ل ترکییێ و باکورێ کوردستانێ سبەھی ھلبژارتنێن شارەداریان دێ هێن ل دارخستن. دێ سبە ئێڤاری پشتی راگھاندنا ئەنجامێن ھلبژارتنا، پێڤاژۆیەک نوو ل ترکییێ دەستپێبکە. پارتیان پرانی گرانیا خوە دایە ل سەر باژارێن مەزن یێن ترکییێ. ستەنبۆل دێ چارەنووسەکی تایبەت د پێشەرۆژا ترکیێ دە دیار بکە.
دو ئیحتیمال دەردکەڤن ھۆلێ
یەکەمین ئەگەر ئاک پارتی سەربکەڤە، ژیانا سیاسی یا شەرەدارێ نھا ئەکرەم ئیمامۆغلو ب ئاوایەکی داوی دبە و باندۆرا کو ل سەر جەهەپێ ھەیی وندا دبە. رەوشا جەهەپێ و ناکۆکیێن د ناڤا جەهەپێ دە دژوارتر دبن و دێ ھێزا خوەیا ئۆپۆزسیۆنێ ژی ب ئاوایەکی ژ دەست بدە.
دویەم ئەگەر جەهەپە سەربکەڤە، دێ ئیمامۆغلو ژ سبەھی پێدە خوە ژ بۆ ھلبژارتنێن سەرۆککۆماریێ یێن 2028 ئامادە بکە، و باندۆرا خوە ل سەر جەهەپێ ب ھێزتر بکە. ھەتا جەهەپە دکارە دۆزا ھلبژارتنێن پێشوەخت ل دەستھلاتێ بکە.
ل ستەنبۆلێ رەوشا دەنگدەرێن دەمێ تەڤلیھەڤە. ئیمامۆغلو ل گەل قەندیل و نوونەرێن قەندیل د ناڤا دەمێ دە ل ھەڤکریە و ب ئاوایەکی ئەو کڕینە. ل گۆر ھندەک ئاگاھداریێن د مەدیا ترکی دە ژی ھاتین بەلاڤ کرن، پەرەیەک مەزن دایە پەکەکێ. نھا ل سەر ڤێ یەکێ بەحسا لێپرسینەکی ژی تێ کرن. ژ ئالیەک دن ھەر چقاس دەمێ بەربژێرێ خوە ژی دەستنیشان کربە، لێ بەشەک مەزن ژ دەنگدەرێن دەمێ دێ دەنگا بدن ئیمامۆغلو. کەشفکرنا بەربژێرەکی ژ ئالیێ دەمێ ڤە ب تەمامی تەکتیکییە.31 کەسێن ئەندامێن دەمێ د لستەیێن مەجلسا شارەداریێن ناڤچەیێن ستەنبۆلێ دە د لیستەیێن جەهەپێ دە جھ گرتنە. کورتاھی ئیمامۆغلو رانتا ستەنبۆلێ ل گەل قەندیل ب ئاوایەکی پارڤە کریە.
ژ ئالیەک دن ڤە کەسایەتێن وەک لەیلا زانا د بەشەکا پرۆپاگاندەیێن دەمێ دە ئامادە بوویە و بانگ دکە کو، دەنگێ خوە بدن دەمێ ب خوە، نەدن کەسەک دن. ئەگەر دەم ب ھێز ژ ڤان ھلبژارتنا دەرکەڤە موومکینە 1 نیسانێ پێڤاژۆیا ئاشتیەکی دەستپێ بکە. ئەڤ ژی دەقێ گۆتنێن زانایە کو، ل ھەر دەری دبێژە. تێ زانین کو ئەڤە 8 سالبوون قەندیل قەدەغەیەک دانیبوو ل سەر زانا و دەنگێ وێ دەرنەدکەت. لێ چ حکمەت بە د نەورۆزا دیاربەکرێ دە دەست ب دەستێ برایێ ئۆجالان دە کەتە د ناڤا قادا نەورۆزێ.
ل باژارێن مەزن جەهەپێ و قەندیل ل ھەڤکرنە. ل کوردستانێ رەوش جودایە. ژ خوە گەلەک دەڤەران جەهەپێ بەربژێر ژی دەستنیشان نەکرنە. دەڤەرێن وەک دیاربەکر وان و مێردینێ زەحمەتە ئاک پارتی یان پارتیەک دن سەربکەڤە، لێ دێ دەنگێن خوە زێدە بکن و دەم دەنگا کێم دکە. یانی ل باژارێن کوردستانێ دێ دەنگێن دەمێ ل گۆرا ھلبژارتنێن بەرێ کێم ببن. ئەڤ یەک ژی دبە دەستپێکا پێڤاژۆیەک دن د ناڤا دەمێ دە.
ڤەکری دخوەیە کو ناکۆکیا قەندیل و ئیمرالیێ دەستپێکریە، کی چەوا سەردکەڤە نایێ زانین. لێ قەندیل سەردەستە .
ئەگەر ئەنجامێن ھلبژارتنا باش بێنە نرخاندن و کوردێن دەرڤەیێ پەکەکێ ل باکور خوە ب ئاوایەکی ئۆرگانیزە بکن، دکارن پێڤاژۆیەکا نووژەن یا ئاشتیەکا راستەقێنە بپارێزن و خوە وەک موخاتەب بدن قەبوول کرن. ئەڤ زەمین ھەیە و گەلەک ژی بێ ھێزە. یا پێوست ئەوە کو ھندەک ل ڤێ یەکێ خوەدی دەرکەڤن و رێخستنێن جڤاکی یێن سڤیل بێخن د ناڤا تەڤگەرەکی دە.
ژ بۆ کوردان یا ب خێر چبە و چ بکاربە بکەڤە خزمەتا دەستخستنا مافێن نەتەوی یێن کوردان دە، ھێڤی ئەوە کو ئەو پێکوەرە.
رۆژەڤاکورد
