بووبێ ئەسەر
تفاق تشتەکی وەھایە کو مالباتان ل سەر لنگان دھێلە، یەکتیا عەشیران خورت دکە و پاراستنا دەولەتان ژی ب رێیا وێ تێ مەشاندن.
ھەگەر د ناڤا مالباتەکێ دە تفاق تونە بە، مالبات چقاسی خورت و دەولەمەند ژی بە، دێ رۆژەکێ روو ب روویێ ژھەڤ بەلاڤبوونێ ببە. تفاق بنگەهێ ھەڤگرتنا مالباتێ یە. مالبات ژی عەشیرە، عەشیر ژی دەولەتە.
دەما مالباتەک بێ تفاق بە و نە ل ھەڤ بە، وێ تم وەندا بکە. د ناڤا ئێل و عەشیران، د ناڤا تەریقەتان دە تفاق تونە بە، ئەو ئێل، عەشیر و تەریقەت چقاسی خورت ژی بن دێ رۆژەکێ ببن کۆلەیێن سەردەستێن خوە.
د ناڤا ملەتەکی دە ژ بۆنا بەرژەوەندیێن نەتەوەیی ل ھەڤکرن تونە بە، ئەو ملەت زەحمەتە کو ببە دەولەت و دێ رۆژەکێ وەکە ملەت ژی نەمینە.
ژ بەر ڤێ گرینگیێ بوو کو بارزانیان ئەڤ ژی د رێبازێ دە وەکە خالەک سەرەکی و گرینگ دەستنیشانکرنە دا کو ملەتێ کورد تفاقا ناڤا خوە خورت بکن و ببن دەولەت.
باش تێ زانین کو داگیرکەرێن مە ژ بۆنا تفاقا ناڤا گەلێ کورد تێک ببن، چ ژ دەستێ وان ھاتیە کرنە و دکن. ژ رۆژا کوردستان پەرچە کرنە و ھەتا نھا، ژ بۆنا تفاقا گەلێ کورد نەبە، داگیرکەران ھەمی رێ و رێبازێن خەراب، چ ب رەحەتی و چ ژی ب دارێ زۆرێ، ب کار ئانینە.
ژ بەر کو بارزانیان ئەڤ باش فێم کربوون و زانیبوون کو تفاقا ملەتان ژ مالبات و عەشیران پێک تێ. ھەگەر مالبات ل ھەڤ بن، ئەو ل ھەڤکرنا وان دکارە تفاقا ناڤا ئێل و عەشیران ژی پێک بینە. ئەو ئێل و عەشیر ژی دبن دەولەت.
ژ بەر ڤێ بوو بارزانیان ئەڤ خال ژ خوە رە کرن وەکە رەھبەرەکێ. لۆما ل گۆر ڤێ رەھبەرێ بەرێ تفاقا ناڤا خوە ساخلەم کرن کو بکاربن باندۆرێ ل عەشیر و تەریقەتان ژی بکن.
پشتی کو بارزانیان تفاقا ناڤا خوە پێک ئانین، ڤێ جارێ ژی دەست ئاڤێتن تفاقا عەشیران دا کو وان ژی د بن سیوانەکێ دە بکن یەک. یەکتیا بارزانیان و تفاقا ناڤا وان، ئەو کرن یەک، ب ھێز و خورت کرن. لۆما ئەڤ خورتبوون و ل ھەڤکرنا وان بوو سەدەما ب دەستڤەئانینا دەولەتا خوە، ل باشوورێ کوردستانێ.
بارزانیان پشتی پێکانینا تفاقا ناڤا خوە ئانکو یا بارزانیان، پێشی ل تەڤگەرا نەتەوەیی یا کوردان و یەکتیا گەلێ کورد ڤەکر. پشتی ڤێ ژی دەست ئاڤێتن تفاق و یەکتیا ناڤا تەریقەت و عەشیرێن کوردستانێ. ب ڤێ خەباتا خوە، وان ل باشوورێ کوردسانێ ل دەڤەرا بارزان و ل گوندێ بارزان ب ناڤێ کۆنفەدەراسیۆنا بارزانیان یەکتیا ھەشت عەشیران ئاڤا کرن. ھەمی تەکۆشین و بەرخوەدانێن وان ب ناڤێ بارزانیان دەستپێکرن و ھێژی ب وی ناڤێ پیرۆز ددۆمە.
