د سالرۆژا بیرئانینا کۆچا داوی یا «مەلا مستەفا بارزانی» دوهـ کوردان ل هەر دەرێ ب ئازادانە مەراسیمێن ب بیرئانینێ پێک ئانین، لێ ل رۆژئاڤا رەوش جودا بوو، چەتەیێن ب ناڤێ «جوانێن شۆرەشگەر» یێن کو راستەراست فەرمانێ ژ قەندیلێ دستینن ل کۆبانێ و دربێسیێ ئێریش برن سەر خەلکێ کو ژ بۆی بیرئانینا گەنەرال مەلا مستەفا بارزانی ل هەڤ جڤیابوون، ڤان چەتەیان هەقارەت ب وێنەیێن بارزانی، ئالا کوردستانێ و خەلکێ د مەراسیمێ دە بەشدار بوویی کرن و نەهشت ئەڤ مەراسیم بێن بەردەوامکرن.
چەتەیێن پەکەکێ «جوانێن شۆرەشگەر» ل رۆژئاڤا کوردستانێ هەر کارێ کو دخوازن دکن، ژ رەڤاندنا زارۆکان هەیا شەوتاندن و کوشتنا مرۆڤێن بێ گونەهـ، ت کەس و ئالیەک ژی نکارە پێشیا وان بگرە، ئەو د سەر هەر تشتەکی دە نە، نە رێڤەبەریا خوەسەر و نە ژی ت ئالیەک دن نکارە ژ وان رە تشتەکی ببێژە، چما؟ ژ بەر کو ئەو ب قەندیلێ ڤە گرێدایی نە و ب ناڤێ ئۆجالان تەڤ دگەرن.
د دەمەکی دە کو تەڤایا پارتی و ئالیێن كوردی یین نیشتیمانپەروەر كار و خەباتێ بەر ب ئاڤاكرنا نفشەك ژ جوانێن زانا، خوەندەڤان، رەوشەنبیر و هلگرێن رەوەشت و مرۆڤاتیێ و پرەنسیپین رەسەن دكن، لێ ئالیەك و پارتیەك هەیە بەره‌ڤاژی وێ یەكێ دكە و ل دژی ئاڤاكرنا ڤی نفشێ جوانانە، ئەو ئالی ژی پارتیا كاركەرێن كوردستانێ پەكەكە یە.
پەکەکێ ل رۆژئاڤا کوردستانێ نفشەکی چەکدار کو تاوانێن برێخستنكری ئەنجام ددە ئافراندیە، ناڤێ وان ژی کریە «جوانێن شۆرەشگەر»، ئەڤ نفشێ جوانان کو وەکە چەتەیان تەڤ دگەرن ل رۆژئاڤا کوردستانێ بەردەوامە ل سەر کارێ رەڤاندن، دزی، تالانکرن، لێدان و شەوتاندنا جهێن گشتی و چاندنا رامانێن خەراب د ناڤا جڤاکا کورد دە.
جوانێن پەکەکێ ل رۆژئاڤا کوردستانێ، د سەری دە كار لسەر توونەكرن و ژ ناڤ برنا هەر پرۆژەیەكێ یان خوەنیشاندن یان ژی چالاكیەك نەتەوی دکن، ئێریشا ل سەر مەراسیما ب بیرئانینا گەنەرال مەلا مستەفا بارزانی ژی نە تشتەکی نوو یە، ڤان چەتەیان پێش نها چەندین کارێن دن یێن مینا ڤی کاری ژی ئەنجام دانە، ژ وان کاران، پێش نها ئیریشی چالاكیێن سالڤەگەرا سەرهلدانا 12 ئادارێ دە كرن و ریگری ل ئەنجامدانا وان چالاكیان كرن، پشترە ئیریشی چالاكیا سالڤەگەرا دامەزراندنا یەكەم پارتیا كوردی كرن، هەروەها ریگریكرن ل ئەنجامدان و ڤەژاندنا هەر مەراسیم و چالاكی و هەلكەفتەكا نەتەوی كو ل رۆژئاڤایێ كوردستانێ بێ ئەنجامدایین، دیسا هەولا رێگریكرنێ ل ئەنجامدانا چەژنا نەورۆزێ ژی كرن، پشترە ئالا كوردستانێ و وێنەیێن سەرۆك بارزانی شەوتاندن و تەڤایا ئالیكاریێن مرۆڤی یین كو ژ ئالیێ هەرێما كوردستانی ژ بۆ مالباتێن هەژار دهاتن شاندن ددزین، ڤان چەتەیان ئالیكاریێن پزیشكی ژی یێن كو ب رێنمایێن سەرۆك مەسعوود بارزانی هاتن شاندن بۆ رۆژئاڤایێ كوردستانێ ژی دزین، چ خەرابی و بێئەخلاقیەک تونەیە کو ب دەستێ ڤان چەتەیێن پەکەکێ ل رۆژئاڤا کوردستانێ نەهاتبە ئەنجامدایین.
ب كورتاسی د بن سایا سەرێ پەکەکێ دە ئەڤ رێخستنا چەتە کارێن ئەو قاس خەراب و دوور ژ ئەخلاق دکە کو گەر مرۆڤ وان ب جەلادێن ئازادیێ و جاشێن مۆدەرن ب ناڤ بکە وێ نە شاش بە.
