بوبێ ئەسەر
شۆرەشا گولانێ ژی وەکە شۆرەشا ئیلۆنێ بەرھەمەک ژ بەرھەمێن رێبازێ یە. لەورا ژی دەما مرۆڤ بخوازیت ڤێ شۆرەشی فێر ببە، دڤێت مرۆڤ ب ئاوایەکی بەرفرەھ ل سەر ھێز و ئەرکا شۆرەشا ئیلۆنێ راوەستە دا کو بکاربە شۆرەشا گولانێ شرۆڤە بکە. ل سەر ھێژایی، قیمەت و دەستکەتیێن وێ راوەستە.
ئەزێ بخوازم د ڤێ نڤیسا خوە دە ب کورتایی ل سەر ڤان ھەردو شۆرەشێن ل گۆر دەستوور و بەرنامەیا رێبازا پیرۆز چ گوھەراندنێن مەزن د ژیانا گەلێ کورد دە کرنە راوەستم. راوەستم دا کو کورد ھێز و قاوەتێ ڤێ رێبازێ ناس بکن. دڤێت کورد باش فێر ببن کو بێ رێباز ئازادی و سەرخوەبوونا ملەتەکی وەکە کوردستانێ زەحمەتە.
ژ بەر ڤێ گرینگیێ یە کو دڤێت ئەم وەکە کورد بەرێ رێبازا خوە ناس بکن. دوورە ژی بکاربن تشتێن ڤێ رێبازێ د ژیانا گەلێ مە دە پێک ئانیە ببینن. رێبازێ گەلەک شۆرەش د ژیانا گەلێ کورد دە کرینە. لێ ژ وان دو شۆرەشێن کو کورد ژ مرنێ خلاس کرینە. شۆرەشا ئیلۆنێ و یا گولانێ نە. لۆما من خوەست ھندەکی ڤێ ڤەکم دا کو ئەم شۆرەشێن ب سەرپەرەشتیا بارزانیان و رێبازێ پێک ھاتنە باش ناس بکن.
ھەتا سالا 1946 گەلەک شۆرەش و بەرخوەدان ل تەڤایا کوردستانێ پێک ھاتن، لێ ژ وان یەک ژی ب سەر نەکەتن. فارس، عەرەب و ترکان کۆمکوژیێن مەزن کرن. وان خوەستن گەلێ مە ب تەڤایی ژ ھۆلێ راکن و خەلکێ مە بێ دەنگ بکن. ژ خوە ئەو شۆرەشێن کو ھەتا 1946 پێک ھاتبوون، تێک چووبوون. ل سەرانسەرێ جھانێ کورد بێ خوەدان و بێ ھێڤی کربوون. لێ د سالا 1945 و پێدە خەباتا ژ بۆنا ئازادیا کوردستانێ، ل رۆژھلات ھێدی ھێدی لڤیا، خوەشتر و باشتر دبوو. حازریا شەر و بەرخوەدانەکا فرەھ دھاتە کرن دا کو ل ھەمبەر داگیرکەرێن فارس شەرێ ئازادیێ بکن.
ب گرتنا بریارەکا وەھا ھاتە دیتن کو کورد ھین ژی زیندی نە، ل سەر لنگانن و ژ بۆنا ب دەسخستنا مافێ خوە یێ رەوا بەرخوە ددن. ڤێ کێفا کوردان ژ نوو دە ئانی. لەورا دەما بارزانیێن کو د سەرھلدانێن خوە یێن ل ھەمبەر رەژیما ئیراقێ دە وەندەکربوون، بەر ب برایێن خوەیێن رۆژھلاتێ دە چووبوون. ژ بەر زلم و زۆرداریا داگیرکەرێن ئیراقێ ل ور ب جھ بوو بوون. لێ داخوازا بارزانیان ھەر گاڤ ئازادیا کوردستانێ بوو. لەورا ژی وان ژ سالا 1907 دە ژ بۆنا ڤێ ئارمانجا پیرۆز ل ھەمبەر داگیرکەریێ سەری ھلدابوون. لێ ب ئالیکاریا ھندەک عەشیرێن کوردان کو ل با دژمن جھ گرتبوون، ب سەر نەکەتن. ژ بۆنا کو ملەت و مرۆڤێن وان ب تەڤایی نایێن قەتلکرن و وان بپارێزن، بەر ب رۆژھلات دە چوون، ل ور ب جھ بوون لێ ژیانا وان یا ور گەلەک زۆر و زەحمەت بوو.
