بووبێ ئەسەر

فەلسەفە ئانکو رێباز ئەوە کو ژ بۆنا دۆزا گەلێ خوە دڤێت مرۆڤ سەرێ خوە ل ھەمبەر دژمن و دژبەرێ خوە نەتەوینە، خوە نزم و بچووک نەبینە ئانکو خوەنەچەمینە. ئەڤ د رێبازێ دە پر ب زەلالی و ڤەکری ھاتیە دەستنیشانکرن.

ئەم ڤێ ب وان کەس و کەسایەتن کو ب رێبازێ باوەرن، د ژیان و تەڤگەرێن وان دە دبینن. ژ بەر کو رێبازا ملەتەکی، خەلکەکی، پارتی و تەڤگەران، وێ یەکێ نیشان ددە کو دڤێت مرۆڤ چاوا ل ھەمبەر دژمنێ خوە تەڤبگەرە یان دگەرە. رێبازا پیرۆز ژی ڤێ نیشانی کوردان ددە.

مرۆڤ د رێبازێ دە دبینە کو ھەمی سەرکێش و دامەزرینەرێن ڤێ رێبازا پیرۆز دەستپێکێ خوە و پشترە گەلێ خوە فێری وێ یەکێ دکن کو ل ھەمبەر دژمنێ خوە، خوە نەچەمینن ئانگۆ سەرێ خوە نەتەوینن و نزم نەکن. ژ بەر کو خوەچەماندن ژ بۆنا رێبەر و سەرکێشان خالا روورەشیێ یە.

لۆما سەری تەواندن تێ وێ واتەیێ کو ئێدی تو نکاری ژ بۆنا ئازادیا گەلێ خوە ب رەحەتی و وێرەکی تەڤبگەری. ژ بەر ڤێیە کو ئەڤ خال ژی د رێبازێ دە ھاتیە دەستنیشانکرن کو دڤێت ملەتێ کورد، سەرۆک و رێبەرێ وی ڤێ فێر ببن.

ھەتا کو رێبەر و تەکۆشەرێن گەلێ خوە باش فێری ڤێ خالا پیرۆز نەبن، ئەو نکارن تەکۆشینا گەلێ خوە ل سەر ئەساسێ راستی و دەمۆکراسیێ پێشڤە ببن. لۆما دڤێت ل جەم سەرۆک و رێبەرێن گەلێ خوە، سەری تەواندن ئانکو خوەچەماندن تونە بە.

ھەگەر ئەم ڤێ ڤەکن ئەم دێ ببینن کو دەما بارزانیان دەست ب تەکۆشینا رزگارکرنا گەلێ خوە یا ژ بن زۆلما داگیرکەریێ کری، دەستپێکێ خوە فێری ڤێ یەکێ کرن و ئەڤە کرە خالەک ژ خالێن رێبازا پیرۆز.

ژ بەر کو سەری نەتەواندن یان خوەنەچەماندن تێ وێ واتەیێ کو دڤێت تو بێ ترس ل ھەمبەر داگیرکەر، دژمن و نەیارێ خوە ب وێرەکی شەرێ ئازادیا گەلێ خوە بکەی. لۆما بارزانیان د ھەمی تەکۆشینێن خوە دە ئەڤ خال پێک ئانینە و تینن.

دەما شێخ محەمەدێ بابێ بارزانیێ نەمر خوەست سیستەما ئاغاتیێ ژ کوردستانێ راکە، ھەمی ئاغا بوونە یەک و ل ھەمبەر وی ھەلوەست نیشان دان. ب ڤی ژی نەسەکینن. ھەر رۆژ وان شێخ محەمەد ل با رێڤەبرێن عۆسمانیان، بۆختان و دەرەو لێ دکرن کو عۆسمانی وی بگرن ئان تونە بکن.

لێ شێخ محەمەد ژ بریارا خوە ب باوەر بوو. لۆما ل ھەمبەر ھەمی ئاغایێن دژمناتیا وی دکرن خوە نەچەماند. سەرێ خوە ل ھەمبەر دەولەتا عۆسمانی، نەتەواند. ڤێ بریار و کریارێ ئەو ب سەرخست و سیستەما ئاغاتیێ ژ باشوورێ کوردستانێ ب ئاوایەکی بێ خوین راکر. ھەلبەت ئەڤ نە کارەکی ھێسان بوو. لێ وێرەکیا وی ژ بەر وێ خالا رێبازێ پێک ھات و دھات.

دەما ئەم ل دیرۆکا بارزانیان دنێرن یەک ژ وان ژی ل ھەمبەر داگیرکەرێن خوە، خوە نەچەماندن و تم ژ بۆنا ئازادی و سەربەستیا گەلێ خوە کار و خەبات کرنە. نە زیندانێن داگیرکەران و نە ئاغا و سیخورێن کورد سەری ل وان نەتەواند.

دەما رێڤەبرێن عۆسمانیان، شێخ محەمەد گرتی و کریە د زیندانێ دا، داخوازا وان ژ وی ئەو بوو کو ھەگەر لێبۆرینا خوە ژ عۆسمانیان بخوازە دێ وی ئازاد بکن. لێ شێخ محەمەد چ جاران ئەڤە قەبوول نەکر. خوە ل ھەمبەر عۆسمانیان نەچەماند و د داخوازا خوە دە ب سەرکەت.

