د دەمەکێ دە کو ئامەریکا و وەلاتێن دن یێن زلهێز بانگ ل کاربدەستێن ئیسرایلی دکن کو خوە ناس بکن و بەرسڤەکە لەشکەری نەدن ئێریشێن تێکچوویی یێن ئیرانێ ل سەر خاکا ئیسرایل، لێ بەلێ ئیسرایلێ ژی گۆت کو ئەو نەچارن بەرسڤێ بدن ئەگەر بەرسڤا ئیران نەدن، رەژیما ئیسلامی یا تەھرانێ دێ ئێریشێن خوەیێن ل ھەرێمێ دژوارتر و گورتر بکە.
پشتی ئێریشا چەند شەڤ بەرێ یا ئیرانێ بۆ سەر ئاخا ئیسرایلێ، کو زێدەتری 300 فرۆکەیێن بێ فرۆکەڤان و مووشەک بکار ئانین، ئامەریکا و ئیسرایلێ راگھاندن کو %99 فرۆکەیێن بێ فرۆکەڤان و مووشەکێن ئیرانێ هەر ژ ئەسمان ھاتنە پووچکرن و تەنێ ھەژمارەکە کێم ژ مووشەکێن بالستیکێن ئیرانێ ل ناڤ ئاخا ئیسرایلێ کەتنە کو ئەو ژی ل ئارمانجێ نەکەتنە و د ئەنجاما ئێریشان دە تەنێ زارۆکەک بچووک ب سڤکی بریندار بوویە. یەکسەر پشتی وێ ئێریشێ، پرانیا وەلاتێن مەزنێن جیھانێ ئێریشێن ئیرانێ شەرمەزار کرن و داخواز ژ ئیسرایلێ کرن کو خوە ژ بەرسڤدایینێ دوور بخە و مەترسیا شەرەکی بەرفرەھ ل رۆژھلاتا ناڤین کێم بکە. گەلەک ژ وان وەلاتان پووچکرنا ژ سەدی 99 یا فرۆکەیێن بێفرۆکەڤان و مووشەکێن ئیرانێ ژ ئالیێ ئیسرایلێ ڤە، وەکە سەرکەفتنا ئیسرایلی و شکەستنەکە شەرمەزاری یا ئیرانیان ب ناڤ کرن و داخواز ژ ئیسرایلێ کرن کو خوە ژ تۆلھلدانێ دوور بخە. هەتتا ئامەریکا ژی کو وەکە دۆستێ ھەری نێزیکێ ئیسرایلێ تێ ناسکرن، گۆتیە، ئەگەر ئیسرایل ئێرشی ئیرانێ بکە، ئامەریکا ئالیکاریا وێ ناکە.
پشتی چەند دەمژمێران ژ ئێریشێ رەژما ئیرانێ راگھاند کو ئێریشێن خوە ب داوی ئانینە و ئەگەر ئیسرایل ل ڤان ئێریشان بگەرە ئیران ئێریشەکە دن ناکە.
وەزیرێ پاراستنێ یێ ئیسرایلێ: ژ بلی بەرسڤدایینا ئێریشێن ئیرانێ ت چارەیا مە نەمایە
ئاژانسا ئاکسیوس ژ زارێ بەرپرسەکی پلەبلندێ ئامەریکی راگهاند، وەزیرێ بەرەڤانیا ئیسرایلێ ژ وەزیرێ بەرەڤانیا ئامەریکایێ رە گۆتیە، دڤێت وەلاتێ وی بەرسڤا ئێرشێن ئیرانێ بدە و ئیسرایل نکارە ل ھەمبەر وەلاتەکی کو خاکا وان ب مووشەکێن بالیستیک کریە ئارمانج، بێدەنگ بمینە.
هەڤدەم، تەڤی کو ئەل-عەرەبیە راگھاند کو کابینەیا شەری یا ئیسرایلێ د جڤینا خوە دە نەگھیشت رێکەفتنەکێ دەربارێ چاوانیا بەرسڤدانا ئێریشێن ئیرانێ، لێ ھندەک مەدیایێن ئیسرایلی راگھاندن کو بەرپرسێن ئیسرایلی رازی بوونە ب ئارمانجکرنا هندەک خالێن گرینگ د ناڤا خاکا ئیرانێ دە و ب ڤی ئاوا بەرسیڤەکا توندا رەژیما ئیرانێ بێ دایین، د ڤێ دەربارێ دە بەردەڤکێ حکوومەتا ئیسرائیلێ تەکەز کر کو ئیسرایل ڤێ مافێ ژ خوە رە ب رەوا دزانە کو هەر تشتەک د شیانا وان دە بە ژ بۆی بەرەڤانیکرن ژ وەلاتێ خوە بکە.
ئاژانسا NBC راپۆرەک دەربارێ جڤینا کابینەیا شەری یا ئیسرایلێ پارڤە کر وە ئێماژە ب ڤێ یەکێ کر کو بریار ستەندیە بەرسڤا ئێریشا ئیرانێ بدن و تەکەز کر کو دڤێت بەرسڤ دەمکورت بە ب ئاوایەکێ کو نەبە سەدەما شەرەکی بەرفرەھ.
