بووبێ ئەسەر
ملەتەک ب دام و دەزگەھێن خوە ڤە دبە دەولەت. ب ھێز و قاوەتا خوە ڤە دبە ناڤدار. ب دەمۆکراسی و ئینسانیەتا خوە ڤە دبە مرۆڤ دۆست.
نھا ئەم کورد ژی ل باشوورێ کوردستانێ خوەدی دەولەتا خوە نە، ئەڤ دەولەتا مەیا ب سەرپەرەشتیا رێبازا پیرۆز ھاتیە ئازاد کرن. دام و دەزگەھێن خوەیێن فەرم و نەتەوەیی ھەیە. ل گۆر ئیمکانێن خوە، ب هاریکاریا برایێن خوەیێن پارچێن دن ڤە رادبە و چ ژ دەستێ وێ تێ دکە و کرییە.
دەما ڤێ رێبازێ تەکۆشینا خوەیا ژ بۆنا ئازادی و سەرخوەبوونا کوردستانێ دا. خوەست کو ل گۆر ستانداردێن جیھانێ، دەزگەھێن خوەیێن سڤیل ژی دامەزرینە. ژ بەر کو وەلاتەکی ئازاد کو ل گۆر ستانداردێن دەمۆکراسیێ کار بکە. دڤێت ئەو ببە خوەدی دەزگەھێن سڤیل و نەتەوەیی. ژ بۆنا ئەم ژی د قادا ناڤدەولەتی دە ببن خوەدی دەزگەھەک مەزن و ب ھێز، گەلەک دەزگەھ و خەباتێن سڤیل ژی ھاتنە و تێنە دامەزراندن.
ژ ناڤا ڤان دەزگەھان یا ھەری مەزن و ب ھێز دەزگەھا خێرخوازی یا بارزانی یە. ژ بەر کو رێباز، رێ نیشان ددە. کەسێن ب وێ ژی باوەرن پێویستە کار و خەباتێن پێویست ژ بۆنا پێکھاتنا دام و دەزگەھێن سڤیل و نەتەوەیی باڤێژن. گەلەک گاڤ ژی ھاتنە ئاڤێتن. ژ وان گاڤان یا یەکێ ژی دەزگەھا خێرخوازی یا بارزانی یە.
ژ بۆنا مەزنکرن و خورتکرنا وێ ژی دڤێت ئەو کەس و کەسایەتیێن ژ وەلاتێ خوە حەز دکن. ب رێ و رێبازێ ب باوەرن. کار و خەباتێ بکن دا کو ئەڤە ل سەرانسەری دنیایێ، بەلاڤ ببە. خورت و بھێز ببە. ژ کێ چ دهێت ئالیکاریا وێ بکن. دا کو ئەم ڤێ ژی بکن وەکە خاچا سۆر یا ناڤنەتەوەیی. ئەم ڤێ بکن وەکە ئەمنەستیا جیھانی.
دبێ ئێدی ئەم کورد ژی بھێز، قاوەت و دەزگەھێن خوە. ب کار و هاریکاریێن خوە. خوە بدن ئیسپاتکرن کو ئەم ژی وەکە ھەر ملەتەکی خوەدی دام و دەزگەھێن خوە یێن فەرمی و ناڤ نەتەوەیی نە. پێویستە ئەم بدن زانین کو ھەر دەستنیشانکرنا خالێن ڤێ رێبازێ تەنھا ژ بۆنا بەرژەوەندیا گەلێ کورد یا ھەر چار پەرچانە.
نھا چ د ناڤا کوردان و چ ژی ژ دەرڤەیی کوردان، ھاتیە ئیسپاتکرن کو ئیرۆ کورد ل باشوورێ کوردستانێ خوەدی دەولەتا خوەیە. ئەو دەولەت ژی خوەدی دام و دەزگەھێن خوەیە. واتە ئێدی کورد نە بێ خوەدی نە. خوەدیێ کوردان رێبازا پیرۆز و رێ نیشاندانا وێ یە. ھەر ملەتێ خوەدی رێبازا خوە، ل گۆر شەرت و مەرجان، ل گۆر خالێن رێبازا خوە، دەولەتا خوە دادمەزرینن و ب رێڤە دبن. پشتی دامەزراندنێ ژی وێ ئاڤەدان دکە کو ملەتێ ل سەر وی ئەردی و د بن وی کۆنێ نەتەوەیی دە دژین، رەحەت و ئارام بن.
