ل ناڤچەیا قەلقەلی یا سەر ب پارێزگەھا وانا باکورێ کوردستانێ د مالەکی دە شەوات دەرکەت و تیمێن ئاگرکوژ ژ بۆ کۆنترۆل کرنا ئاگری گەھەشتن جیھێ بوویەرێ و ئاشکەرا بوو زارۆکا ب ناڤێ شەرزان یا 6 مەھی د لاندکا خوە دە ژیانا خوە ژ دەست دایە، داییک و بابێ وێ ژی د کێلیا داویێ دە ب زەحمەتی ژ ناڤ پێلێن ئاگری ھاتن رزگارکرن.
شەڤا بۆری ل تاخا چاڤوشلار یا سەر ب ناڤچەیا قەلقەلی یا وانێ د مالەکی دە شەوات دەرکەت و ل مالا گولەر گولەر و رفعەت گولەر دە ژ بەر سۆبەیێ پشتی کو رادزێن شەوات دەردکەڤە و د شەواتێ دە زارۆکا 6 مەھی یا ب ناڤێ شەرزان گولەر ژیانا خوە ژ دەست دا.
جیرانێن وان پشتی کو دیتن ل مالێ دووکەل رادبە تیمێن ئاگرکوژ ئاگاھدار کرن و پێلێن ئاگری د دەمەکی کورت دە ھەموو مالێ بەلاڤ بوو و ب ئالیکاریا تیمێن ئاگرکوژ، جەندرمە، تیمێن تەندورستی و جیرانان ڤە ژن و زلام ب زەحمەتی ژ ناڤ ئاگری ھاتن رزگارکرن، لێ زارۆکا وان یا 6 مەھی د لاندکا خوە دە ژیانا خوە ژ دەست دا.
ھات راگەھاندن داییک و بابێ وێ زارۆکێ ژی ژ بەر دووکەلێ ژەھری بوونە، لێ ژ ئالیێ تیمێن تەندورستیێ ڤە ل جیھێ بوویەرێ تشتا پێویست ژ بۆ وان ھاتە کرن.
ھات راگەھاندن شەرزانا 6 مەھی د لاندکا خوە دە ب لاندکا خوە ڤە شەوتیە و ژیانا خوە ژ دەست دایە.
مالا کو شەوات تێدە دەرکەتی ب تەمامی شەوتی و دەربارێ بوویەرێ دە لێکۆلین ھاتە دەستپێ کرن.