ھەژمارەک ژ بەرپرسێن پلەبلندێن لەشکەری یێن ئیسرایلێ راگھاندن کو ب ژناڤبرنا ژ سەدی 99ێ فرۆکەیێن بێ فرۆکەڤان و مووشەکێن کو ئیرانێ ئاڤێتنە ئیسرایلێ، مە ھندەک ژ شیانێن بەرەڤانیێ یێن وەلاتێ خوە نیشانی ئیرانیان دان و دڤێت ب ئێریش کرنە سەر ئیرانێ شیانێن وەلاتێ خوە د وارێ ئێریش کرنێ ژی نیشانی ئیرانێ بدین ژ بۆی کو ئێدی جارەکە دن هزر د ئێریشکرنە سەر ئیسرائیلێ دە نەکە.
تەکەزکرنا بەرپرسێن سیاسی و لەشکەری یێن ئیسرایلێ ل سەر بەرسڤدانا ئێریشێن ئیرانێ، ئیحتیمالا ئێرشا لەشکەرییا ئیسرایلێ بۆ سەر خاکا ئیرانێ زێدە کریە. ھەلبەت ئیسرایلی شەرەکی دن ناخوازن، لەوما ژی دبێژن دخوازن ئێریشێن خوە سینۆردار بکن و ل ھەرێمێ شەرەکی مەزن دەرنەکەڤن. ھن لێکۆلینەرێن ھەرێمی د وێ باوەریێ دە نە کو یەک ژ وان فاکتۆرێن کو رایەدارێن ئیسرایلی هانددە کو ئێرشی سەر ئاخا ئیرانێ بکن، لاوازبوونا ئیرانێیە کو د ئێریشا شەڤا بۆری دە ژی دیار بوو. پشتی ئێریشا حووسیان ل سەر تەسیسێن پەترۆلێ یێن ئارامکۆیێن سعوودی، کو ھەلبەت ب مووشەکێن ئیرانێ هاتبوو ئەنجامدایین، جڤاکا ناڤنەتەوەیی، د سەری دە ئامەریکا و ئیسرایل، دەربارێ شیانا مووشەکی یا ئیرانێ نیگەران بووبوون، لێ یا کو د ئێریشا چەند شەڤ بەرێ دە روو دابوو خویا کر کو ئیران پڕ لاوازترە ژ وێ یەکێ یا وان هزر دکر و هەتتا ل سەر لاوازیا ئیرانێ د سۆسیال مەدیایێ دە حەنەک ب ئیرانێ دهاتن کرن و ئالیگرێن رەژێما ئیرانێ ژی راستی شەرمێ هاتبوون.
فاکتۆرەکە دن یا کو دکارە ئیسرایلێ هان بدە کو ئێرشی ئیرانێ بکە، ناڤەندێن ئەتۆمی یێن ئیرانێ نە، کو ئیسرایلێ زانیاریێن بەرفەرەھ دەربارێ ئاستا پێشکەتنا وان ناڤەندان نینە و نھا ژی کو ئیسرایلێ بەھانەیەک ھەیە ئێرشی وان بکە، دبە کو ئیسرایل نەخوازە ڤێ دەرفەتێ ب ھێسانی ژ دەست بدە. هەر وەها هات راگهاندن، ئاژانسا ناڤنەتەوی یا ئەنەرژیا ئەتۆمێ رۆژا یەکشەمێ کارێن چاڤدێرێن خوە ل چەند ناڤەندێن ناڤۆکی یێن ئیرانێ ژ بەر سەدەمێن ئەولەھیێ راگرتن.
ئیسرایل خوەدی ئەزموونەکە دن یا ب ڤی رەنگییە، دەما کو رەژیما بەعسا ئیراقێ د سالا 1991 دە ب فەرمانا سەدام حوسێن دەست ب ئێریشێن مووشەکی ل سەر خاکا ئیسرایلێ کری، حکوومەتا تەل ئەڤیڤێ یا وێ دەمێ ل سەر داخوازا ئامەریکا و ھەڤالبەندێن وێ بەرسڤ نەدا، ئەڤ ژی بوو سەدەم د ناڤا ئیسرایلێ دە حکوومەت وەرە رەخنەکرن. دبە ڤێ جارێ ئیسرایل نەخوازە گوھ بدە داخوازێن ئامەریکا و ھەڤپەیمانێن دن. ئاژانسێن نووچەیان یێن ئیسرایلی راگھاندن کو نەتانیاھو رەد کر کو بەرسڤا تەلەفۆنا ھندەک سەرۆکێن ولاتان بدە ژ بەر کو ناتانیاهو هزر دکر ئەڤ کەسانە دێ ژ وی داخواز بکن کو بەرسڤێ نەدە ئێریشێن ئیرانێ.
