بووبێ ئەسەر
ژیان ب خوە راگرتنێ دەرباس دبە. ھەگەر مرۆڤ خوە فێری وێ نەکە، مرۆڤ ھم خوە و ھم ژی ھەبوونا خوە وەندا دکە. لەورا بارزانیان ئەڤ ژی کرنە خالەکا ڤێ رێبازا پیرۆز..
خوە راگرتن تێ واتەیا، بێھنفرەھی، سەبر و سووکوونەتێ. واتە دڤێت مرۆڤ ل ھەمبەر ھەر کریار و بوویەرەکێ خوەدی خوە راگرتنێ بە دا کو مرۆڤ بێتر شاشیان نەکە.
رۆژا کو بارزانیان دەست ئاڤێتن کارێ ژ بۆنا ئازادی و سەرخوەبوونا کوردستانێ ل سەر ڤێ گەلەکی فکرین و راوەستیان دا کو بکاربن مافێ گەلێ خوە ب بێھنفرەھی بێ کو وەنداکرنێن مەزن بکن، ب دەست بخن.
وەکە ئەم دزانن بارزانیان ئەڤ خال ژی باش و رند پێک ئانییە. لەورا ژ بەر ڤێ گرینگیێ بوو کو وان ئەڤ ژی وەکە خالەکا رێبازا پیرۆز حەسباندن.
دەما کو ئەم دیرۆکا بارزانیان دخوینن، دبینن کو وان گەلەک غەدر و ئێخسیری دیتنە. گەلەک زلم و زۆرداری ل وان ھاتنە کرن. لێ وان ھەر خوە راگرتنە ھەتا کو فرسەت کەتیە دەستێ وان. ژ بەر کو ل ھەمبەر وەنداکرن، نە ب سەرکەتنێ و د تێکچوونێ دە تو خوە رانەگری، تو دێ ب تەمامی وەندا کی. ژ بەر ڤێیە کو رێباز بێھنفرەھی، ئارامی و خوەدی سەبرەکا بەردەوامە.
بارزانیان د تەکۆشینا خوە یا ژ بۆنا ئازادی و سەرخوەبوونا کوردستانێ دە گەلەک جاران وەندا کرنە. خوە راگرتنە ھەتا کو مەجال دیتنە. کەتن و رابوونا وان ئەڤ سەد سالێن کو وەھا دەرباس بوویە. لۆما ھن جاران وەندا کرنە لێ ب تەمامی تێک نەچوونە.
ئەم بالا خوە ددنێ کو حکوومەتێن ئیراقێ یەک ل دو یەکێ ھەر زلم و زۆرداری، کوشتن و قەتلیعامێن مەزن ل ھەمبەر بارزانیان و گەلێ کورد کرنە. لێ وان چ جاران نکاریبوون بارزانیان ب تەمامی تێک ببن و تونە بکن. ژ بەر کو ئەو خوەدی رێبازەکێ و د رێبازێ دە خوەدی خالا خوە راگرتنێ بوون.
ژ خوە ئارمانج و ھەدەفا ھەر چار داگیرکەرێن مە تم ئەو بوو کو بکاربن ب ھەڤرا بارزانیان نەھێلن. ژ بەر کو وان باش دزانیبوون، ژ ھۆلێ راکرن یان تونەکرنا بارزانیان دھات واتەیا تونەبوونا ھەمی کوردان. لێ بارزانیان ژی د ھەر وەنداکرنەکا خوە دە خوەراگرتنە ھەتا کو ژ نوودە رۆژا بەرخوەدانێ ب دەست خستنە.
لێ ئەم دبینن د ھەر وەنداکرنەکێ دە و ژ نوودە ل ھەمبەر دژمن سەری راکرنێ دە بارزانی ب ھێزەکا مەزنتر و ب باوەریەکا خورتر دەرکەتنە پێشبەری داگیرکەرێن خوە. لۆما خالا خوە راگرتنێ خالەکا رێبازێ یا سەرەکی و گرینگە.
