بووبێ ئەسەر
ھەگەر مرۆڤ بخوازە تشتەکی، نەرینەکێ، فکر و رامانەکێ فێر ببە. دڤێت مرۆڤ تەنھا ل ئالیەکی وێ نەنێرە. ژ بۆنا ئیزاحکرن یان پەسندانە دەزگەھ و پارتیان. پێویستە مرۆڤ ب بەرفرەھی کریار و بوویەرێن وێ ڤەبێژە. دا کو ئەو ب ئالیێن خوەیێن ئەرینێ و نە ئەرینێ بێ ناسین. ژ بۆنا گەل ل گۆر وێ بریارا خوە یا پشتگریێ بکە یان نەکە، بدە.
ژ بەر ڤێیە کو ئەز ژی دخوازم ب ئاوایەکی بەرفرەھ ل سەر رێبازێ راوەستم دا کو کورد وێ باش ناس بکن. بزانبن ڤێ رێبازا پیرۆز ژ بۆنا گەلێ کورد چ کرییە. چ ئانییە و چ سەرکەتن ب دەست خستیە. ھەلبەت کێم زێدە پرانیا کوردان وێ ناس دکن. گەلەک کورد وێ ب پرئالیا ناس ناکن. لۆما گەلەک ئالیێن وێ ژی نزانن. ژ بەر ڤێیە من خوەست ب قاسی زانین و شییانا خوە ل سەر رێبازێ راوەستن. وێ ب گەلەک ئالیێن کو گەلەک کورد نزانن، ڤەبێژم.
ئەم باش دزانین کو پشتی داگیرکەرنا کوردستانێ و دابەشکرنا وێ د ناڤا چار دەولەتێن ھۆڤ دە. ژ بۆنا کورد نەبن یەک، چ ژ داگیرکەر و کرێگرتیێن وان ھاتنە کرنە و دکن. لێ بارزانیان ب سایا ڤێ رێبازا پیرۆز، چاوا کو ھەشت عەشیرێن کوردان کرن یەک دا کو ب ھەڤرە ل ھەمبەر داگیرکەران راوەستن. خوە ژ داگیرکەریێ ئازاد بکن و ببن خوەدی دەولەتا خوە، پێک ئانیبوون. ب ڤی رەنگی بەرەیا کوردستانی ژی پێک ئانین.
ھەر وەھا وان ل گۆر ڤێ رێبازا پیرۆز ل باشوورێ کوردستانێ پارتیێن کوردستانێ ب ناڤێ بەرەیا کوردستانی د بن سیوانەکا نەتەوەیی دە کرن یەک. د ڤردە ب زەلالی تێ دیتن کو ژ رۆژا بارزانیان دەست ب شەرێ ئازادی و سەرخوەبوونا کوردستانێ کرنە. ئارمانج و ھەدەفا وان ئەو بوو کو کوردان ژ بن داگیرکرنا داگیرکەرێن ھۆڤ و نە مرۆڤانە ئازاد بکە، خەبات کرنە.
ب سەرپەرەشتیا ڤێ رێبازا پیرۆز دو شۆرەش ھاتنە کرن کو یەک ژ وان شۆرەشان شۆرەشا ئیلۆنێ بوو کو کورد ژ خەوا مرنێ هشیار کرن. ب شۆرەشا گولانێ ژی ئاساسێ دەولەتێ دانی. ھەر وەھا ڤێ رێبازێ د ژیانا گەلێ کورد دە دو تشتێن کو کوردان نکاریبوون پێک بینن ژی، پێک ئانین. یەکتیا ھەشت عەشیرێن کوردان ب ناڤێ بارزانی. بەرەیا کوردستانێ کو ژ پارتیێن کوردستانی ب ناڤێ بەرەیا ئانکو ئەنیا کوردستانی بوو.
د ناڤا ھەمی خەباتێن بارزانیان دە تم بەرژەوەندیا نەتەوەیی ل پێش بوویە. ل گۆر خەتا نەتەوەیی یا رێبازێ کارێ خوە مەشاندنە. وان باش دزانیبوون کو ژ بۆنا خورتکرنا خەتا نەتەوەیی، دڤێت یەکیتیا گەلێ کورد ببە. لەورا بارزانیان ل گۆر وێ رێبازا پیرۆز ئەڤ ژی پێک ئانین.
پشتی یەکیتیا عەشیرەتێن کوردستانێ. دامەزراندنا پەدەکێ و ئاڤاکرنا رێبازێ. ھاتە زانین کو دڤێت کورد ل سەر خەتا نەتەوەیی د بن سیوانەکا نەتەوەیی دە ببن یەک. لۆما نەمر ئیداریس بارزانیێ کو ئەو ب خوە ژی بناغەکێ گرینگ یێ ڤێ رێبازێ بوو، دەست ئاڤێت ڤی کارێ پیرۆز و بێ وەستان خەبات کر.
ب سایا کار و خەباتێن نەمر ئەنیا کوردستانێ د سالا 1986 دە ب ئاوایەکی فەرمی ھاتە راگھاندن. ب راگھاندنا ڤێ ژی ل باشوورێ کوردستانێ پارتیێن کوردان ب ناڤێ بەرەیا کوردستانی بوونە یەک. ب یەک ئارمانجێ شەرێ خوە یێ، یان کوردسان یا نەمان دۆماندن.