ھەلبەت ئەڤ خوەدیێ مە ژی ئانگۆ رێبازا پیرۆز ژی ب رێیا دەزگەھێن خوەیێن فەرمی، دێ هاریکاریا برایێ خوە بکە. لۆما د کاراسەتا ئەردھەژا نەدیتی یا ل باکور و رۆژئاڤایێ کوردستانێ دە دەزگەھا خێرخوازیا بارزانی ژی ب ئالیکاریا برایێ خوە ڤە رابوو و رادبە.
ژ بۆنا ڤێ ژی دڤێت ھەمی کورد بێژن و بنڤیسینن کو د وێ رۆژا رەش دە، دەزگەھا خێرخوازی یا بارزانی چاوا هاریکاریا برایێن خوە کربوو. ھەلبەت ئەڤە ل گۆر حەزا ھندەکان نابیت. لێ دڤێر ئەم بێژن و بنڤیسینن. بلا ھەزار جاران دەزگەھا خێرخوازی یا بارزانی بژیت کو ئەو د وێ دەمێ دە بەری ھەرکەسی ب هاریکاریا برایێن خوە ڤە رابوو بوو.
جارەکێ بنێرن و ببینن کو ڤێ رێبازا بارزانی کوردستان کریە نیڤ دەولەت و ب نیڤدەولەتبوونا خوە ژی ھەر جار ب هاریکاریا برایێ خوەیێن کوردێن پارچێن دن ڤە رابوویە و رادبە. ژ بۆنا ئالیکاری چ ژ دەستێ وێ و وان تێ دکە.
بنێرێن و ببینن کو د وێ کاراسەت و ئەردھەژا کو ل باکور و رۆژئاڤایێ کوردستانێ پێک ھاتبوو دەزگەھا خێروازی یا بارزانی، چەندین ئالیکاری و ئانبولانس ژ بۆی برایێن خوە شاندبوو. بنێرن و ببینن، بێ کو وەختی دەرباس بکە ب ھەمی ئیمکان و ھێزا خوەیا ناڤدەولەتی هاریکاریا برایێ خوە کربوو و دکە.
گەلۆ وان پارتی و کەسێن دژمناتیا بارزانیان و رێبازا پیرۆز دکن. کا ھەتا نھا ژ گەلێ خوە رە چ کرن و دێ چ بکن؟ فەرقا کوردستانیبوونێ و ھەبوونا رێبازێ ئەڤە. دڤێت ئێدی کوردێن مە ڤێ باش بزانبن و فێر ببن کو دۆست د رەوشێن دژوار دە ب هاریکاریێن خوە ڤە تێنە ناسین. لەورا د ئەردھەژا ل باکور و رۆژئاڤایێ کوردستانێ پێک ھاتبوو، رێبازێ ب ئالیکاریا خوە ئیسپات کر کو ئەڤ رێبازا پیرۆز ژ بۆنا پاراستن و خوەدی لێدەرکەتاندنا ھەمی کوردانە.
ھەر دەولەتەکا ل جیھانێ خوەدیێ خوە و ھندەک دەزگەھێن ئینسانی یە. ب رێ و سایا وێ دەستێن خوەیێن هاریکاریێ دگەهینە کەسێن پێویستیا وان پێ ھەبن. د ڤێ ئەردھەژا رۆژا 6/2/2023 کو ل باکور و رۆژئاڤایێ کوردستانێ پێک ھاتبوو، ب ھەمی ئیمکانێن خوە یێن کێم دەزگەھا خێروازی یا بارزانی ب ئالیکاریا برایێن خوە ڤە رابوو بوو. ئەڤ دەزگەھا پیرۆز ژی ل گۆر دەستوور و بەرنەمەیا ڤێ رێبازێ ھاتیە دامەزراندن.
ژ بەر ڤێ یە دبێژم: پێویستە ئەم ب سەرپەرەشتیا حکوومەتا ھەرێما کوردستانێ ڤێ دەزگەھا پیرۆز ب هاریکاری و خوەدی لێدەرکەتاندنا خوە، بکن دەزگەھەکا ناڤنەتەوەیی. ئۆفسێن وێ ل وەلاتێن ئەورۆپا ژی ڤەکن. دا کو ئێدی ئەو نە تەنێ ب هاریکاریا کوردان، ب هاریکاریا ھەر ملەت و خەلکەکی پێویستیا وان ب هاریکاریان هەبیت، بکە.
