بووبێ ئەسەر
د دیرۆکا گەلان دە، بەرخوەدان و سەرھلدانێن وان دە، رۆل و ئەرکێ رێڤەبر، سەرۆک و سەرۆکاتیێ گەلەکی گرینگە.
پێویستە ئەم وەکە کورد ل سەر ڤێ راوەستن. باش بفکرن و دیرۆکا خوە بەر چاڤ بکن. ژ بۆنا کو ئەم بزانبن د ڤێ دیرۆکا مەیا هەر دەم ب شەر و پەڤچوونان دە دەرباس بوویە دە، کیژان سەرۆکان ئەرک و بەرپرسیاریێن خوەیێن نەتەوەیی ب جھ ئانینە، ببینن و ناس بکن.
ب زانینەک وەھا ئەم دێ فێر ببن، ھندەک کەسێن خوە وەکە سەرۆکێ کوردان دیتینە یان دبینن، د ڤێ دیرۆکێ دە چاوا رۆل لیستنە. ئەم دێ فێر ببن کو ھندەک ژ سەرۆکێن مە کوردان ژ بۆنا ئازادیا گەلێ خوە، خوە کرنە جانگۆری.
ھندەکان ژی ھەتا گولـلەیا خوە یا تالی ل ھەمبەر دژمنێ دەڤبخوین تەکۆشینا ئازادیا گەلێ خوە دانە ھەتا کو ئەو بوونە جانگۆری. ھندەک ژی د زیندانێن دژمن دە تەسلیم نەبوونە. ب وێرەکی و مێرخاسیا خوە، د زیندانێن دژمنان دە، روو ب روویێ ھەمی میتۆدێن ئێشکەنجا و نەرەحەتیان بوونە. تالی ژی ھاتنە دارڤەکرن.
ھندەک ژ سەرۆک و رێبەرێن کوردان ژی خوە ب تەمامی رادەستی دژمن کرنە. دژمن ژ وان چ خوەستنە کرنە و پێک ئانینە.
ل ڤێ جیھانێ تم رۆل و بەرپرسیاریا سەرۆکان گرینگە کو چاوا ئەرکێن خوە لیستنە. ئەو ئەرک جارنا بوویە سەدەم کو وەلاتێ خوە تێک برنە و جارنا ژی بوویە سەدەم کو وەلاتێ خوە یێ داگیرکری ئازاد کرنە.
پشتی ڤێ شرۆڤەیا کورت کو مە ب ھەڤرە زانی رۆل و ئەرکێن سەرۆک و سەرۆکاتیێ چیە؟ ڤەگەرین و بزانین د رێبازا بارزانی دە ئەڤە چاوا پێک ھاتبوو.
رێباز نە تەنێ رێ نیشاندانە. رێباز ئەوە کو کادرۆیێن تەڤگەر یان پارتیان پەروەردە بکەی دا کو ژ ژیری و زانینێ کەسێن دکارن ب ئەرکێ سەرۆکاتیێ ڤە رابن ببینن و پەروەردە بکن.
یەک ژ تایبەتمەندیێن رێبازێ ئەوە کو گرینگیەکا باش دایە مرۆڤێن دکارن ب ئەرکێن سەرۆکاتیێ ڤە رابن. لۆما ژ بۆنا سەرۆکاتیا گەلێ کورد کەسێن بەربچاڤ دھاتن ھلبژارتن و پەروەردە کرن کو ئەو بکاربن رێڤەبەریا گەلێ خوە و سەرۆکێ پارتیا خوە بکە.
د رێبازێ دە سەرۆک و سەرۆکاتی ل گۆر پێڤانێن نەتەوەیی و زانینا وان دھاتن ھلبژارتن. ژ بۆنا کێمانی و شاشی ژی نەبە، کەسەک وەکە سەرۆک و کەسەک ژی وەکە ئالیکار یان ھەڤکارێ وی دھات و تێ ھلبژارتن. لۆما خالەک ژ خالێن رێبازێ ئەو بوو کو تم رێڤەبەریا گەلێ کورد ب سەرۆکاتیا دو کەسان دھاتە مەشاندن.
رێبازا کو ژ عەبودولسەلامێ یەکەم دە بنگەھا وێ ھاتبوو دانین. د سەردەما عەبودولسەلامێ دوەم دەنگ و رەنگێ خوە گرتبوو. د سەردەما شێخ ئەحمەد دە ژی ئێدی ھندەک خالێن خوە د ژیانێ دە پێک دئانی.