ب سایا تفاق، یەکتی و ھەڤگرتنا بارزانیان بوو کو ئەم ئیرۆ خوەدی پەرچەک ئەردێ ئازادن. ئانکو کورد ل باشوورێ کوردستانێ خوەدی دەولەتا خوە نە. نە دوورە کو ئەڤ ھەبوون سبە ببە کوردستانەکا سەربخوە.
مە گەلەک جاران بەحس کرییە و دکن کا چما ل پەرچێن دن ژی سەرکەتن ب دەست کوردان نەکەتیە. ئاھا سەدەمێ ڤێ پر ئەشکەرە و زەلالە کو تفاقا ناڤا وان تونە بوو و تونەیە. ژ بەر ڤێ ب سەرناکەڤن و نەکەتنە. ھەتا کو ل باکورێ کوردستانێ ژی تفاقەک نەتەوەیی پێک نەیێ زەحمەتە کو ئەم ئازادی و سەرخوەبوونا باکورێ کوردستانێ ببینن.
دڤێت ئەم ڤێ یەکێ باش بزانبن کو دەما مالبەتەک ل ھەڤ بە، خوەدی ل ھێژاییێن خوە دەرکەڤن، ھم دێ خوە ل ھەمبەر ھەمی، ئێریش و تۆفانێن تێنە سەرێ وان بپارێزن و ھم ژی دێ خوە ب ھێز و خورت بکن. دەما یەکتی و تفاقا مالباتێ خورت بە، ئەڤ باندۆرێ ل سەر عەشیران ئێل و تەریقەتان ژی دکە دا کو ئەو ژی خورت ببن. خورتبوونا ڤانا هەموویان رەنگ و دەنگێ دەولەتەکێ ژ کوردان رە ئەشکەرە دکە.
یەکتی و تفاقا بارزانیان بوو سەدەما کو ئەم ئیرۆ خوەدیێ خوە و کوردستانەکا ئازاد ل باشوورێ کوردستانێ نە. ھەگەر ل باکورێ کوردستانێ و ل پەرچێن دن ژی تفاق و یەکتیا گەل، پارتی و رێخستنێن مە ھەبانا، ئەم دا ل وان پەرچەیان ژی خوەدی ئازادیا خوە بانا.
لێ ھەزار جاران مخابن کو ژ بەر بێ تفاقی و ژھەڤ بەلاڤبوونا پارتی و رێخستنێن مە، ل باکورێ کوردستانێ رۆژ ب رۆژ ئەم وەکە کورد وەندا دکن. سەدەما کو ھەتا نھا ئەم ل باکورێ کوردستانێ ب سەر نەکەتنە یەک ژێ ژی ژ بەر بێتفاقیا ناڤا مە ب خوەیە.
لۆما ئەز دبێژم: پێویستە کو کوردێن مە باش ڤێ رێبازا پیرۆز فێر ببن و خال ب خال وێ ژ بەر بکن دا کو بکاربن ژ بۆنا پەرچێن دن ژی ئازادی و سەرخوەبوونێ بینن. ژ بەر بێ تفاقیا ملەتێ کورد ئەم چ جاران نابن خوەدی دەولەتا خوە. لێ ل باشوورێ کوردستانێ ب سایا ڤێ رێبازا پیرۆز، ئەم وەکە کورد، ئیرۆ ل ور خوەدی دەولەتا خوە نە. ئەم دێ سبێ ژی ببن دەولەتەکا سەربخوە کو ئالا مە ژی دێ د ناڤا ئالێن جیھانێ دە ل دار بکەڤە.
رێبازا پیرۆز د تەکۆشینا خوە یا د سەد سالان دە نیشانی مە کوردان دا کو بێ تفاق و یەکتیا گەل، ئەم دێ نەبن خوەدی کوردستانەکا سەربخوە. لۆما گرینگە کو دڤێت پەرچێن کوردستانێ یێن دن ژی ئێدی ڤێ خالا تفاقێ پێک بینن دا کو ئازادیا خوە ببینن.
