وەزارەتا ناڤخوە یا هەرێما کوردستانێ داخویانیەک دەربارێ نووچەیەکە خاپینۆکا په‌كه‌كێ دە بەلاڤ کر و تێ دە راگهاند، «په‌كه‌كه بوویە بەشەک ژ پلانێن ناڤچەیێ یێن ل دژی پێکهاتەیا هەرێما کوردستانێ».
وەزارەتا ناڤخوە یا هەرێما کوردستانێ د داخویانیەکێ دە راگهاند: «مەدیایا سەر ب په‌كه‌كێ ڤە نووچەیەکە خاپینۆک بەلاڤ کریە کو هێزێن پێشمەرگە ل دەڤەرا ئامێدیێ ئێرشی وان کریە. ل ڤر ئەم ژ وەلاتیێن هەرێما کوردستانێ و هەموو کوردستانیێن ل سەرانسەری جیهانێ رە رادگهینن کو ئیرۆ دانێ نیڤرۆ 24/1/2024، چەکدارێن په‌كه‌كێ ب دەهان کیلۆمەتران دووری سینۆرێ ترکیێ ل دەڤەرا ئامێدیێ، بێیی رێزگرتن ل سازیێن فەرمی و دەستووری یێن هەرێمێ رە، زێدەگاڤی ل سەر خالەکە هێزێن زەرەڤانی کریە و پشترە ژی ب مووشەکان ئێرشی هەمان خالا کۆنترۆلێ کرن و هێزێن پێشمەرگە ژی ژ چەپەرێن خوە ڤە، بەرەڤانی ژ خوە کرن».
د داخویانیێ دە هات گۆتن: «ئەڤ هەولدانا چەکدارێن په‌كه‌كێ د چارچۆڤەیا وێ ئێریش و کریارێن تێکدەرانە دە، ب ئارمانجا تێکبرنا ئەولەکاری و ئارامیا هەرێمێ یە. مخابن ئەو بوونە بەشەک ژ پلانێن ناڤچەیێ یێن ل دژی پێکهاتەیا هەرێما کوردستانێ».
وەزارەتا ناڤخوە تەکەزی ل سەر وێ یەکێ دکە: «هەرێما کوردستانێ نابە مەیدانا یەکالیکرنا پرسگرێکێن ناڤچەیێ و ئەم پشتەڤانیا هەموو هەول و رێکارێن ئاشتیانە یێن ژ بۆ چارەسەرکرنا پرسگرێکان و پێکانینا ئاشتی و ئارامیێ دکن، لێ بەلێ مافێ بەرەڤانیێ ژ بۆ هێزێن مە پاراستییە و ئەم ب توندی ل دژی هەر هەولەکە ئارمانجکرنا پێکهاتەیا هەرێما کوردستانێ و سازیێن فەرمی رادوەستن».
