مەکتەبا سیاسی یا پەدەکێ ئیرۆ (دوشەمبێ، 18/3/2024) بەیاننامەیەک ل سەر رەوشا نھا یا ئیراقێ، پەیوەندیێن ھەولێر و بەغدایێ، ھلبژارتنێن پەرلەمانێ کوردستانێ، بریارێن دادگەھا فەدەرالی و چەند پرسێن دن بەلاڤ کر.
مەکتەبا سیاسی یا پەدەکێ راگەھاند، “ئەم ئالیێن ھەڤپەیمانیا ئیدارەیا دەولەتێ دخن بەرانبەری بەرپرسیاریتیا نشتیمانی د بجھنەئانینا دەستووری و تەڤایا خالێن لھەڤکرنا سیاسی و ئیداری یێن پێکانینا کابینەیا نھا یا حکوومەتا ئیراقێ ب سەرۆکاتیا محەمەد شیاع سوودانی، بەرۆڤاژی وێ یەکێ ژی ئەم نکارن ل سەر پرۆسەیا سیاسی بەردەوام بن”.
مەکتەبا سیاسی یا پەدەکێ گۆتیە، “ئەشکەرەیە کو پەدەکێ ھەر ل دەستپێکا دامەزراندنا خوە خەبات ژ بۆ بدەستخستنا مافێن رەوایێن گەلێ کوردستانێ و چەسپاندنا دەمۆکراتیێ کریە، وەکی دو ئارمانجێن ھەڤگرتی، ب وێ باوەرێ کو تەنێ ب رێیا دەمۆکراتیکرنا سیستەما دەستھلاتداریا ئیراقێ مافێن رەوایێن گەلێ کوردستانێ تێن وەرگرتن”.
ئاماژە ژی دایە، “ھەر ب وێ نەرینێ ژی سەرۆک بارزانی ھەر د رۆژێن دەستپێکێ یێن بھارا سالا 1991 دە ژ بۆ دیارکرنا دەستکەفتیێن گەلێ کوردستانێ و پاراستنا وان و بکارئانینا وان ب ئاوایەکی راست، بانگەشە ژ بۆ ھلبژارتنان ب ئاوایەکی ئازاد وەکی بنگەھا دامەزراندنا دەستھلاتداریەکا دەمۆکراتی ل ھەرێما کوردستانێ کر.”
تەکەز ژی کریە، “پارتیا مە ھەردەم تەکەز ل سەر بجھانینا بنگەھ و پیڤەرێن ھلبژارتنێن ئازاد و زەلال کریە، کو قانوونەکا ھلبژارتنان یا دادپەروەرانە ھەبە کو نوونەرتیا تەڤایا تەخ و چین و پێکھاتێن گەلێ کوردستانێ ل پەرلەمانێ بکە و دەریێ دەنگدانێ و خوەکاندیدکرنێ ژ بۆ پرانیا ھەژمارا وەلاتیان ڤەکە و کێمترین دەنگ و نوونەریتی ب ھەروە بچن.”
ئەشکەرە ژی کریە، “ھەر د چارچۆڤەیا ھەستکرنا ب وان ئەرک و بەرپرسیاریان دە بوو کو د دەما سالێن بۆری دە ب ھەموو ئاوایان مە لگەل ئالیێن سیاسی یێن ھەرێما کوردستانێ و ئیراقێ کار کریە، ژ بۆ کو تەڤایا ھلبژارتنان ب ئاوایەکی دورست و دەستووری بێن کرن و تایبەت ھلبژارتنێن گەرا شەشێ یا پەرلەمانێ کوردستانێ د دەما خوە دە بێن کرن.”
ھەروەسا راگەھاندیە، “بریارا دادگەھا فەدەرالی ل سەر قانوونا ھلبژارتنێن پەرلەمانا کوردستانێ بەردەوامیا بریارێن وێ یێن نەدەستوورییە، کو د دەما چار سالێن بۆری دە ل بەرانبەری ھەرێما کوردستانێ دەرخستنە”.
مەکتەبا سیاسی یا پەدەکێ د وێ بەیاننامەیێ دە بال کشاندیە سەر بنپێکرنێن دیار و مەترسیدارێن دەستووری د بریارێن دادگەھا بلندا فەدەرالی دە ژ بۆ نەھێلانا سیستەما دەمۆکراتیێ ل ھەرێما کوردستانێ و بزاڤەکە کو ئیراقێ ڤەبگەرینە سیستەما ناڤەندی.
د بەشەکا دن یا وێ بەیاننامەیێ دە ھاتیە، “دادگەھا بلندا فەدەرالی بەردەوام د بریارێن خوەیێن گرێدایی ھەرێما کوردستانێ دە مافێن وێ یێن دەستووری بنپێ کرنە و دخوازە وان دەستکەفتیێن گەلێ مە کو مە ب خەبات و تێکۆشان و خوینا شەھیدێن خوە و ئەنفالکری و کیمیابارانکریان ب دەست خستنە ب بریارێن سیاسی و نەدەستووری ژ گەلێ کوردستانێ بستینە.”
ل داویێ ژی گۆتیە، “ئەم ئالیێن ھەڤپەیمانیا ئیدارەیا دەولەتێ دخن بەرانبەری بەرپرسیاریتیا نشتیمانی د بجھنەئانینا دەستووری و تەڤایا خالێن لھەڤکرنا سیاسی و ئیداری یێن پێکانینا کابینەیا نھا یا حکوومەتا ئیراقێ ب سەرۆکاتیا محەمەد شیاع سوودانی دە، بەرۆڤاژی وێ یەکێ ژی ئەم نکارن ل سەر پرۆسەیا سیاسی بەردەوام بن.”
ھەروەسا تەکەز ژی کریە، “ئەم وەکی بەرژەوەندا گەل و نشتیمانێ خوە دبینن کو پارتیا مە نەچە بن بارێ پەژراندنا بریارا نەدەستووری و سیستەمەکە سەپاندی ژ دەرڤەیێ ئیرادەیا گەلێ ھەرێما کوردستانێ و دەزگەھێن وێ یێن دەستووری و تەڤلی ھلبژارتنەکێ نەبە کو ب ئاوایەکی نەقانوونی و نەدەستووری و ل ژێر سیبەرا سیستەمەکە سەپاندی بێ کرن”.
