بووبێ ئەسەر

ب قاسی زانین و شیانێن خوە، ئەز ھندەکی ل سەر رێبازا پیرۆز سەکینم کو دڤێت کورد وێ ژ بەر بکن. دڤێت پارتی و رێخستنێن ب ئارمانجا ئازادیا کوردستانێ دەرکەتنە یان دێ دەرکەڤن سەر رێیا ئازادیێ، پێویستە بەری ھەر تشتی ڤێ رێبازێ باش ناس بکن. پشتی ناسکرنێ ژی دڤێت وان خالێن رێبازێ د ژیانێ دە و د ناڤا کوردان دە پێک بینە دا کو کورد ژی ببن خوەدی دەولەتا خوە.

ئەڤجا من خوەست پشتی ب کورتاسی ناساندنا رێبازا پیرۆز، ئەم ھندەکی ڤەگەرن و بزانبن وان کەس و کەسایەتیێن ئەڤ رێبازە ژ بۆنا مە دانینە کی نە؟ ژ بۆنا مرۆڤ رێبازێ باش ناس بکە دڤێت مرۆڤ کەسێن بناغەیێن ڤێ رێبازێ دانینە ژی ناس بکە. کار و خەباتێن وان بدە ناسین. لۆما ژ نھا و پێ دە ئەز دێ ئێدی ھندەکی ل سەر بارزانیان کار و خەباتێن ژ بۆنا کوردان کرین، بسەکنم.

بارزانی کی نە؟؟؟

ھوون یا راستی بخوازن کوردێن کو بارزانیان ناسنەکن نینن و پرانیا کوردان ژی وێ رێبازا پیرۆز دزانن و دناسن. کار و خەباتێن بارزانیان ژ بۆنا گەلێ خوە کرنە ب زەلالی و ئەشکەرەیی تێ زانین. چ دەما بارزانی تێ ب ناڤکرن کار و خەباتێن ژ بۆنا ئازادیا کوردستانێ تێ بیرا مرۆڤان. ھەر وەھا دەما مرۆڤ دبێژە کوردستان، یەکسەر بارزانی دکەڤن بیرا مە. ژ بەر کو د دیرۆکا بارزانیان دە سەرھلدان و بەرخوەدانا ژ بۆنا گەلێ خوە کرنە جھەکی تەیبەتی دگرە. ھەر ئەڤ تایبەتمەندی ھەتا کو جیھان ھەبە، دێ جھێ خوە د دلێ ھەر کوردەکی دە بپارێزە.

لەورا ژی بارزانیان د دلێ پرانیا کوردان دە جھەکی خوەیێ پیرۆز و تایبەت ھەیە. ژ بەر ڤێیە کو داگیرکەرێن وەلاتێ مە هەرتم خوەستنە کو وێ تەیبەتمەندیێ ژ دلێ کوردان دەرخن. ژ بەر ڤێ بوو کو وان شەر و پەڤچوون ل ھەمبەر بارزانیان دکرن. گەلەک ژ وان کوشتن. ھند سێدارە دان، ھند د زینداناندا رزاندن. و تالیا تالی ژی ب گشتی 8000 زلامێن وان ئەنفال کرن. لێ دژمنان و ھەڤالبەندێن وان چ جاران ژی نکاریبوون بارزانیان بقەدینن، تونە و بێدەنگ بکن.

لۆما ژی بارزانیان د ھەر مالەکا کوردان دە ھێلنا خوە دانیبوون و د وێ ھێلینێ دە ژ بۆنا دۆز و داوایا کوردان، ژ بۆنا ئازادیا کودستانێ دەرسێن پەروەردەییێ ددان گەلێ خوە، ھەڤال، ھۆگر و ئەندامێن خوە. کەسێن کو ئەو پەروەردەیی وەردگرتن ب رووحیەتا خوە یا کوردانی دحەسیان و دژیان و شەرێ ئازادیا گەلێ خوە بێ ترس دکرن. ژ بەر کو کەسێن ب وێ رێبازێ مەزن ببن و ب وێ پەروەردەییێ بێنە پەروەردەکرن، وێ گاڤێ ب عەقلیەتا خوە، ب بیر و باوریێن کوردەواری مەزن دبن. ژ بۆنا ڤێیە کو بارزانیان هەرتم ترس دخست دلێ داگیرکەران لۆما ژی ئەو ژ داگیرکەران و ھەڤالبەندن وان رە بووبوون مەترسی. ڤێ مەترسیێ ھەتا کو باشوورێ کوردستانێ ئازاد بوو بەردەوام کر…

