پارتیا دەمۆکراتا کوردستان-سووریەیێ (پەدەکەسێ) دیار کر کو شەڤا بۆری گرۆپەکێ چەکدار ئۆفیسا پارتیا وان یا ل باژارێ قامشلۆ شەوتاندیە.
د ھەمان دەمێ دە ل باژارۆکێ تربەسپیێ ژی گرۆپەکێ چەکدار ئالایێ کوردستانێ یێ ل سەر بانێ نڤیسینگەھا پەدەکەسێ شەوتاند.
پەدەکەسێ دا زانین کو چەکدارێن سەر ب پەیەدێ ڤە ئۆفیسا وان یا قامشلۆیێ و ئالایێ کوردستانێ یێ ل سەر بانێ نڤیسینگەھا وان یا تربەسپیێ شەوتاندنە.
ئەڤ نە جارا یەکەمە کو، چەکدارێن پەکەکێ ل دژێ، ئەنەکەسێ، پەدەکەسێ و پارتیێن د ناڤا ئەنەکەسێ دە جھ دگرن ئێریشان دکن، ئۆفیسێن وان دشەوتینن و سڤکاتیێ ب ئالایێ کوردستانێ دکن.
لێ ھەر جارێ ئەڤ ئێریشێن چەکدارێن پەکەکێ ب نووچەیەکی یان ژی ب داخویانیەکا شەرمەزاریێ تێ دەرباسکرن. د راستیا خوە دە، ھاتە ئیسپاتکرن کو، ھەتا پەیەدە، ھەسەدە و ھەر رێخستنەک ل رۆژئاڤایێ کوردستانێ سیاسەتا پەکەکێ رێڤە دبە چ جارا نە ل گەل ئەنەکەسێ و نە ژی ل گەل پارتیەک دن یا کوردستانی ھەڤکاریەکێ ناکە.
ب دەھان جاران ھەڤکاری ھاتنە ئیمزەکرن لێ ل سەر کاغەزێ مایە. رەوشا پەکەکێ ل رۆژئاڤایێ کوردستانێ کەشفە، سیاسەتا کو رێڤە دبن ڤەکریە و یەک ئارمانجا وان یا سەرەکی ھەیە؛ ل رۆژئاڤایێ کوردستانێ کوردا نەھێلن، دەڤەرێ بکن ھەرێمەک ب تەمامی نشتەجیێن عەرەب ببن پرانی و دەڤەرێ وەک کوردستان ژ ھۆلێ راکن. چ دۆزا وان ژ بۆ کوردستانێ و کوردایەتیێ تونەیە.
ئەگەر وەلاتەکی، یان ژی دەڤەرەکی بلندکرنا ئالایێ کوردستانێ قەدەغە بە، گەلۆ دێ پێشەرۆژێ دە ئەوێن کو ڤی ئالا قەدەغە دکن، دێ ژ بۆ کورد و کوردستانێ چ ئارمانجا وان ھەبە؟
بەرێ خوە بدنێ گەلەک پارتی و ئالیێن سیاسی ڤان ئێریشێن چەکدارێن پەکەکێ شەرمەزار ژی ناکن. لێ مخابن نە ئەنەکەسە و نەژی پەدەکەسە سکالایا ل وان ئالیێن سیاسی ناکن کو، ژ بۆ چ ھوون ئێریشێن پەکەکێ ل دژی نشتمانپەروەرێن کورد و ل دژێ نرخێن کوردستانی شەرمەزار ناکن؟ گەرەک ئەڤ ببە پیڤانەک ژ بۆ پێوەندیێن ئەنەکەسێ و پەدەکەسێ.
دەما لەشکەرەک ترک یان ژی کەسەک نژادپەرەست سڤکاتیێ ب ئالایێ کوردستانێ دکە، ئالیێن سیاسی دکەڤن رێزێ و داخویانیێن شەرمەزاریێ رادگھینن، د مەدیا جڤاکی دە ب رۆژان وێنەیێن وان بەلاڤدکن و نرخاندنا دکن. لێ پەکەکە ل قامیشلۆ و دەڤەرێن دن ل رۆژئاڤایێ کوردستانێ ئالا کوردستانێ دشەوتینە و کەسەک دەنگ ناکە. گەلۆ چ جیاوازی د ناڤبەرا نژادپەرەستێن ئالا کوردستانێ دشەوتنن و چەتەیێن پەکەکێ دە هەیە کو ھەمان تشتێ دکن؟ ئەگەر بەرسڤا ڤێ پرسێ ھەبە ژ خوە ھەرتشت تەمامە. لێ مخابن ل با پرانیا رێخستنێن کوردا بەرسڤا ڤێ پرسێ تونەیە.
ھەتا کو کورد ب گشتی سیاسەتا پەکەکێ ناس نەکن ل ھمبەر ڤێ سیاسەتێ نە خوەدی ھەلوەستبن ئەو نکارن گاڤەکی بەر ب پێش ڤە باڤێژن و دۆزا دەستخستنا مافێن رەوایێن نەتەوەیێ کورد دە گاڤەکی پێش بکەڤن. ئەگەر تایبەتی پارتیێن سیاسی ھەتا وەک ڤێ گاڤێ پەکەکە ناس نەکربن د ژیانا خوە ھەموویێ دە پەکەکێ ناس ناکن و ل ھمبەر وان نابن خوەدی ھەلوەستەک راستەقێنە.
د ڤێ مژارێ دە گەلەک تشت ھەنە بێن گۆتن. ل باش بزانن کو، ل رۆژئاڤایێ کوردستانێ پەکەکێ ئاگرەک پێخستیە و د ڤی ئاگری دە ب تەنێ کورد دشەوتن. تونەکرنا کوردا ل رۆژئاڤا ئەرکا سەرەکی یا پەکەکێ یە.
رۆژەڤا کورد
