سمکۆ عەبدولعەزیزی
بەشا دویەمین: هشا شاشا عەڤدللا ئۆجالان
د بەشا یەکێ یا نڤیسا خوە دە مه گۆ ده‌ما هشا مرۆڤى یا ساخله‌م نه‌بە وێ كریارێن نه ساخله‌م په‌یدا ببن، پارتیا كاركه‌ران و كه‌ساتیا عەڤدللا ئۆجالان هه‌ر ژ دەما دانینا ناڤێ پارتیا خوە هەیا نها راستی شاشیه‌ك مه‌زن هاتیە، شاشیا وی ژى دكارم ب دو خالێن سه‌ره‌كە به‌رچاڤ بکم:
1- ده‌ما عەڤدللا چوویه زانینگه‌هێ شەهره‌زایى د سیاسه‌تێ دە نه‌بوو، ده‌ما كه‌تیه د ناڤا پێلا ماركسیه‌تێ دە هاته خه‌ندقاندن د ناڤا وێ دە، ژ بەر کو عەڤدللا ت پاشخانەک هزرى نه‌بوو، به‌لكو مینا رووپەلەک سپى بوو، ل گۆر زانستێ سوسیولوجى و سایكولوجى و هزرى مروڤێ ساده پڕ هێسانە کو تو بکاری وەکە خوە لێ بکی. ده‌ما عەڤدللا دیتی كو پارتیا كاركه‌رێن توركیا هه‌یه و به‌شه‌كێ مه‌زنێ قوتابیان ئه‌ندامێن وێ رێكخستنا سیاسی بوون، عەڤدللا و‌سا هزر كر كو گه‌ر ئه‌و ژی پارتیه‌كە كوردى دامەزرینە و ناڤێ كرێكارا ل سەر دانە دێ ببە پالده‌ر كو وان ژى رولا خوە هه‌بە و دیسان د وێ ناڤبەرێ دە تەڤ پرتۆكێن عەڤدللا دخوەندن و ب ده‌ست دكه‌تن ناڤەرۆکا وان ب ماركسیه‌تێ هاتبونه پركرن و سه‌قایێ ماركسیه‌تێ ناڤەندا دانوستاندنا روژانه یا وان بوو، ئانکو ب كورتاسى ئه‌ڤ ناڤه نه داهێنانا عەڤدللا بوو، به‌لكو چاڤلێكرنه‌ك بوو.
2- د سالێن هەفتێیان دە ره‌وشا ئابۆری یا ترکیێ پڕ نه‌باش بوو، د وارێ هه‌بوونا کارگەهان دە ب شێوه‌یه‌ك گشتى و ل باكورێ كوردستانێ دا دكارم بێژم هه‌ر نه‌بوون، یانی نه‌بوونا كارگه‌هان وێ دگه‌هینە كو کارکەر یان ل وی جهی نکارن بشۆغلن یان ژی گەر هنەک هەبن و بشۆغلن هەژمارا وان پر هندکە. كوردان ل وێ دەمێ هەری زێدە كارێ جۆتکاریێ و خوەدیکرنا ئاژالان دکر، یانی كه‌سێ كورد شڤان یان گاڤان یان جۆتکار بوون.
شڤان و جۆتکار پڕ گرێداىی ئاخێ نه و پارستن و گه‌شه‌كرنا ئاخێ ئه‌ركێ وان یێ سه‌ره‌كە یە، لێ کارکەر زێده‌تر گرێدایی كارگه‌هێنه و ئه‌ركێ وان یێ سه‌ره‌كە په‌یداكرنا مووچه‌یه‌كێ شایسته‌یه، واته ب كورتی دبێژم كو ئاخ چه‌قێ سه‌ره‌كە یێ هزرا جۆتکارایه و كارگه‌هـ چه‌قێ سه‌ره‌كە یێ كرێكارنه، ژ به‌ر ڤێ یەکێ ئێش و هزر و ره‌فتارێن جوتکاران و شڤانان نه وە‌ك یێن کارکەرانە .
جۆتکار و شڤان خه‌باتێ و تەكۆشینێ ژ بۆ پارستنا ئاخێ دكن و کارکەر خه‌بات و تەکۆشینێ ژ بۆی پاراستنا كارگه‌هان و زێدەکرنا مووچێ خوە دکن.
ئه‌ڤ جورێ تەكۆشینێ دبیته ئه‌گه‌ر كو سوسیولجی و سایكولوجی و هزركرنا جوتکارى یا جودا بە ژ یا کارکەری.
ژ به‌ر ڤێ یەکێ شڤان و جۆتکار به‌ر ب هزرا سەرخوەبوونا نه‌تەو‌ى دچن و كرێكار بەر ب دادوه‌ریا رێڤه‌برنا كارگه‌هان دچن .
واته مرۆڤێ كورد هەیا کو ئاخێ رزگار نه‌كن و سەربخوە نه‌بە دێ به‌رده‌وام بە د تێکۆشینا خوە دە.
ده‌ما عەڤدللا پارتیا خوە دامەزراندی و هزرا خوە ب شێوه‌ك دیکتاتۆری سه‌پاندى ل یه‌كه‌م كۆنگرەیا پارتیا كاركه‌ران دە، كاكلكا ماركسیه‌تێ و كراسێ سۆسیالیزما زانستى كره به‌ر پارتیا خوە و په‌یره‌وه‌ك دانا ژ بۆ بجهئانینا وێ هزرێ.
هێژایی گۆتنێ یە بێژم كو سۆسیالزما زاستى رێكه‌كه ژ بۆی تێگهشتنا جڤاكى ژهه‌موو لایان ڤه ( جڤاكى، ئابۆرى، هزرى، ده‌روونى) و ب دیتنه‌ك دیرۆكى و بكارئانینا رێیێن زانستى ژ بۆ گه‌شه‌كرنا جڤاكێ ڤه‌كۆلین لێ هاتیه كرن تاكو به‌ره ب ئارسته‌یەک گه‌شه‌تر و پێشكه‌فتى ببه.
ل ڤر پرس ئه‌ڤە، گەلۆ عەڤدللا و پارتیا وى لسه‌ر بنیاته‌ك زانستى شرۆڤه‌كرنا جڤاكا كوردى كر یان ژی د چارچۆڤه‌یەک قالب گرتى دە ل سه‌ر جڤاكا كورد سه‌پاند ؟ ئه‌رێ عەڤدللا و پارتیا وى رێكه‌كا زانستى ژ بۆی كۆمه‌لگه‌ها كوردى دانا و بەر ب گه‌شه‌کرنێ بر؟ یان به‌ر ب فەلاکەتێ بر؟
د بەشا بێ دە وێ بەرسڤا ڤان پرسان بدم…
