ئالایێ كوردان ره‌مه‌زا هه‌ری سه‌ركه و دیار بوو د چالاكیێن رۆژێن رابووری یێن پرۆته‌ستۆ كرنا ئێریشا ده‌وله‌تا ته‌رۆریست یا ئیرانێ ده، ئێریشا كو ل حه‌فته‌یا رابووری ل دژی هه‌ولێرێ ئه‌نجام دای، گه‌لێ كورد ل هه‌ر ده‌را دنیایێ ل ئالا ره‌نگین خوه‌دی ده‌ركه‌ت، وان ب به‌رزكرنا ئالا خوه و قێرینا درووشمه‌یا «بژی كورد بژی كوردستان» نیزاما ته‌هرانێ رووره‌ش كر.
سپایێ پاسداران شەڤا 15 سەر 16ی کانوونا دویه‌مین یا 2024ێ 11 مووشەکێن بالیستیکی ل هن ناوچەیێن سڤیلنشین یێن هەولێرێ باراندن، 4 وەلاتیێن سڤیل شەهید بوون و 6 بریندار، زارۆك بوون قوربانی، ئیرانێ ب هنجه‌تا لێدانا باره‌گه‌هێن مۆسادێ ئه‌ڤ ته‌وان ئه‌نجام دا!.
ژ رۆژا ئه‌ول یا ئێریشێ چالاكی، مه‌ش و خوه‌پێشاندان ژ بۆی پرۆته‌ستۆكرنا ئێریشا پاسداران هاتن ئه‌نجام دایین، ل ئه‌ورۆپا ل وه‌لاتێن سوێد، هۆله‌ندا، سویسرا، به‌لژیكا و نه‌مسا، هه‌ر وها به‌ریتانیا و ئه‌مه‌ریكا و هن ده‌وله‌تێن دن، گه‌لێ كورد ل هه‌ر ده‌رێ ئه‌ڤ ئێریش پرۆته‌ستۆ كر و ب به‌رزكرنا ئالا كوردان و قێرینا درووشمه‌یێن «بژی كورد بژی كوردستان» نیزاما ئیرانێ شه‌رمه‌زار كر.
چاپه‌مه‌نیا په‌كه‌كێ و چالاكیێن پرۆته‌ستۆكرنا ئیرانێ
رێخستنا په‌كه‌كێ ژ شه‌ڤا ئێریشێ و هه‌یا ئیرۆ، هه‌موو هه‌وله‌ك ئاڤێت ژ بۆ كو رۆژه‌ڤێ بگوهه‌رینه، ئه‌ڤ ئێریشا كو ب ده‌هان ده‌وله‌تێن زلهێز ل جیهانێ و هه‌ر وها جڤاكا ناڤده‌وله‌تی هه‌ر د زوو ده ل سه‌ر ئاخڤین و داخویانی ل سه‌ر به‌لاڤ كرن، چاپه‌مه‌نیا په‌كه‌كێ ته‌نێ نووچه‌یه‌كی دو رێزكی پارڤه‌كر و تێ ده گۆت: «هه‌ولێر راستی ئێریشا ب مووشه‌كان هات، 4 كه‌س هاتن كوشتن، سپایێ پاسداران ئێریش گرت سه‌ر خوه».
پشتره ل باژێرێن هه‌رێما كوردستانێ بژلی سلێمانیێ چالاكیێن پرۆته‌ستۆ كرنێ ده‌ستپێكرن، گه‌لێ كورد ب كه‌له‌جانه‌ك مه‌زن ئالا ره‌نگین هلدان و ده‌وله‌تا ئیرانێ شه‌رمه‌زار كر، ئه‌ڤ یێك ژی بوو سه‌ده‌ما هێرسه‌كه مه‌زن ژ بۆی په‌كه‌كێ.
ته‌ڤی كو ل ده‌وله‌تێن داگیركه‌ر «تركیه، ئیران و سووریه‌یێ» چالاكیێن پرۆته‌ستۆكرنێ ب ئاوایه‌ك جودا هاتن ل دارخستن و ب سه‌ده‌ما قه‌ده‌غه‌یا ل سه‌ر ئالا كوردستانێ ل وان ده‌وله‌تان كوردان نكاری وه‌كه باشوورێ كوردستانێ و كوردێن ل ده‌رڤه‌ی وه‌لات ئالا خوه به‌رز بكن، لێبه‌لێ كوردان هه‌ر ده‌نگێ خوه كر و ل دۆزا خوه و پایته‌ختا كوردستانێ خوه‌دی ده‌ركه‌تن.
هلدانا ئالایێ ره‌نگین د چالاكیێن پرۆته‌ستۆ كرنێ ده په‌كه‌كه دین و هار كر
نه بالكێشه كو په‌كه‌كێ د ت یێك ژ چاپه‌مه‌نیێن خوه یێن نڤیسكی و پلاتفۆرمێن خوه یێن مه‌دیایێ ده دیمه‌نێن پرته‌ستۆكرنا ده‌وله‌تا ئیرانێ نه ئینان پێش
نه بالكێشه كو په‌كه‌كێ د ت یێك ژ چاپه‌مه‌نیێن خوه یێن نڤیسكی و پلاتفۆرمێن خوه یێن مه‌دیایێ ده دیمه‌نێن پرته‌ستۆكرنا ده‌وله‌تا ئیرانێ نه ئینان پێش، به‌لكو بێهتر یێك په‌یڤ ژی ل سه‌ر نه‌نڤیساند و د حه‌فته‌یا رابووری ده پێتری جاره‌كێ ئێریشی حكوومه‌تا هه‌رێما كوردستانێ كر، په‌كه‌كه و رێبه‌رێن وێ ب خوه‌ده‌ی ده‌ركه‌تنا كوردان ل ئالا ره‌نگین، پایته‌ختا كوردستانێ و یه‌كده‌نگییا وان د رووره‌شكرنا نیزاما ته‌هرانێ ده دین و هار بوون. سه‌ده‌م ژی ئه‌ڤه په‌كه‌كه ئالا كوردستانێ ناس ناكه و وه‌كه ئالا كوردان قه‌بوول ناكه.
په‌كه‌كە باش دزانه كو ئەو ئالا کورد ژێ ره دبێژن «رەنگین»، ئالا هەڤپارا کوردانە و ژ سالا 1919 ڤە هەیە، لێ ئیرۆ ئه‌و ب هەمان زمانێ چاپه‌مه‌نیا ده‌وله‌تێن داگیركه‌ر ڤێ ئالێ، ب «ئالا بارزانی و ئالا په‌ده‌كێ» ناڤ دکە و وه‌كه ئالایێ نه‌ته‌وه‌یا كورد ناس ناكه.
په‌كه‌كه ئالا هه‌موو ده‌وله‌تێن داگیركه‌ر قه‌بوول دكه ته‌نێ ئالا كوردستانێ قه‌بوول ناكه، ژ به‌ر ڤێ ئه‌م دبێژن هەبوونا په‌كه‌كێ ئاستەنگ و خه‌ته‌ریا هەری مەزنە ژ بۆی نه‌ته‌وه‌بوونا کوردان، ژ به‌ر كو دژمناتیا په‌كه‌كێ بۆ ئالا کوردستانێ تێ واته‌یا دژمناتیا ڤێ رێخستنێ ژ بۆ نەتەوەیا کورد ب خوه.
