دوهـ دانێ سبێ دەردۆرا دەمژمێر 10ی سپێدێ، هێزێن سەر ب په‌كه‌كێ ڤە ئێریشی خالا کۆنترۆلێ یا پێشمەرگە ل سەر رێیا گشتی یا ئامێدیێ و شێلادزێ کرن. خالا کۆنترۆلێ یا کو ئێریش ل سەر هاتیە کرن زێدەیی 10 سالانه ل وێ ده‌رێ یه و نه ژ بەر په‌كه‌كێ هاتیە دانان. هەروه‌ها چ ئێریشەک ل دژی چەکدارێن په‌كه‌كێ چێنەبوویە. لێ چەکدارێن په‌كه‌كێ هێزێن زێرەڤانی یێن ل ڤێ خالێ کرنە ئارمانج و ئێریشی وان کرن.
گەلۆ، ئەڤه بوویەرەک لۆکال بوو یان ژی تەسادوف؟ نا، چ یەک ژ وان ئحتیمالان نینە. ئەڤ بوویەر ب تەمامی ب ئه‌جێندایا ئەنیا «دژه – کوردستانی» ڤه یا كو دەولەتا ئیرانێ سەرکێشییا وێ دکەت گرێدایی یە. ژ بۆ ڤێ یەکێ ئەم نکارن ببێژن ئەڤه روودانەکا نۆرمال بوو. ئەڤ ئێریشا په‌كه‌كێ ب ئێریشێن ئیرانێ یێن ل سەر کوردستانێ و رەوشا سیاسی یا هەرێمێ ڤە گرێدایی یە. دڤێ ب زەلالی بهێته گۆتن کو «ئێریشا 15 چلەیێ یا پاسدارێن شۆرەشا ئیرانێ یا ل سەر هەولێرێ چێبووی و ئێریشا 24ێ چلەیێ یا په‌كه‌كێ ل سەر خالا پێشمەرگەی كری، ژ هەمان ناڤەندێ هاتنە پلانکرن. ئەم دکارن ڤێ یەکێ ژی ل سەر زێدە بکه‌ین ئەو باسکێ حەشدا شه‌عبی یێ ب ناڤێ «بەرگرییا ئیسلامی» ب به‌هانه‌یا ئەمەریکا ئێریشی هەولێرا پایتەخت دکه‌ن. یانی پاسدارێن شۆرەشا ئیسلامی – باسکێ لەشکەریێ په‌كه‌كێ هه‌په‌گه – ملیسێن حه‌شدا شەعبی مل ب ملێ هەڤ، ئێریشی هەرێما کوردستانێ دکه‌ن.
دڤێت جڤاکا کورد، رەوشەنبیر و وەلاتپارێزێن وێ ڤێ راستیێ دەشیفرە بکه‌ن: په‌كه‌كێ پشتی سالا 2014ێ گاڤ ب گاڤ میحوەرێ خوە گوهارت. شەرێن خەندەکان یێن پشتی سالا 2014ێ، بداویبوونا پێڤاژۆیا ئاشتیێ، گەشەدانێن ل رۆژئاڤا، رەوشا شەنگالێ و …هتد، ئەڤه هەموو ل سەر ئەساسێ ئه‌جێندایا ئیرانێ پێشکەتن. دڤێت رەوشا بجهبوونا په‌كه‌كێ و هه‌په‌گێ یا ل باشوورێ کوردستانێ ژی د ڤی چارچۆڤەی دا بهێته شرۆڤەکرن. هەموو چالاکی و هەولێن په‌كه‌كێ یێن ل باشوورێ کوردستانێ ل سەر ئه‌جێندایا ئیرانێ دهێن مەشاندن.
چاوا کو حه‌شدا شەعبی بەشەکێ نەراستەراسته ژ پاسدارێن ئیرانێ، هه‌په‌گه ژی نها نەراستەراست بەشەکه ژ موحافزێن شۆرەشا ئیرانێ. نەولله هەما بێژە باسکەکێ وێ یێ ڤەشارتی یە.
هەموو تەڤگەرێن هه‌په‌گێ ل گۆری ڤێ رێخستنێ دهێن ئۆرگانیزە کرن. وه‌سا خویایە کو ب دەستپێکا بهارێ، ئێریشێن ڤێ سێگۆشا دژمنکار «پاسدارێن شۆرەشا ئیرانێ، حه‌شدا شەعبی و په‌كه‌كێ» یێن ل سەر کوردستانێ دێ زێدە ببن. یەک ژ ئەرکا په‌كه‌كێ ژی ئەوە کو ب رێیا چاپەمەنیا خوە ئێریشێن ل سەر هەرێما کوردستانێ ژ ئالیێ دەروونی ڤە رەوا بکەت. دهێته دیتن کو هه‌په‌گه دێ د دەما پێش دا ب ئاوایەکی چالاکتر ئێریشی هێزێن پێشمەرگەی بکەت و د ڤی واری دا ئه‌وێ پلانەکا ڤەشارتی هه‌یە.
تێ چاڤەرێکرن کو د هەیاما پێشییا مە دا په‌كه‌كە ل سەر سێ خەتێن سەرەکی ل دژی پێشمەرگەیێن کوردستانێ چالاکیان پێش بێخیت.
ژ ڤان قادا یەکەم برادۆستە: ئیرانێ هێزێن هه‌په‌گێ ل سەر خەتا ملگەڤەر- تلگەڤەر- پیرانشارێ ل پشت پایگاهێن خوە ب جهـ کرینە. هێزێن په‌كه‌كێ یێن ل ڤێ ده‌رێ دێ ل خەتا خنێرە -لۆلان – گۆشینێ ل دژی هێزێن پێشمەرگەی چالاکییان پێک ئینن.
قادا دویەمین: خەتا ئامێدی و شێلادزێ یە. په‌كه‌كێ ل ڤێرێ ب تایبەتی ل دژی خالێن ئەولەهیا رێ دێ ئێریشی هن خالێن پێشمەرگەیان بکەت. دێ ب رێیا چاپەمەنییا خوە ژی وان خالان وەکە یێن دەولەتا ترک نیشان بده‌ت.
قادا سێیەم: دێ ل سەر خەتا گارەی هەتا خەلیفان و رەواندزێ هنده‌ك چالاکی و روودانێن پرۆڤۆکاتیف ئه‌نجام ده‌ت.
بێگومان دڤێت شەرێ په‌كه‌كێ ل دژی پێشمەرگەیێن کوردستانێ د وارێ تەکتیکی و دەروونی دا ب بەرفرەهی بهێته دەست گرتن. پێویسته نه‌هێته ژ بیر کرن کو خودانێ ڤی شەری نە تەنێ په‌كه‌كەیە دەولەتا ئیرانێ یە. په‌كه‌كە شەرێ ب وەکالەت ل سەر باشوور دمەشینیت. ژ بەر ڤێ یەکێ بەریا هەر تشتی ئەم باش ئاشکەرە بکه‌ین کو په‌كه‌كە هێزەکا پارامیلیتەرە سەر ب ئیرانێ ڤە. له‌وما ژی شەرێ ب وەکالەت ل هەرێما کوردستانێ دمەشینیت. دڤێت ئەم ڤێ راستییا په‌كه‌كێ باش و باش تەشهیر بکه‌ین.
