Skip to contentسهركهتنا بنكه‌تی!
هلبژارتنێن هه‌رێمی ل تركیێ و باكورێ كوردستانێ هاتن ئه‌نجام دایین، د ناڤبەرا پارتیێن سیاسی دە پێشبرکیەکە توند هەبوو، هه‌ڤركێن سه‌ره‌كه پارتیا ئاكه‌پێ و پارتیا جه‌هه‌پێ بوون، هه‌ڤركیا وان خوه‌دی دیرۆكه‌ك دوور و درێژه، هه‌ردو پارتى نه‌ته‌وپه‌رست و دژه كوردن، ب ت ئاوایی نه‌ئاماده‌نه مافێن نۆرمال یێن كوردان قه‌بوول بكن، ئاكه‌په ده‌ستهلاته و پرانیا سازیێن ده‌وله‌تێ د ده‌ست دا نه، جه‌هه‌په ژی مخالفه‌ته و د ڤێ هلبژارتنێ ده كاری به‌شه‌كی مه‌زن یێ شاره‌ده‌رییان ده‌ست بخه، لێ شاره‌دارییان ت باندۆرا خوه ل سه‌ر ستراته‌ژییا ده‌وله‌تێ تونه.
پسیکۆلۆژیا کوردان ل سەر ئەساسێ بەرخوەدانێ یە، ئه‌ڤ ژی ژ ئەنجاما زەخت و زۆرداریا دەولەتێن داگیرکەر دەرکەتیە هۆلێ، کوردێن باکورێ کوردستانێ ژ سەردەما ئیمپراتۆریا ئۆسمانی هەتا ئیرۆ نەکارینه ئازاد بژین، ئەڤ یەک بوو سەدەم کو مرۆڤێ کورد ل سەر سەرخوەبوونا خوە بفکرە. یەک ژ خالێن هەری گرینگێن کو مرۆڤێ کورد ل سەر وێ ئسرار دکە ئەوە کو هەبوونا خوە وه‌كه کورد بپارێزه، وه‌ختا فه‌رسه‌ند ژی چێدبه وی کوردایەتیا خوە بێ دودلی ئیلان کریە.
خورتبوونا هەستا کوردایەتیێ د ناڤ کوردێن باکورێ کوردستانێ دە، سه‌ده‌م بوو كو هەر کەس و شۆرەشەک کو ب ناڤێ کوردایەتیێ هاتبە کرن، خوه ژێ بێ بار نەكرنه و رۆلەکە مەزن تێده لیستنە و قوربانیێن بێ هەمپا دا نه ژ شۆره‌شێن شێخ سەعید پیران بگره و هەتا شۆرەشێن نوو.
پشتی کو دەولەتا ترک هات سەر دەستهلاتداریا دەمۆکراتیک، هەر کو ل ترکیێ کوردەک ئان پارتیەک خوە بەربژار بکرا، هەر چەند هەستا کوردایەتیێ یا هەری هندک هەبە ژی، کورد بێ دودلی دەنگێ خوە ددان وی كه‌سی ئان وێ پارتیێ، هه‌گه‌ر خوه بۆ خاپاندنێ ژی خوه وه‌كه كورد دابنه ناسكرن، هێژایە. بینن زمان کو کورد گەلەک جاران راستی خاپاندنێ هاتنه.
د هلبژارتنێن ڤێ داویێ یێن شارەداریێن ترکیێ دە، ده‌م پارتی ل سەر ناڤێ کوردان كه‌ته هلبژارتنێ ده.ئەم هەموو دزانین کو ده‌م – باسكێ سیاسی یێ پارتیا کارکەران په‌كه‌كێ یه، پارتیا كو ل سه‌ر ناڤێ كوردان ته‌ڤدگه‌ریت و د هه‌مان ده‌مێ ده ده‌ڤ ژ دۆزا كوردان به‌ردایه، وان به‌رێ بانگا سەرخوەبوونا کوردستانێ دكر، لێ ئیرۆ ئه‌و ڤەگوهەری دەمۆکراتیکبوونا تركیێ. دەمۆکراتیکبوونا جڤاکا ترکیەیێ و کۆنفەدەراسیۆنا جڤاکێن دەمۆکراتیک ل جیهانێ!.
پرتووکێن داوی یێن عه‌بدوڵاهـ ئۆجالان و نه‌رینا هەموو رێڤەبەرێن پارتیا کارکەران به‌لگه‌نه ل سه‌ر ڤێ ئاخافتنا مه. لێ ته‌ڤێ ڤێ ژ به‌ر كو پارتیا ده‌مێ ب كوردی بانگ كر و پرانیا نامزه‌دێن وێ كورد بوون و ستران و ئاوازێن كوردی پێشكێش كرن، گەلێ کورد ل باکور جارەکە دن رێژەیەکە گەلەک باش ژێ دەنگێن خوە دان ده‌م – پارتیێ، پرانیا دەنگدەرێن كورد باوەرییا وان ب ستراتەژییا ده‌م – پارتیێ تونه. لێ چما ده‌نگ دانێ؟، ده‌نگدایینا كوردێن باكور بۆ ده‌م – پارتیێ بۆ وێ ڤه‌دگه‌ره كو كورد ژ ترکیێ رە ببێژن: «ئەم کوردن و باشوورێ ترکیێ کوردستانە و تم ل جه‌م مه باکورێ کوردستانێ یه».
لێ چما سهركهتنا مرى؟
راستە کوردێن باکورێ کوردستانێ دەنگێن خوە نەدان پارتیێن ترکپارێز و دەنگێ خوە دانە پارتیێن ب کوردی دئاخڤن، لێ جارەک دن وەک هەر جار ده‌م – پارتی شاشێتیه‌ك ستراتەژیک كر، كو خوه كره ته‌ره‌ف د هه‌ڤركییا دو پارتیێن نه‌ژاد په‌رست ده (ئاكه‌پێ و جه‌هه‌پێ)، پارتیا – ده‌م ل باژارێن مەزن ل هەمبەری ئاکه‌پێ پشتگری دا جه‌هه‌پێ و جه‌هه‌په ب سەر کەت.
دڤێ ئەز ببێژم کو راستە ده‌م – پارتی د داخویانیا خوە دە گۆتبوو کو ئەمێ ڤێ جارێ رێیا سێیەمین بگرن، ئه‌ڤ ژی نه‌رینه‌ك باش بوو کو نه‌به ته‌ره‌ف ل گه‌ل ئالیه‌كی ل دژی ئالیه‌كی دن، هه‌ر وها نه‌رینه‌ك باشبوو ژ بۆ كو ئه‌م بكارن ببێژن پرسگرێكا مه ل باكور نه‌ته‌وی یه، نه پرسگرێكا ده‌ستهلاتێ یه.
لێ ده‌م – پارتی ل گۆری ڤێ ته‌ڤنه‌گه‌ری، خوە داخست ئالیەکی و ئه‌شكه‌ره پشتگری دا جه‌هه‌پێ، ئه‌ڤ یێك ژ ئاکه‌پێ رە گه‌له‌ك باش زه‌لال بوو، ئاكه‌په نها پارتیا دەستهلاتدارە و دکارە ل دژی کوردان گه‌له‌ك گاڤان باڤێژه، یا هه‌ری نێزیك سیسته‌ما قه‌یووم وەک هلبژارتنێن 2019ان، راستە سیستەما قه‌یوومان کارەکی نه یاسایی یە، لێ ژ بۆ دەستهلاتا وێ دبه یاسایی.
لۆما ژی ئەز دبێژم سەرکەفتنەک مری پێک هاتیە.