دەما کو ل رۆژھلات بریارا شەری ئازادیا کوردان یا ل ھەمبەری داگیرکەرێن ئیرانێ ھەتا گرتن، ڤێ کێفا بارزانیان و ب تایبەتی یا بارزانیێ نەمر ئانیبوو. لۆما ھەموو بارزانیان ل با برایێن خوەیێن رۆژھلات جھێ خوە گرتن دا کو ژ بۆنا ئازادیا کوردان شەرێ ئازادیێ بکن. بەرھەما وی شەری، دو ھێژایی ژ بۆنا مە ئانین. یەک کۆمارا کوردستان ل مەھابادێ ھاتە دامەزراندن. یا دن ژی بارزانیێ نەمر ژ بەر خەبات و زیرەکبوونا خوە وەکە سەرۆکێ نەتەوەیی یێ گەلێ کورد، ھاتە دەستنشانکرن، ئانگۆ پشترە ئەڤ وەھا ھاتە فێمکرن. لێ چ مخابن ئەڤ کۆمار نە ل گۆر حەسابێن گەلەک دەولەتێن مەزن بوون. لۆما پشتی سالەکێ ھاتە روخاندن و سەرۆکێ وێ قازی محەمەد ھاتە ب دارڤەکرن. لێ بارزانیێ مەزن سەرۆکێ نەتەوەیی یێ کورد کو ل ور ب خەباتا خوە بوو بوو جەنەرالێ ملەتێ خوە، خوە تەسلیمێ دژمن نەکر و ئەو ل گەل 518 چەکدارێن ھەڤالێن خوە بەرب سۆڤیەتا بەرێ دە چوون. ل ور ب جھ بوون.
پشتی روخاندنا کۆمارا کوردستانێ ل مەھابادێ، ئێدی ژ نوو دە و ل سەرانسەرێ جھانێ کورد بێ دەنگ مان. ژ بەر کو ھەتا وێ دەمێ ل ھەر چار پەرچێن کوردستانێ شەرێ ئازادیا کوردان ھاتە تەمراندن و بێدەنگکرن. ملەتێ کورد ھاتە قەتلکرن، وێرانکرن و سورگونکرن (کۆچبەر). ب ڤێ بێدەنگیێ دژمنێن کوردان کێف کرن. وان باوەری ئانیبوون کو کورد دێ ئێدی نکاربن سەری ل ھەمبەری وان ھلدن. لێ سەرۆکێ نەتەوەیی بارزانیێ مەزن ئەڤ کێفا دژمن د قرکا وان دە ھشت و پشتی ژ سۆڤیەتێ ڤەگەریان ژ نوو دە دەست ب شەرێ ئازادیا کوردستانێ کرن. ڤی شەری ئانگۆ ڤێ سەرھلدانێ، کوردێن کو ب تەڤایی بێ ھێڤی مابوون، ب ھێڤی کرن. کوردێن کو ل گۆر دژمن مربوون ژ نوو دە زندی کرن. یانی شۆرەشا ئیلۆنێ ژ نوودە زیندیکرنا گەلێ کورد و بەرخوەدانا ئازادیا وی بوو.
شۆرەشا ئیلۆنێ ژ بۆنا کوردان ل ئیراقێ ئۆتۆنۆمی ب دەست خست. لێ ئەو ژی نەھات حەسابێ دژمن، لۆما ژی ل ھەڤ جڤییان دا کو وێ تێک ببن و ب سەر ژی کەتن. لێ شەرێ کوردان یێ ژ بۆنا ئازادیا کوردستانێ و ب سەرۆکاتیا سەرۆکێ نەتەوەیی بارزانیێ نەمر و لگۆر خالێن ڤێ رێبازا پیرۆز ھەر بەردەوام کر. بەردەوامیا ڤی شەری و بریارا ژ نوودە دەستپێکرنا شەر ژ بۆنا ئازادیێ د رۆژا 26/5/1976 دە ھاتە دەرکرن. لۆما ژی ب ڤێ بریارا ھێژا و دەلال و دیسا ب سەرپەرشتیا بارزانیێ نەمر کو ئیرۆ کورد ل باشوور بوونە خوەدێ دەستکەڤتیەکێ و ب ئاوەیەکی فەدەرال ل گەل ئیراقێ ژیانا خوە بەردوام دکە، بوو.
لەورا ئەز دبێژم و دڤێت نەیێ ژ بیرکرن: د شۆرەشا کوردستانێ یا ل مەھابادێ دە ئەم کورد بوونە خوەدی سەرۆکەکی نەتەوەیی ئەو ژی مستەفا بارزانیێ نەمر بوو. شۆرەشا ئیلۆنێ، ژ نوو دە زندیکرنا گەلێ کورد و یا گولانێ ژی ئازادیا وی بوو. لەورا ژی پێویستیا کو گەلێ کورد ب بەرفرەھی ل سەر ڤان راوەستن، شۆرەڤە بکن و بدن ناسین، ھەیە. ب تایبەتی دڤێت جوان ڤان ھەردو شۆرەشان باش بناسن دا کو دیرۆکا خوە بزانبن.
ئاھا بەرھەمێن ڤان شۆرەشان و رێبازا بارزانیێن نەمر، مە کوردان گاڤ ب گاڤ بەر ب کوردستانەکا سەربخوە دبە. ئەڤ کوردستانا سەر ب خوە دێ ببە، روح، جان، چاڤ و مەژیێ کوردان لۆما دڤێت ھەرکەس ھەر کورد ئیرۆ ژ بۆنا ئارمانجا کوردستانا سەربخوە کار و خەباتێ بکن. رێبازا پیرۆز ناس بکن دا کو بزانبن چما رێباز ئەوقاسی گرینگە.