ھەر چەند ئیسرایل، ئیران، ئامەریکا و ھەموو ھێزێن مەزن ل گەل دەستپێکرنا شەرەکی نوو ل رۆژھلاتا ناڤین نینە و د بەرژەوەندیا خوە دە نابینن، لێ خویایە ئیسرایل ڤێ فرسەندێ ژ بۆی ئێریشکرنە سەر ئیرانێ ب ھێسانی ژ دەست نادە. تێ چاڤەرێکرن کو ئیسرایل چەند دەڤەرێن لەشکەری یێن ستراتیژیکێن ئیرانێ وەکە دەڤەرێن (کارخانەیێن بەرهەمئانینا فرۆکەیێن بێ فرۆکەڤان و مووشەکان و ھەروھا ناڤەندێن ناڤۆکییێن ئیرانێ) بکە ئارمانج، ب ئاوایەکی کو کێمترین زیانێن مرۆڤی چێببن و رەوش بەر ب شەرەکی بەربەلاڤ و گشتگیر ڤە نەچە.
رەژیما ئیرانێ گەف خواریە ئەگەر ئیسرائیل ئێریشی وان بکە هەر د یەکەم سانیە دە وێ بەرسڤا ئێریشێ بدە، لێ ل گۆر ئێرشێن چەند شەڤێن دەرباسبوویی بە، دبە کو گەفەکە زێدە ل سەر ئیسرایلیان چێنەکە. دیرۆکێ دیار کریە ھەر دەما کو بەرپرسێن رەژیما ئیسلامییا تەھرانێ دزانیبوون کو مانا وان د دەستهلاتێ دە کەتیە د مەترسیێ دە، نەرمیێ نیشان ددن.
کاربدەستێن ئیسرایلی تەکەز کرن کو ئێریشێن ئیسرایلی بەرۆڤاژی وێ یا کو ئیرانێ کری، وێ ئامانجدار بن و سەرۆکێ کۆمیتەیا بەرەڤانی و سیاسەتا دەرڤەیا پارلەمانا ئیسرایلی د داخویانیەکێ دە ژ بۆی سکای نیوس گۆت، ئێریشێن ئیسرایلی دێ تەھرانێ شۆک بکن. هەڤدەم رادیۆ و تەلەڤزیۆنا ئیسرایلێ ژ زارێ کاربدەستەکی پایەبلند راگھاند کو ھێزێن ئەسمانییێن ئیسرایلێ ژ بۆ لێدانا ئیرانێ ئامادە نە.
ئەشکەرەیە کو ل گۆری ئەزموونێن بەرێیێن وەکی ئێریشا مووشەکییا ل سەر بارەگەھا لەشکەرییا عەین ئەسەد ل ھەمبەر کوشتنا قاسم سلێمانی و ھەتا ئێریشا ئیرانێیا ڤێ داویێیا ل سەر ئیسرایلێ، وسا خویا دکە کو گەفێن ئیسرایل و داخویانیێن رۆژاڤا و ئامەریکایێ زێدەتر وەکە فەشارەکی ژ بۆی لهەڤهاتنەکە دو ئالی یان چەند ئالی بێن کرن، و دبە هەگەر لهەڤهاتنەک بێ کرن ئیسرایل قەت ئێریش نەکە یان ژی هەگەر ئێریش بکە ئێریشێن وێ پر سینۆردار بن. ھەر چەند ئیران و ئامەریکا د رەوشێن ب ڤی رەنگی دە راستەراست یان نەراستەراست د ناڤا پەیوەندیان دە بوون، لێ دڤێ ئەم ژ بیر نەکن کو ئێریشا راستەراستا ئیرانێ بۆ سەر خاکا ئیسرایلێ، لاوازییا ئیرانێ و سەروەریا لەشکەرییا ئیسرایلێ ھەڤکێشەیێن بەرێ گوھەرتینە و رەوشەکە نوو دەرخستیە ھۆلێ.
ژ ئالیەک دن ڤە رۆژنامەیا واشنگتۆن پۆست راگھاند کو زێدەتری 60 پارلامەنتەرێن کۆماری ل مەجلسا نوونەرانا ئامەریکایێ پێشنووماقانوونەک ئامادە کرنە کو تێ دە 11 کۆمێن ملیسێن ئیرانییێن ل ئیراق، سووریە، یەمەن و لوبنانێ وێ د لیستەیا رێخستنێن تەرۆریست دە جھ بگرن و رێڤەبەریا بایدن ناچار دکە وەکی رێخستنێن تەرۆریستئ سەرەدەری ب وان رە بێ کرن. چەند وەلاتێن دنێن رۆژئاڤایی ژی دبێژن، دڤێ سوپایێ پاسدارێن ئیرانێ بکەڤە د لیستەیا رێخستنێن تەرۆریست دە. رۆژێن پێش مە دێ نیشانی مە بدن کا فشارێن دیپلۆماتیک وێ کاریگەر بن و ئیسرائیلێ رازی بکن کو ئێرشی ئیرانێ نەکە یان ئەمێ ببن شاھدێ ئێرشەک لەشکەرییا ڤەکرییا ئیسرائیلێ د کووراھیا ئیرانێ دە.