شێخ ئەحمەد باش تێ گھشتبوو کو دڤێت سەرۆک و سەرۆکاتیا گەلێ کورد نە یەک بە. دڤێت پشت سەرۆکی وەکە ئاقلمەندەکی دن ھەبە کو کێماسی و شاشیێن سەرۆکی د دەمێ دە بێنە سەڕاست کرن. ژ بەر ڤێ بوو کو د دەما شێخ ئەحمەد دە و سەرۆکێ نەتەوەیی بارزانی نەمر ئەڤە هاتبوو ئەنجامدان. ھەر چقاسی بارزانیێ نەمر سەرۆکێ پارتیێ ژی بوو، لێ رۆل و ئەرکێ شێخ ئەحمەد نە کێمی یێن وی بوو. لۆما د وێ سەردەمێ دە سەرۆکاتیا گەلێ کورد ژ وان پێک دھات. دەما کو شێخ ئەحمەد کۆچا داویێ دکە. ڤێ جارێ ژی بارزانیێ مەزن نەمر ئیدریس بارزانی و مەسعوود بارزانی ژ بۆنا سەرۆکاتیا گەلێ کورد ئامادە دکە.
پشتی کۆچکرنا وی ژی وەکە رێبەر و سەرۆکێن گەلێ کورد نەمر ئیدریس و سەرۆک مەسعوود بارزانی کارێ سەرۆکاتیێ دمەشینن. پشتی کۆچکرنا نەمر ئدریس ژی رێزدار مەسعوود بارزانی ژ بۆنا پارتی و تەڤگەرا ئازادیخواز بێ سەرۆک نەمینە، رێزدار نێچیرڤان بارزانی و مەسروور بارزانی ئامادە و پەروەردە کرن.
د رێبازێ دە ھەر ئەڤ میتۆدە بەردەوامە. ژ بەر کو ئەڤە ژی خەلەکا گرینگ یا رێبازێیە کو ملەتێ کورد بێ سەرۆک نەمینە و تم ئامادەکاریا سەرۆکێن نوو تێ کرن. ھەر تم ژ بۆنا گەلێ کورد بێ سەرۆک نەمینە، کەسێن دەستھلاتدار تم کەسێن دن ژ بۆنا سەرۆکاتیێ ئامادە و پەروەردە کرنە و دکن.
ڤێ رێبازێ و ڤێ پێک ئانینێ، بارزانیێ نەمر کر سەرۆکێ نەتەوەیا کورد. ئەو بوو سەرۆکێ ھەمی کوردان ل سەرانسەرێ دنیایێ. ئیرۆ ئەم دبینین کو نەمر بارزانی وەکە سەرۆکەکی نەتەوەیی ل ھەر چار پەرچێن کوردستانێ تێ ب بیرئانین. لۆما ژی یا گرینگ ئەوە کو سەرۆک ببن سەرۆکێ پرانیا کوردان. ئیرۆ ژی یەک ژ بناغەیێن ڤێ رێبازا پیرۆز رێزدار مەسعوود بارزانی ژی وەکە سەرۆکەکی نەتەوەیی تێ ب ناڤکرن. ئەو ژی وەکە بابێ خوە ل ھەر چار پەرچێن کوردستانێ تێ ناسین، حەزکرن و گۆتنا وی ل جیھانێ دەرباس دبە و ژ جەنابێ وی گوھداری دکن.
ژ بەر ڤێیە کو دەما رێبازا پیرۆز ب رەنگ و دەنگێ خوە ل کوردستانێ بەلاڤ بووی، قیمەت و روومەتا سەرۆکاتیێ ژی گرت کو سەرۆک ب تەنێ نەبە سەرۆکێ پارتیا خوە. دڤێت ب ئەرکێن خوە یێن نیشتیمانی رابن دا کو ببن سەرۆکێ کوردان.
ھەگەر ئیرۆ ل باکورێ کوردستانێ سەرکەتن و دەستکەفتن تونە بن. ژ بەر ڤێ یەکێ یە کو سەرۆکەکی نەتەوەیی کو بکاربە ھەمی کوردان، پارتی و تەڤگەرێن ھەیی د بن کۆنەکی دە بجڤینە، تونەیە. لۆما پێویستە کو ئەڤ رێبازە ل باکورێ کوردستانێ باش بێ خوەندن و زانین دا کو ئەو ژی بکاربن د ناڤا خوە دە سەرۆکەکی کو بکاربە ھەمیان ھەمبێز بکە دەرخن.
ب ڤێ موناسەبەتێ ئەز 121 سالیا ژ دایکبوونا سەرۆکێ نەتەوەیی بارزانی ب بیر تینم. سەرێ خوە ل ھەمبەر خەبات و تەکۆشەریا وی دتەوینم. ئەو زیندی د دلێ ھەر کوردەکی دە دژی و دێ بژی…
