ملیسێن دەرقانوونی جارەکە دن ب درۆنان ئێریشی بیرێن گازا كۆرمۆرێ یێن ل پارێزگه‌ها سلێمانیێ كرن كو ب یەک ژ مەزنترین بنەسازیێن ئەنەرژیێ یێن هەرێما کوردستانێ تێن حه‌ساب كرن.
ملیس و چه‌كدارێن ده‌رقانوونی دوهـ رۆژا ئینی 26/4/2024ێ ب بالافرێن بێ مرۆڤ ئێریشی هنه‌ك كۆگه‌هێن بیرێن گازا كۆرمۆرێ كرن، د ئه‌نجامێ ده 4 خەباتکارێن قادا گازێ یا کۆرمۆرێ هاتن کوشتن. ژ دەستپێکا سالێ ڤە ئەڤ دویەمین ئێریشا ب بالەفرێن بێ مرۆڤ و مووشەکی یە ل سەر بیرێن كۆرمۆرێ تێ كرن.
ئێریشکار دخوازن ب ڤان ئێریشان رێ ل بەر پێشکەتنا هەرێما کوردستانێ بگرن، ژ بەر وێ ژی چاڤکانیا هەری مەزن یا دابینکرنا ئەلەکتریکێ دكن ئارمانج. ل شوونا دیتنا چارەسەریەکە بنگه‌هین ژ بۆ بداویکرنا ڤان بنپێکرنان، رایەدارێن ئیراقێ جاره‌كه دن کۆمیتەیەک ژ بۆی له‌كۆلینا ل ئێریشێ ئاڤا کرنە.
کانیا گازێ یا کۆرمۆرێ ل ناڤچەیا قادر کەره‌م یا پارێزگەها سلێمانیێ یە. بەرهەمئانینا گازێ ل وێ ده‌رێ د جۆتمەها 2008ان دە دەست پێ کر و رۆژانە 450 ملیۆن مەترەکوپ گاز لێ بەرهەم تێ و تێ پێشبینیکرن کو هەتا داویا ڤێ سالێ بۆ 500 ملیۆن مەترەکوپ بلند ببە.
زەڤیا کۆرمۆر ژ سەدی 67ێ ئەلەکتریکا هەرێما کوردستانێ دابین دکە و ب گشتی 3700 مێگاوات بەرهەم تینە. ل كۆرمۆرێ رەزەرڤا گازا خوەزایی 1،8 تریلیۆن مەترەکوپە.
ژ بلی گازا سرووشتی، بەرهەمانینا گازا شلکری (LPG) رۆژانە نێزیکی 1000 تۆنە، رۆژانە 22 هەزار بەرمیل پەترۆلا کۆندێنسەیت تێ بەرهەمئانین، کو د دەما بۆری دە، ئەڤ رێژه ب پەترۆلێ رە دهات تێکەل كرن ژ بۆ ی به‌رزكرنا کوالێتیا په‌ترۆلا هەرێما کوردستانێ.
ل گۆری گرێبەستەکێ کو د نیسانا 2007ێ دە ب حکوومەتا هەرێما کوردستانێ رە هاتیە ئیمزەکرن، کۆرمۆر ژ ئالیێ كۆمپانیێن گیسنت پەترۆلەئوم و دانه گاز تێ سه‌رپه‌رشتیكرن.
ژ بەر گرینگیا وێ یا ئابۆری ژ بۆ هەرێما کوردستانێ، ئەڤ زەڤی جار جاران دبە ئارمانجا ملیسێن نەقانوونی، مه‌زنترین ئێریشێن سه‌ر كۆرمۆرێ د 22ێ خزیران و 12ێ جۆتمەها 2022ێ، هه‌ر وها ل 26ێ کانوونا یەکەم و 25ێ نیسانا ئیسال ژ هێلا ملیسێن ده‌رقانوونی ڤه هاتبوون ئه‌نجامدایین.
