گەنەرالێ نەمرێ کورد مەلا مستەفا بارزانی د 45 سالیا کۆچا داوی دە ژ ئالیێ گەلێ کوردستانێ ڤە هاتە ببیرئانین. لێ ل باژارێ کۆبانێ یێ رۆژئاڤایێ کوردستانێ کۆمەک کەسێن روورەش یێن رووگرتی ب داران ئێریشی ئاڤاهیا کو دێ بیرئانین لێ بێ لدارخستن کرن. ئێریشکەر نە نه‌ژادپەرەستێن ترک بوون، نە شۆڤەنیستێن عەرەب بوون، نە نەتەوەپەرەستێن فارس بوون، ئێرشکەر تەڤگەرا جوانێن په‌كه‌كێ بوون.
کوردان ل سەر مەدیایا جڤاکی بەرتەکێن توند نیشانی ڤێ ئێریشێ دان. هەر کەسی و مە هەموویان گۆت «یێن کو ئەڤ یێك کرن ئەندامێن «جوانێن شۆرەشگەرن» لێ مە کێم گۆت. کەسێن کو بانگ ل رێڤەبەرییا رۆژئاڤا کرن ژی هەبوون ژ بەر کو «جوانێن شۆرەشگەر» رێخستنەکە سەربخوە نینە پێکهاتەیا «په‌كه‌كێ – په‌یه‌دێ» یە. ئەڤ کەسێن بێ دەنگ مایین یان ب نییەتەکا باشن و نزانن په‌كه‌كه ل کودەرێ چاوا دبە، یان ژی دترسن کو ب ئەشکەرەیی بێژن په‌كه‌كێ ئەڤ کرییە.
مه‌زلووم عه‌بدی کەسەکی دوروویە
دڤێ هەر کەس باش بزانە کو؛ د سیستەما رێخستنی یا په‌كه‌كێ دە چ سازی و پێکهاتە ب سەرێ خوە نکارە بریارەکی وها بدە. بریار ژ ناڤەندا رێخستنێ تێنە گرتن و بەر ب ژێر پێکتینە. کریارێن ڤێ کۆما چەتە یا بێئەخلاقا ب ناڤێ «جوانێن شۆرەشگەر» کو دیرۆک، حورمەت و عیرفانێ نزانن، ب ته‌علیماتێن ژۆر یێن په‌كه‌كێ تێن مەشاندن. یانی بریارا ئێریشا ل سەر بیرئانینا مەلا مستەفا بارزانی ل کۆبانێ نە بریارا کۆمەکا جوانێن خوێری یه، راستەراست بریارا رێڤەبەریا په‌كه‌كێ یا ل رۆژئاڤایە. له‌وما ژی راستە راست مه‌زلووم عه‌بدی بەرپرسیارێ ڤێ ئێرشێ یە.
هەر کەس دزانە کو مه‌زلووم عه‌بدی ژ کۆبانێ یە، ژ نێزیك ڤە ب کۆبانی رە ئەلەقەدارە و هەموو مالبات، خزم و مرۆڤێن پێباوەر یێن وی ل کۆبانی ب جهـ بوونە. مه‌زلووم عه‌بدی ل رۆژئاڤا هەرێمەکا بچووکا دەستهلاتداریێ ژ خوە رە چێکریە و ب فەرمانا وی ئەڤ ئێریش و چالاکیێن وه‌ها تێن کرن. کەسێن مه‌زلووم عه‌بدی ناس دکن، باش دزانن کو وی ل ئەورۆپایێ چاوا لێدان و کوشتن دکر. د سالا 2004 دە ل هەمبەری کەسێن ژ په‌كه‌كێ ڤەقەتییایی ته‌سفیه دکرن و ئەو ب هۆڤانە د کوشتن. مه‌زلووم عه‌بدی ب پراكتیكا خوە یا قرکرنا ئۆپۆزسیۆنێ خوەدی تەجرووبە کی دێرینە. بەرپرسیارێ بوویەرا کۆبانی ژی مه‌زلووم عه‌بدی یە. ژ بەر ڤێ یەکێ، دڤێ ئەم هەمی راستەراست هەسابێ ژ وی بپرسن.