بارزانی کی نە؟ بارزانی نە عەشیرەکە. ئەو ژ کۆنفەدەراسیۆنا حەفت عەشیران پێک ھاتیە و بارزان ب خوە ژی ناڤێ گوندەکییە. بارزانی و بنەمالا بارزانیان کو شێخێن نەقشیبەندی بوون و سەرۆکاتیا دینی و نەتەوەیی کرنە و ژ بەر عەدالەت و وەکھەڤیا د ناڤا وان دە ، عەشیرێن دن خوە دانە دۆرا وان و کۆنفەدراسیۆنەک چێکرنە و ئەو کۆنفەدەراسیۆن ب ناڤێ بارزانیان تێ زانین. لەورا ژی دەڤەرا بارزان ژ بۆنا بارزانیان و کوردان تم بوویە وەکە سیوانەکێ کو ھەموویان د بن وێ دە یەکیتیا خوە پێک ئانینە. ئەو دەڤەر بوویە وەکە کەلەھەکا کوردپەروەران کو تم نەرازیبوونا خوە ل دژ ھەموو رەژیمێن ئیراقێ و ھەموو داگیرکەران دیار کرییە.

دەما کو مرۆڤ بالا خوە ددە دیرۆکێ، تێ دیتن کو داگیرکەرێن کوردستانێ یێن ھەر چار پەرچان تم ژی ل گەل ھەڤ و ب ھەڤرە خوەستنە ڤێ کۆنفەدەراسیۆنێ ئانکو بارزانیان ژ ھۆلێ راکن. ب تایبەتی سەدام خوەستبوو دەڤەرا بارزان بن ئاڤ بکە و ھەموو بارزانیان ژی ژ ور کۆچبار بکە، بکوژە، ئەنفال بکە. لۆما ژی سەدام باوەر دکر کو دەما ئەو بارزانیان ژناڤ ببە دێ تەکۆشینا گەلێ کورد ژی ب داوی ببە. د ڤێ نەرینا خوە دە ب حەق بوو. ژ بەر کو داخوازا بارزانیان و ب تایبەتی یا نەمر بارزانی ئەو بوو کو وەلاتێ خوە ژ بن دەستێ داگیرکەران ئازاد بکە. لۆما ژی قەت نەسەکنی، تەسلیم نەبوو، ھەتا داوییا ژیانا خوە ژ بۆنا گەلێ خوە ژ بۆنا خەلکێ خوە د ناڤا تەکۆشینا ژ بۆنا ئازادیا وەلاتێ خوە دە کار و خزمەتا گەلێ خوە کر.

سەدام ب کەربەکا گەلەک مەزن خوەست بارزانیان ژ ناڤ ببە. ژ بەر ڤێ وی د 31/7/1983 دە بریارا جینۆسایدا بارزانیان دا و 8000 زلامێن بارزانیان ژ ناڤا مالباتێن وان دەرخست و برن جھەکی نە دیار. لێ وی ب وێ کریارێ نە تەنێ 8000 بارزانی بن ئاخ کرن… سەدام ب تەمامی 182.000 کورد ئەنفال کرن. ئەو جینۆسایدەک بوو کو دڤێت ئەم ڤێ وەھا ل قەلەم بدن.

لۆما ژی دڤێت ئیرۆ ل سەرانسەرێ جھانێ ھەموو کورد خوەدی ل وێ تەکۆشینا وان دەرکەڤن. ھەموو د دادگەھێن ناڤنەتەوەیی دە ژ بۆنا ڤێ وەکە بوویەرەکا جینۆسایدێ بدن قەبوول کرن کار و خەباتێ بکن.

دژمن چقاسی ژ بارزانیان عاجز بوون، دڤێت ئەم ژی ئەوقاسی ژ وان و ژ وێ رێبازا پیرۆز یا بارزانیێ نەمر دانیە حەز بکن. حەزکرنا بارزانیان تێ واتەیا خوەدی ل وەلاتێ خوە دەرکەتاندنێ. ژ بەر کو بارزانیێ نەمر ب تەقاندنا گولـلەیا شۆرەشا ئیلۆنێ بێدەنگیا کوردان و ترس ل سەر وان راکر و دا زانین کو چ جاران کورد نامرن، دێ ھەر بژین، ھەتا کو وەلاتێ خوە ئازاد بکن. دەولەتەکا کوردی یا سەربخوە راگھینن دێ بەرخوەدانا بارزانیان ھەر بەردەوام بە…