ئەردۆگان: پێڤاژۆ ب ئاوایەکی ئەرێنی بەر ب پێش ڤە دچە

سەرۆککۆمارێ ترکیەیێ و سەرۆکێ گشتی یێ ئاکەپێ رەجەب تەییب ئەردۆگان، د جڤینا کۆما پارتیا خوەیا ل مەجلیسێ دە ل سەر گەشەدانێن داوی یێن سیاسی ئاخڤی. ئەردۆگان بال کشاند سەر “پێڤاژۆیا” کو د رۆژەڤێ دەیە و دەستنیشان کر کو تەڤی ھەموو ئاستەنگیان، ئەنجامێن ئەرێنی دەردکەڤن ھۆلێ.

ئەردۆگان د ئاخافتنا خوە دە دیار کر کو ئەڤ پرۆسە نە نوویە و کەتیە قۆناغەکە گرینگ. سەرۆککۆمارێ ترکیەیێ گۆت: “تەڤی ھەموو خرابکاریێن ڤەشارتی و ڤەکری، پێڤاژۆیێ 18 مەھ ل دوو خوە ھشتن. ب ئەرێکرنا راپۆرا کۆمیسیۆنێ رە، نھا ئەم د قۆناغەکە حەساستر دە نە.” ئەردۆگان ھەر وھا ئانی زمان کو ئاتمۆسفەرا ھەیی یا سیاسی رێ ددە کو گاڤێن ب بریارتر وەرن ئاڤێتن.

ئەردۆگان بانگ ل ھەموو ئالیان کر کو ل گۆری بەرپرسیاریا دیرۆکی تەڤبگەرن و وھا بەردەوام کر: “تشتێن کو دڤێت وەرن کرن دیارن. پێڤاژۆ ب ئاوایەکی ئەرێنی پێشڤە دچە. بێگومان دیرۆک دێ ناڤێ کەسێن کو پشتگری دانە ڤێ پێڤاژۆیێ تۆمار بکە.” ئەردۆگان تەکەز کر کو ئەو رێ نادن چ گۆتن یان پراکتیکێن کو زرارێ بدن ڤێ ئاتمۆسفەرا ئەرێنی.”

د داویا نرخاندنا خوە دە، ئەردۆگان دەستنیشان کر کو ئەو چاڤەرێ نە ھەر کەس ب ھەستیاریەکە مەزن نێزیکی ڤێ قۆناغێ ببە. وی دەستنیشان کر کو ئارمانجا وان پاراستنا ئارامیا گشتییە و دڤێت چ ئالی نەبن سەدەما تێکچوونا ڤێ خەباتا کو 18 مەھن ب کەدەکە مەزن تێ مەشاندن.