وەلاتیێن ترکیێ و باکورێ کوردستانێ دوھ ژ بۆ ھلبژارتنا نوونەرێن خوەیێن د ئاستێن جودا دە چوون سەر سندۆقان.
سەرۆکێ کۆمیسیۆنا بلند یا ھلبژارتنێن ترکییێ دا خویاکرن، ژ سەدی 99.99 یا دەنگان ھاتنە ھەژمارتن و ل گۆر ئەنجامێن نەفەرمی، جەهەپێ 35، ئاک پارتی 24 و دەم پارتی 10 شارەداریێن مەزن و یێن باژاران بدەست خستنە.
تشتا کو د هەلبژارتنێن شارەداریان یێن ترکیێ بال کشاند سەرکەفتنا بەر ب چاڤ یا جەهەپێ د ڤان هلبژارتنان دە بوو، جەهەپێ هەژمارا دەنگێن خوە زێدە کرن و هەژمارەکا زێدەتر یا شارەداریان ب دەست خستن، ئاکەپە ژی وەکە وەنداکریا یەکەم یا ڤان هلبژارتنا هات دەستنیشان کرن، لێ سەرەرای کو دەم پارتیێ هەژمارا شارەداریێن خوە زێدە کرن ژی، لێ بەلێ ب بەراورد لگەل هلبژارتنێن شارەداریێن ترکیێ یێن سالا 2019 نێزیکی 2 مەلیۆن دەنگان کێم کرنە.
د دەمەکی دە کو هەژمارەک هەری زێدە کو تێ تەخمین کرن بگهیژە نیڤا دەنگدێرێن کورد ژ دەرڤەی باکورێ کوردستانێ دەنگێ خوە بکار ئانینە، لێ دەم پارتیێ ئەڤ دەنگدێر تەڤ کرن قوربانیێن جەهەپێ ب تەنێ ژ بۆی کو ل دژی ئاک پارتیێ دەرکەڤە.
پێنگاڤا یەکەم یا دەم پارتیێ ژ بۆی ئالیکاریکرنا جەهەپێ د هلبژارتنێن ستەنبۆلێ دە ئەڤ بوو کو ب گۆتنا دەمیرتاش نەکر و ل شوونا باشاک دەمیرتاش کەسەکی نەناسکری ژ بۆی شارەداریا ستەنبۆلێ نامزەت کر، ئەڤ ژی بوو سەدەم کو دەنگێن دەم پارتیێ د بەرژەوەندیا جەهەپێ دە کێم ببن و هەژمارەک زێدە ژ دەنگدێرێن کورد دەنگ ب نامزەتێ جەهەپێ بدن، لۆما ژی دەم پارتی پشتی ئاکەپێ خوەسارا دویەمینە د هلبژارتنان دە.
تەڤی کو دەم پارتیێ هەژمارا شارەداریێن خوە ژ 65 شارەداریان گهاند 82 شارەداریان لێ بەلێ ب بەراوردکرن لگەل هلبژارتنێن هەرێمی یێن سالا 2019 هەژمارا دەنگێن خوە کێم کرنە، ب ئاوایەکی کو د هلبژارتنێن 2024 دە دەم پارتیێ نێزی 2 مەلیۆن و 400 هەزار دەنگان ب دەست خستنە، د دەمەکی دە کو د هلبژارتنێن سالا 2019 دە 4 مەلیۆن و 500 هەزار دەنگ ب دەست خستبوون، ئانکو دەم پارتیێ نێزی 2 مەلیۆن و 100 هەزار دەنگان کێم کرینە.
ب کورتاسی ئەم دکارن ببێژن کو پشتی ئاکەپێ، دەم پارتی وەکە خوەسارا دویەمین یا هلبژارتنێن ترکیێ تێ حەسباندن.