مه‌زلووم عه‌بدی ل هەمبەری هەرێما کوردستانێ خوەدی هەلوەستەکە دوروویە. دورووتییا وی د ڤێرێ دە یه وی هەلوەستەکێ ب دو ناڤان هه‌یه، نە ب مەجازی لێ ب راستی وه‌هایه. مه‌زلووم عه‌بدی یەکەم کەسە کو ب ناڤ و روویێ خوە «سپاسیا سەرۆک بارزانی دکە، سەرساخیێ رادگهینە، داخوازا پشتگریێ دکە». روویێ وی یێ دوویەم ژی ئەو کەسێ ب ناڤێ شاهین جیلۆ (کۆبانی) کو د ناڤ په‌كه‌كێ دە تێ ناسکرن و گۆتبوو «ئەمێ ئێرشی پێشمەرگە بکن» و ئێریشی بیرئانینا رەحمەتی مەلا مستەفا ئۆرگانیزە کر.
وان د گۆت ئەمێ دەمۆکراسیێ بینن جیهانێ، لێ بوون فاشیست
رێڤەبەرییا رۆژئاڤا – لێ تەنێ ئەم ژ وان رە دبێژین رۆژئاڤا، په‌كه‌كه ژێ رە دبێژن باکورێ رۆژهلاتێ سووریێ. په‌كه‌كێ سالا ژ 2013ێ ب راگهاندنا کانتۆنێ، راگهاندنا کۆنفەدەرالیزما دەمۆکراتیک و راگهاندنا ژیانا هەڤپارا ئازاد، ئیدیعا دکر کو دێ دەمۆکراسیێ ئیخراجی جیهانێ بکن. ب ناڤێ پەیمانا جڤاکی ژی دەستوور چێکرن. لێ د پراكتیکێ دە، پشتی ڤێ ئاخافتنا ئازادی و دەمۆکراسیێ، هەول دان پەرگالا هەری پاشڤەروو، تۆتالیتەر، مێتنگەر ئاڤا بکن و فاشیزمێ ل سەر گەلان فەرز بکن. ب راستی دەما کو تو ل جوانێن ب دار و روویێن گرتی یێن دوهـ یێن ل کۆبانیێ دنێری نه‌ژادپەرەستێن ترک و جوانێن ئوولکووجوو یێن فاشست تێن بیرا مە. یانی جوانێ کو په‌كه‌كێ ئافراندیە چ نه‌سیبێ خوە ژ ئەخلاقێ جڤاکی، نرخێن نەتەوی و ئەدەبێ نە گرتییە.
هەر تشتێ ئەم بدن ئالییەکێ، ڤێ گرووپا چەتە و ئاقلمەندێن وان په‌كه‌كێ، تەحەموولا بیرئانینا رێبەرێ مەزنێ کوردان کو تێکۆشینا کوردان یا سەد سالان ل سەر ملێ خوە گرتیە و رەمزا نەتەوی یە، نەکرن. چەپێ ترکان دکارن وێنەیێن سەرۆکێن خوە ل کۆبانیێ دالقینن، عەرەب دکارن وێنەیێن حافز ئه‌سه‌د و کورێ وی دالقینن، لێ کورد نکارن وێنەیێن مەلا مستەفا بارزانی دالقینن.
گۆتن ئەمێ دەمۆکراسیێ بینن، فاشیزم ئانین، گۆتن ئەمێ کوردان رزگار بکن، دیکتاتۆریا پارتیێ ئاڤا کرن، چ دبێژن بەره‌ڤاژی وێ دکن. په‌كه‌كه ئێشا پەنجەشێرێ یە کەتی ناڤا ده‌مارێن نەتەوه‌یا کورد دە.
پر ئەشکەرەیە کو مەلا مستەفا بارزانی د درێژاهیا سەدسالا 20ێ دە ل دژی هەر سیستەمەکێ دژه-کورد ئانكو، ژ ئۆسمانییان، ل دژی ئینگلیزان، ل دژی ئیرانی و ل دژی ئیراقی شەر کریە. ژ بەر ڤێ راستیێ ژی بوویە ئارمانجا ئێرشێن کەسێن کو کوردستانێ ئیستسمار دکن. جهێ کو سالیادا نەمر مەلا مستەفا بارزانی قەدەغە بە، بزانن کو ل ور فکرا کۆلۆنیالیستان هەیە.
ئێریشا ل دژی بیرانینا نەمر مەلا مستەفا یا ل کۆبانیێ، ئیسپات دکە کو په‌كه‌كه ئاموورەکه کو کۆلۆنیالیست ژ خوە رە بکار تینە. دەما کو وان دفکرین مرۆڤان ب دژواری چاڤترساندی بکن، لێ راستیێ دە په‌كه‌كه کارەکتەرێ خوە یێ دژه-کورد و فاشیست ئەشکەرە کر. پێدڤییە کو ئەڤ ئیخانەت و بێرێزی ب توندی وەرە شەرمەزار کرن.
