بەرەڤانیا شارستانی: ئاگرێ بازارێ چەلێ یێ دھۆکێ ھات کۆنترۆلکرن

ئاگر ب ھەژمارەک دوکانێن ناڤەندا باژارێ دھۆکێ کەت و بەرەڤانیا شارستانی یا دھۆکێ دبێژە، ئاگر ب تەمامی ھاتیە کۆنترۆلکرن.

ئیرۆ دانێ سبێ ئاگر ب ھەژمارەک دوکانێن بازارێ چەلێ یێ باژارێ دھۆکێ کەت و تیمێن بەرەڤانیا شارستانی ھەولا ڤەمراندنا ئاگری دا.

ژ ئالیێ خوە ڤە، بەردەڤکێ بەرەڤانیا شارستانی یا دھۆکێ بێوار عەبدولعەزیز گۆت، پشتی چەند دەمژمێران ژ ھەولێن تیمێن وان، ئاگر ھاتە کۆنترۆل کرن.

بەردەڤکێ بەرەڤانیا شارستانی دا زانین، چ زیانێن جانی چێنەبوونە، تەنێ 11 ئەندامێن تیمێن بەرەڤانیا شارستانی ژ بەر دوومانێ، تووشی بھنتەنگیێ بوونە.

بێوار عەبدولعەزیز دا زانین، زێدەتری 100 دوکانێن بازاری زیان دیتنە، لێ چ زیان نەگھشتیە مالێن نێزیکی بازارێ.

ھەروھا گۆت: “تەڤی کو سەدەما شەواتێ نایێ زانین، لێ کۆمیتەیەک ژ بۆ لێکۆلینکرنا سەدەما شەواتێ و دیارکرنا ئاستا زیانان ھاتیە پێکانین.”