رێخستنا چاڤدێریا مافێن مرۆڤان (هیومان رایتس واتچ) دبێژە، ترکیەیێ ب دارێ زۆرێ ب هەزاران پەنابەرێن سووری ڤەگەراندنە گرێ سپی.
رێخستنا چاڤدێریا مافێن مرۆڤان ئیرۆ 28ێ ئادارێ د راپۆرتەکێ دە راگهاند، د دو سالێن بۆری دە هەژمارا پەنابەرێن سووری یێن کو ل ترکیێ تێن گرتن، زێدە بوویە و ترکیە وان ب دارێ زۆرێ ڤەدگەرینە وەلاتێ وان.
ئاماژە کر، رایەدارێن ترک زەختێ ل رێڤەبەرێن دەریێن سینۆرێن گرێ سپی و باب ئەل-سەلامێ دکن کو هەژمارا کەسێن هاتنە ڤەگەراندن ئەشکەرە نەکن و ناڤێن کەسێن کو تێن ڤەگەراندن، د بن ناڤێ «ل سەر داخوازا وان هاتنە ڤەگەراندن» بنڤیسن.
جیگرێ رێڤەبرا رێخستنێ ژ بۆ رۆژهلاتا ناڤین ئادام گووگل دبێژە، ڤەگەرا ب دلخوازی یا کو ژ ئالیێ ترکیەیێ ڤە تێ کرن، پر جاران ڤەگەرەک ب دارە زۆرێ یە و خەتەرناکە».
ل گۆری ئادام گووگل ، «سۆزا ترکیێ یا ئاڤاکرنا هەرێمێن ئەولە بێواتە دمینە، ژ بەر کو سووری خوە نەچار دبینن کو رێویتیێن خەتەرناک بکن، دا کو ژ شەرت و مەرجێن نەمرۆڤانە یێن ل گرێ سپی برەڤن».
د راپۆرێ دە هات دەستنیشانکرن کو «ترکیە وەکە دەستهلاتداریا داگیرکەرا ل گرێ سپی، نەچارە کو قانوون و نیزام و ژیانا گشتی بپارێزە و سووریان ژ توندیێ بپارێزە».
د راپۆرتێ دە هاتیە، «ترکیە ئالیەکی پەیمانا مافێن مرۆڤان یا ئەورۆپایێ، پەیمانا ناڤدەولەتی یا مافێن سڤیل و سیاسی و پەیمانا پەنابەرانا سالا 1951ێ یە. ژ بەر ڤێ یەکێ، دڤێ ئەو رێزێ ل قانوونان بگرن و پەنابەران ب زۆرێ ڤەنەگەرینن دەڤەرێن خەتەرناک کو تێ دە راستی ئەگەرا ئێشکەنجە و سەردەریەکە خراب وەرە.
ژ سالا بۆری ڤە حکوومەتا ترکیێ رۆژانە هەژمارەک پەنابەرێن سووری ڤەدگەرینە هەرێمێن ئدلب، ئه‌عەزاز، سەرێ کانیێ و گرێ سپی.
ل گۆری رایەدارێن ترکیێ، کەسێن کو ب بەلگەیێن وان یێن یاسایی، چ کارتێن پاراستنا دەمکی و چ ژی مافێ روونشتنا دەمکورت نینن، تێ دەرسینۆرکرن.
لێ چالاکڤانێن سووری ژی دبێژن، پرۆسەیا ڤەگەراندنا پەنابەران ب دارێ زۆرێ تێ کرن و بانگ ل جڤاکا ناڤدەولەتی دکن کو ب ئەرکێ خوە ل هەمبەر ڤێ رەوشێ رابن.