دەما دەستھلاتا ئیراقێ ژی شێخ ئەحمەد گرتی و کریە د زیندانێ دە، وان ژ وی خوەست کو ئەو لێبۆرینا خوە بخوازە دا کو وی ئازاد بکن. لێ شێخ ئەحمەد ژی وەکە بابێ خوە، سەرێ خوە ل ھەمبەر وان نەتەواند و د خوەستەکا خوە دە ب سەرکەت.

داگیرکەرێن ئیراقێ پر دخوەستن کو بارزانیێ مەزن ژی ژ بەر تەڤگەر و سەریھلدانا خوە لێبۆرینێ ژ وان بخوازە، لێ وی ژی ب چ ئاوایان ئەڤە نەکر. تم ژی ل ھەمبەر زلم و زۆرداریا وان تەکۆشینا گەلێ خوە دۆماند.

دەما کو ئەم دیرۆکا بارزانیان یا ژ عەبدولسەلامێ یەکەم و ھەتا نھا ھاتیە، بشۆپینن و فێر ببن، ئەم دێ ببینن کو وان چ جاران ل ھەمبەر داگیرکەر و دژمنێ گەلێ خوە، سەرێ خوە نەتەواندن ئانکو خوەنەچەماندن. لۆما ئەڤ بوو خالەک ژ خالێ رێبازێ کو ئەو کەسێن ب ڤێ رێبازێ باوەر بن، دڤێت ب ڤی رەنگی پەروەردەھیا خوە بگرن. ل دیرۆکا بارزانیان و یا کەسێن ب ڤێ رێبازێ باوەرن، بنێرن ھوون دێ ببینن کو خوەچەماندن ئانکو خوە نزمکرن ژ ژیانا تەماما بارانیان تونە بوو و تویە.

ئەز دخوازم ڤێ نڤیسا خوە ژی ب میناکەکێ بقەدینم دا کو ئەم بزانبن بێ خوە نەچەماندن ئانکو سەری ل ھەمبەر دژمن نەتەواندن، دناڤا بارزانیان دە چاوا پێک ھاتبوو و تێ.

د رۆژا 8-4-1963 دە د ناڤبەرا جێشا ئیراقێ و پێشمەرگەیێن قەھرەمان دە شەرەکی مەزن دەردکەڤە. ئەو شەر دبە شەرێ ھەبوون و نەبوونێ. لۆما پێشمەرگەیێن قەھرەمان ب چەکێن خوە یێن کێم و نە مۆدەرن ل ھەمبەر جێشەکا وەکە یا ئیراقێ کو ئینگیلیز ژی ل پشتا وان بوو، شەرەکی مەزن دەستپێ دکن.

ژ بۆنا ھەمی پێشمەرگە ل گەل سەرۆکێ وان بارزانیێ مەزن تونە نەبن و خوە ب ئاوایەکی رێ و رێبازەکێ ل گەل کێم وەندابوونێ، خەلاس بکن. پێشمەرگەیێن بارزانیێ نەمر یێن ب ناڤێن حوسێن محەمەد مێرگەسۆری، شیتی سەرکێری، سەیید تاجەدین سەرکێری و ئەحمەد شێخزادە زێوکی، د کۆزکا خوە دە خوە ب ھەڤ گرێ ددن و ل ھەمبەر جێشا ئیراقێ شەرێ نەمانێ دکن. ب وی شەری ژی دخوازن پێشمەرگەیێن دن بەر ب چیایێ ئاسێ برەڤن دا کو ھەمی ژ مرنێ خلاس ببن. ھەر وەھا ژی دبە.

ئەو جانفەدایێن کوردستانێ، شەرەکی مەزن دکن و ب سایا وی شەری ئەو پێشمەرگەیێن قەھرەمان ژ مرنێ ئازاد دبن. لێ ھەرچار قەھرەمان ژی دبن جانگۆری. ئاھا ئەڤە رێباز و پێکانینا رێبازێ یە. ئاھا ئەڤە، باوەریا رێبازێ ددە مرۆڤی. ئاھا ئەو باوەری بوو کو د شەرێ سەد سالان دە ئەم کورد بوونە خوەدی پەرچەیەکێ ئازاد.

رێباز نە ئەوە کو مرۆڤ تەنێ ب دەڤکی بێژە. دڤێت مرۆڤ خالێن وێ د ژیانێ دە، وەکە ھەمی سەرۆک و رێبەرێن ژ بارزانیان و پێشمێرگەیێن وان یێن قەھرەمان پێک دھات، پێک بینە. ژ بەر ڤێیە سەرینەتەواندن ئانکو خوەنەچەماندن بوویە خالەک ژ خالێن ڤێ رێبازا پیرۆز یا ھێژا ب قیمەت و روومەت. لۆما کەسێن ب ڤێ رێبازێ باوەرن، ب روومەت و قیمەتن.