پێوەندیێن بافل تالابانی و پەکەکێ دکە چ تێ گوھەرتن؟ ھاکان فیدان بەحسا پێوەندیێن ھەردو ئالیان کر، لێ گەلەک ڤەکری بالا یەنەکێ ژی کشاند و دا خویاکرن کو، یەنەکە دکارە ببە ئارمانجا ئێریشێن وان ژی. نھا د ناڤا یەنەکێ دە ھندەک ئالی ژ ڤێ یەکێ عاجزن و گەلەک جارا بالا تالابانی ژی کشاندنە. لێ بافل گەلەک گوھ نادە دەردۆرا خوە. نە دوورە ئەگەر ئەڤ ھەلوەستا بافل بەردەوام بە، دێ ئەردنیگاریا د بن کۆنترا یەنەکێ دە ببە ئارمانجا ئێریشێن ترکیێ. دێ وێ دەمێ ب تەنێ کورد ڤێ یەکێ شەرمەزار بکن. وەک دن کەسەک نکارە تشتەکی بکە.
یەنەکە نھا، تایبەتی پشتی ئاخاڤتنا ھاکان فیدان د ناڤا ترسێ دەیە. ھەولددە ل گەل رایادارێن ترکیێ ھەڤدیتنا بکن. لێ فیدان دخوەیە ژ بەری نھا ل گەل قوبات و بافل تالەبانی ھەڤدیتن کرنە، و د ھەلوەستا یەنەکێ دە تشتەک نەھاتیە گوھەرتن.
بێ گومان ئەڤە بابەتەکی گەلەکی بەرفرەھە، د نڤیسەک ددویان دە نایێ ئیزاح کرن. لێ تەنێ ژ بۆ بالکێشاندنێ دەستپێکەکە.
ژ ئالیەک دن ڤە سیاسەتا یەنەکێ یا نێزکی ئیرانێ و نێزکی بەغدایێ ژی تێ زانین. نھا یەنەکە د چ چارچۆڤەیێ دە ڤێ مژارێ گۆتوبێژ دکە، ھێژان نە ئەشکەرەیە، بەلکی ژی چ گۆتبێژەکی ناکە، سەرگوھێ خوە رە تاڤێژە، نایێ زانین.
لێ تشتا کو یەنەکە بکە کەشفە، دڤێت دەست ژ ڤان فەن و فیتان بەردە. ژ بۆ یەکدەنگیا کوردان ئەرکێ خوە بینە جھ و د زمنێ حکوومەتا ھەرێما کوردستانێ و دەزگەھێن کوردستانی دە ژ بۆ یەکگرتنەک کوردستانی ھەولبدە و بەرێ خوە ژ بەغدایێ پێتر بدە ھەولێرێ و سیاسەتەک راستەقێنە رێڤە ببە. دێ وی دەمی رەوشا سیاسی ژی بێ گوھەرتن و کوردستان ژی ل ھمبەر ھەمی جورەیێن ئێریشان پێتر بێ پاراستن.
ھەری داوی؛ دڤێت کورد خوە ب خوە ناسبکن، ھەتا کو خوە ب خەلکەک بیانی ناسبکن، دێ نە خوەدیی بیر و باوەریێن خوە بن…..
رۆژەڤاکورد
