تركیه و ئیران دژمنێن كوردانه، په‌كه‌كه ژی ب قاسی وان
ژ ئێریشا مووشه‌كی یا ده‌وله‌تا ئیرانێ یا ل سه‌ر هه‌ولێرێ و ده‌ستپێكرنا خوه‌پێشاندانێن ل دژی كۆمارا ته‌رۆریست، په‌كه‌كه و مه‌دیایا وێ كه‌تنه ناڤا لڤ و ته‌ڤگه‌رێ و هه‌ولا بێگونه‌هـ كرنا ئیرانێ دكن، ب پرسێن مینا چما حكوومه‌تا هه‌رێما كوردستانێ ده‌ستوورێ ب خوه‌پێشاندانێن ل دژی ده‌وله‌ت ترك ناده؟ هه‌ولا گوهه‌رتنا رۆژه‌ڤێ و سپی كرنا روویێن ره‌ش یێن ئاغایێن خوه یێن ته‌هرانێ دكه.
گه‌لێ كورد ا باشوور په‌كه‌كێ وه‌كه داگیركه‌ره ناس دكه
ئه‌ول ئه‌م دبێژن گه‌لێ كورد ل هه‌رێما كوردستانێ باش دزانه كو دژمن دژمنه، هه‌ر لایه‌نه‌كی ئاخا كوردستانێ داگیر بكه یان ئێریشێ گه‌لێ كورد بكه و ته‌په‌سه‌ر بكه وه‌كه داگیركه‌ر د حه‌سبینه، عه‌ینی تشت پارتیێن ل سه‌ر ناڤێ كوردان ژ بۆی به‌رژه‌وه‌ندییا ده‌وله‌تێن داگیركه‌ر ته‌ڤ دگه‌رن، ژ بۆی گه‌لێ كورد جوداهییا وان و ده‌وله‌تێن داگیركه‌ر تونه.
سپایێ پاسداران شەڤا 15 سەر 16ی کانوونا دویه‌مین یا 2024ێ ب 11 مووشەکێن بالیستیکی چەند ناوچەیێن سڤیلنشین یێن هەولێرێ بۆمبەباران کرن، 4 وەلاتیێن سڤیل شەهید بوون و 6 بریندار، رەوشا هنەک ژ برینداران نەجێگیرە.
گه‌لێ كورد ل هه‌رێما كوردستانێ و دنیایێ به‌رته‌كێن توند ل دژی ئیرانێ نیشان دان و ئه‌ڤ ئێریش ب بێ هنجه‌ت، نه‌مرۆڤی و ته‌رۆریست پێناسه كرن، خوه‌پێشاندان ل باژارێن هه‌رێما كوردستانێ هاتن ئه‌نجام دایین، درووشمه‌یێن نه‌رازیبوونێ ل دژی ئیرانێ هاتن ئاڤێتن، ژ وێ ده‌مێ ڤه په‌كه‌كه هه‌ول دده رۆژه‌ڤێ بگوهه‌رینه و ئیرانێ وه‌كه ده‌وله‌ته‌كه بێ گونه‌هـ نیشان بده.
په‌كه‌كه كو به‌شه‌كی فه‌رمی یێ ئه‌نیا مقاوه‌مێ و حه‌شدا شیعی یه، تام ل گۆری ئه‌جێندایا ئیرانێ ته‌ڤ دگه‌ره و ده‌سته‌كێ وێ د هه‌ر ئێریشه‌كه ئیرانێ یا ل سه‌ر هه‌ولێرێ و كوردستانێ ده هه‌یه.
چما گه‌لێ باشوور خوه‌پێشاندانێ ل دژی تركیێ ناكه؟
ژ ده‌ستپێكرنا خوه‌پێشاندانێن باشوور ل دژی ئیرانێ، په‌كه‌كه هه‌ول دده گه‌لێ كورد ب پرسێن مینا چما حكوومه‌تا باشوور ده‌ستوورا خوه‌پێشاندانێن ل دژی تركیێ ناده ب خاپینه، یان چما گه‌لێ باشوور خوه‌پێشاندانێ ل دژی تركیێ ناكه؟
به‌رسڤا ڤێ پر زه‌لاله، گه‌لێ باشوور خوه‌پێشاندانێ ل دژی تركیێ ناكه ژ به‌ر كو دزانه و باش فێم دكه كو په‌كه‌كه ده‌وام هنجه‌تا دده ده‌ستێ تركیێ ئێریشێ باشوور بكه، فێم دكه كو ته‌ڤ به‌ختره‌شی و نه‌هامه‌تیێن ژ ده‌وله‌تا ترك یا داگیركه‌ر گهیشتنه باشوور ب سپۆنسه‌ری و پالپشتییا په‌كه‌كێ بوونه، ل همبه‌ری ڤێ پارتیێن رۆژهلاتا كوردستانێ، ژ بلی پارتیێن گرێدایی ئیرانێ «په‌كه‌كه و باسكێن وێ ل رۆژهلات» چ هنجه‌ت نه‌دانه ده‌وله‌تا ئیرانێ ئیریشی باشوور بكن.
ئه‌م ڤێ پێتر زه‌لال بكن:
یه‌كه‌م: پارتیێن رۆژهلات، رێزێ ل حكوومه‌تا هه‌رێما كوردستانێ دگرن، لێ په‌كه‌كه و باسكێن وێ چ حورمه‌ته‌كێ ل حكوومه‌تا هه‌رێمێ ناگرن و وه‌كه دژمن نێزی وێ دبن.
دوویه‌م: پارتیێن رۆژهه‌لات هه‌می یاسایێن حكوومه‌تا هه‌رێما كوردستانێ ل به‌ر چاڤ دگرن، لێبه‌لێ په‌كه‌كه یاسایێن حكوومه‌تا هه‌رێما كوردستانێ ناس ناكه.
سێیه‌م: پارتیێن رۆژهلات د شه‌رێ دژی ته‌رۆرا داعشێ ده هه‌می هێزا خوه یا چه‌كداری خسته ژێر خزمه‌تا وه‌زاره‌تا پێشمه‌رگه، لێ په‌كه‌كێ ئه‌ڤ شه‌ر ب فرسه‌ند دیت و هه‌رێمێن پێشمه‌رگه‌ی كۆنترۆل كرن.
چاره‌م: پارتیێن رۆژهلات چ هێزه‌كه وان یا چه‌كداری ل هه‌رێما كوردستانێ و خه‌تا سینۆرێ ب ئیرانێ ره نینه، په‌كه‌كێ سینۆرێ باشوورێ كوردستانێ ب ته‌ڤاهی داگیر كریه.
پێنجه‌م: پارتیێن رۆژهلات چ جاره‌كێ مایتێكرن د وه‌لاتیێن باشوور ده نه‌كرنه، په‌كه‌كێ گوندێن باشوور داگیركرنه، باجێ ژ وه‌لاتیێن باشوور دستینه و سته‌مه‌كا مه‌زن ل وان دكه.
ب كورتاسی په‌كه‌كە ب تایبەتی ژ سالا 2014ێ ڤه هەول دده نه ته‌نێ تفاقێن خوه یێن قرێژ یێن ب ئیرانێ ره ڤه‌شێره به‌لكو دخوازه ناسنامەیا داگیرکەریا ئیرانێ ژی ڤەشێره و وێ وەکە دەولەتەکا بێگونەهـ – ئاشتیخواز نیشان بده.