ھەگەر ئەم ئیرۆ خوەدی پەرچاک کوردستانا ئازادین. ئەو ژی ل گۆر خالا رێبازێ و ب سەرپەرەشتیا بەرەیێ کوردستانێ کو ئیرۆ ھەبوونا باشوورێ کوردستانێ ب سایا وێ ئەنیێ، ھەیە. دڤێت نەیێ ژ بیر کرن کو ئەنیا کوردستانی ب سەرپەرەشتیا یەک ژ ھیمێن رێبازا پیرۆز نەمر ئیداریس بارزانی، ب کەد و خەباتێن وی یێن بێ وەستان ھاتیە دامەزراندن. ژ بەر کو نەمر باش فێم کربوو و زانیبوو کو ھەگەر یەکتیا گەلێ کورد پێک نەیێ، وێ باشوورێ کوردستانێ ب تەمامی تێک بچیت. تێکچوونا باشوورێ کوردستانێ ژی دھات وێ رامانێ کو ئێدی کورد وەکە ملەت نامینن.
ئەڤ کار و خەباتا نەمر ئیدریس بارزانی کو دەستپێکربوو، د قۆناغا حەفتێ یا ئەنفالکرنا 182.000 کوردان بوو. (ئەنفالێ ژ بارزانیان دەستپێ کر 31/7/1983 ھەتا ھەلەبچە د ھەشت قۆناغان دە دەرباس بوو بوو) ئارمانج و ھەدەفا ڤێ بەرەیا کوردستانی ئەو بوو کو ل دژ ھەمی کریار و بوویرێن ھۆڤانە یێن سەدام راوەستن و ملەتێ کورد ژ تونەبوونێ ئازاد بکە.
بەرەیا کوردستانی ژ ڤان پارتیێن کوردستانی یێن وێ دەمێ پێک ھاتبوو: پارتیا دەمۆکراتا کوردستانێ، یەکتیا نشتمانیا کوردستانێ، پارتیا سۆسیالیست دەمۆکراتا کوردستانێ، پاسۆک، پارتیا گەل، پارتیا کارکەرێن کوردستانێ، پارتیا کۆمونیستا کوردستانا ئیراقێ و تەڤگەرا دەمۆکراتا ئاشووری.
کار و خەباتێن نەمر ئیداریس بارزانی ژ سالا 1986 دە دەستپێکربوو، د رۆژا 2/5/1988 دە ب ئاوایەکی فەرمی بەرەیا کوردستانێ ھاتە راگھاندن. سەرۆکێ بەرەیا کوردستانی ژی سەرۆکێ کوردستانێ رێزدار مەسعوود بارزانی ھاتە ھلبژارتن. ب راگھاندنا ڤێ بەرەیێ ئانکو ئەنیا کوردستانی، شەرێ ب سالان د ناڤا دو پارتیێن سەرەکە (پەدەکێ و یەنەکێ) دە ھاتە راوەستن. ھەر وەھا ب سەرپەرەشتیا نەمر ئیدریس بارزانی و ل گۆر خالا نەتەوەیی یا ڤێ رێبازا پیرۆز، پارتیێن کو سلاڤ ژی نەددان ھەڤ، ژ بۆنا ئارمانجا کوردستانەکا سەربخوە ئەڤ راگھاندن قەبوول کرن و پارتیێن کوردستانێ د بن سیوانێ وێ دە بوونە یەک.
د ڤردە تێ دیتن کو ڤێ رێبازا ئەم بەحسا وێ دکن، ب چار خالێن ئەساسی یەکتیا گەلێ کورد پێک ئانین و بەرھەما ڤێ ژی ئازادیا باشوورێ کوردستانێ یە. لۆما تم دبێژم و ئەزێ ھەر بێژم. ھەگەر ل پەرچێن دن ژی ئەڤ رێباز باش ھاتبا زانین، دا محەقەق ل وان پەرچان ژی یەکتیا عەشیر و ئاغایێن باکورێ کوردستانێ یێن وەلاتپارێز، پێک ھاتبا. پشتی سالێن حەفتێیان ژی دا ل باکورێ کوردستانێ ب بەشداریا ھەمی پارتی و رێخستنێن کوردستانی ئەنیا کوردستانێ ھاتبا راگھاندن. لێ مخابن ئیرۆ ئەڤە ل باکورێ کوردستانێ تونەیە و پێک نەھاتیە. لۆما ئیرۆ تەڤگەرا باکورێ کوردستانێ لاواز و قەلسە.
ژ بۆنا پێکھاتنەکا وەھا دڤێت بەرێ رێباز ل پەرچێن دن بێ ناسکرن دا کو ئەو ژی بکاربن خوە ئازاد بکن. ژ بەر ڤێ گرینگیێ یە کو ھەتا ئەم بکاربن، دڤێت ئەم ڤێ رێبازێ بدن ناسکرن و خوەندن کو ل پەرچێن دن ژی یەکیتی یان بەرەیەک کوردستانی بێ راگھاندن.