دەما پەیمانا جەزایر یا د سالا 1975 دە د ناڤبەرا ئیراق و ئیرانێ دە پێک ھات. ھەرکەسێ باوەری ئانیبوون کو ئێدی دێ داویا بارزانیان و تەڤگەرا گەلێ کورد بت. ژ بەر کو ئەو پەیمان ل سەر ئەساسێ تونەکرنا ملەتێ کورد و ژ ھۆلێ راکرنا بارزانیان بوو.
لێ بارزانیان ل ھەمبەر وێ پەیمانێ خوە راگرتن، ژ بۆنا دەمەکێ وەندا کرن، لێ تێکنەچوون. خوە ل ھەمبەر ھەمی پلانێن داگیرکەران راگرتن، ھەتا کو مەجال دیتن. دیسا و ب ھێزەکا مەزنتر و ب باوەریەکا بھێزتر دەست ب شۆرەشا خوە یا ب سەرپەرەشتیا “قیادا مووەقەت” کرن.
ب گۆتنەکا دن بارزانیان گەلەک جاران ل ھەمبەر داگیرکەرێن خوە وەندا کرنە. لێ نەقەدیانن و ب تەمامی تێک نەچوونە. ھەر وەنداکرنەکا وان ب سەرکەتنەکا مەزن ژ نوودە ھاتیە دەستپێکرن.
ئەڤ ژی ب مە ددە زانین کو دەما تەڤگەرەک، پارتیەک یان سەرکێشێن ئازادیا وەلاتەکی بێ رێباز بن، ئەو دێ وەندا بکن و تێک ھەرن.
ئەم ڤێ رەوشێ ل باکورێ کوردستانێ ب رەحەتی دبینن. کیژان سەریھلدان و بەرخوەدانا کوردان وەندا کربوون، ئەو وەنداکرن دبوو داوی ئانینا وان ژی. لۆما ل باکورێ کوردستانێ ھەتا نھا کورد ب سەرنەکەتن.
بارزانیان خالا خوە راگرتنێ ب ھەمی گەلێ خوە ژی دانە زانین کو د دەمێن وەنداکرنێ دە دڤێت خوەراگرن ھەتا کو مەجالەکێ نوو ب دەست بخن دا کو تەکۆشینا خوە بەردەوام بکن.
بارزانیان ب ڤێ یەکێ خوە و ھەمی ملەتێ خوە فێری خالا خوە راگرتنە کرنە دا کو ب تەمامی تێک نەچن. ھەگەر ئەم ل دیرۆکا باشوورێ کوردستانێ یا ئەنفالێ و یا حەلەبچەیێ بنێرن ئەم دێ بینن کو گەلێ مە ل ھەمبەر ڤان کریارێن ھۆڤانە، خوە چاوا راگرتیە ھەتا کو ب سەرکەتیە.
ژ بەر ڤێ بوو کو بارزانیان ب تەکۆشینەکا دوور و درێژ، ب بەرخوەدانەکا وێرەکی، ب سەبر و سووکوونەتەکا مەزن خوە ل ھەمبەر ھەمی ئێریشێن داگیرکەران راگرتن ھەتا کو باشوورێ کوردستانێ رزگار کرن.
پشتی رزگاریێ و رەفراندووما سەرخوەبوونێ ھەرکەس ئانکو ملەتێ کورد ل بەندێ بوون کو سەرۆک مەسعوود بارزانی، سەرخوەبوونێ راگھینە. لێ وی ب سەبر و سووکوونەتا خوە، خوە راگرتیە ھەتا کو رۆژا وێ بێ. دەما کو ئەو رۆژ ھات دێ سەرخوەبوونا کوردستانێ ب مزگنیەکێ بدە گەلێ خوە.
لۆما پشتی رەفراندووما کوردستانێ سەرۆک بارزانی کلیتا سەرخوەبوونێ کرییە بەریکا خوە و دەستێن کوردان دە. نھا خوە رادگرە ھەتا کو ئەو مەجال پێک بێ. دەما شەرت و مەرج خولقین دێ وێ دەمێ ڤێ مزگینیا کو ملەتێ کورد ل بەندێ یە، بدە وان.
