بووبێ ئەسەر

بەرھەما من یا ل سەر زیندانا دیاربەکرێ ب ناڤێ گازی و ھەوارە، ژ چاپێ دەرکەت. ئەڤ بەرھەمە ل سەر رەوشا مالباتێن دچوون سەرەدانا زارۆکێن خوە یێن د زیندانا ب ناڤێ 5 نۆلییێ دە بوون. وەکە تێ زانین کو ئەم کێم زێدە ژ رەوشا تشتێن دھاتن سەرێ گرتیان ئاگاھدارین. لێ گەلۆ چ ھاتبوو سەرێ مالباتێن کەسێن وان گرتی بوون. ئەڤ رۆمانە وێ زەلال دکە.

ل بەر دەری و ل حەوشا وێ زیندانێ زێرەڤانێن زیندانێ چ دئانین سەرێ مالباتێن دچوون کو زارۆکێن خوە ببینن. ب زمانەکی رەحەت و ب فۆرما رۆمانێ ھاتیە نڤیسین.

ئەز ب خوە ژی نێزیکی سێ سالان د وێ زیندانێ دە بووم (2.1.1980-19.5.1982)  ھەتا نھا 12 بەرھەمێن من ھاتنە وەشاندن. دو ژ وان ل سەر زیندانا دیاربەکرێ نە. سێ ژی ل سەر ئەنفالا  ھەشت ھەزار زلامێن بارزانیان و یێن دن ژی وەکە رۆمان و چیرۆکن.

من تم رەوشا زیندانا دیاربەکرێ و مالباتێن دھاتن زیارەتا کەسێن خوە و مالباتێن کەسێن وان ھاتبوون ئەنفالکرن کێم زێدە وەکە ھەڤ دیتنە.

ئەڤ رۆمانا کو نھا دێ بگەهە دەستێ وە ھوونێ وێ بکرن و بخوینن. ھوونێ فێری گەلەک بوویەرێن کو ئەڤ 40 سالن ھاتبوون ڤەشارتن یان ژی ژ بەر شەرمێ نەھاتبوون گۆتنێ، بخوینن.

ملەتێ دیرۆکا خوە نزانبن، زەحمەتە کو ب سەر بکەڤن. ھەتا کورد باش فێری وێ زیندانێ و وێ ئەنفالێ نەبن نکارن رێیا ب سەرکەتنێ پەیدا بکن. ژ بەر کو د ھەردویان دە ژی رێیێن ل بەر کوردان ب دارێ زۆرێ و ب کوشتنێ ھاتبوون گرتن.

لۆما دڤێت ژ بۆنا ڤەکرنا وێ رێیێ ژی ئەم وێ زیندانێ، رەوشا گرتیان و مالباتێن گرتیان فێر ببن دا کو ئەم بکاربن رێیا خەباتێ ڤەکن.

ژ بیر کرنا زمان، ژ کوردبوونێ دوور کەتنا نھا ھەمی گرێدایی وێ زیندانێ یە. ژ خوە سەدەما ئاڤاکرنا وێ زیندانێ ژی ئەو بوو کو زمان و ھزرا کوردی د ناڤا کوردێن باکور دە بکوژە. ل گۆر من ب سەرکەتنە. لێ ھێ مە ب تەمامی وەندا نەکرنە.

 ژ بەر کو پێویستیا گەلێ مە ژ خوەندن و نڤیساندنێ ھەیە. دڤێت ئێدی کورد ب خوە دیرۆکا خوە بنڤیسینن. د دیرۆکا گەلێ مە دە دو بوویەرێن کو ل جیھانێ وەکە وان نەقەومی نە ئەڤن:

1- زیندانا دیاربەکرێ یا ب ناڤێ 5 نۆلی یە. من دو بەرھەم ب کوردی ل سەر وێ نڤیسینە. گاردیان. گازی و ھەوارە

2- ئەنفالا بارزانیان و یا گەلێ کورد کو ل باشوورێ کوردستانێ پێک ھاتبوو. من ھەتا نھا ل سەر وێ ژی سێ بەرھەم نڤیسینە. دیرۆکا روورەش، بارزان دگری و قێرینا بارزان.