ئێریشێن پەکەکێ یێن ل سەر دەستکەفتیێن کوردان یێن ل ھەرێما کوردستانێ دەوام دکن. مەدیایا پەکەکێ کو د ڤان دەمێن داوی دە نووچەیێن ساختە ل سەر خەتا مەتینا و ئامێدییێ چێدکە، بنەسازیا دەروونی یا ئێریشا ل دژی ھێزێن پێشمەرگە ئامادە دکە.
ھات زانین کو د دەمەکێ دە کو حەشدا شەعبی گەفێن خوە یێن ل سەر کوردستانێ ب تایبەت بیرا گازا کۆرمۆر زێدە دکە، پەکەکە ژی خوە ئامادە دکە ئێرشی ھێزێن پێشمەرگە بکە. د دەمەکێ دە کو پرسگرێکێن د ناڤبەرا ھەولێر و بەغدایێ دە تێن گۆتوبێژکرن و چارەسەری تێن دیتن، پەکەکە خوە ئامادە دکە گاڤێن کو ھەم دەستێ رەژیما شیعە یا ئیراقێ و ھەم ژی دەستێ دەولەتا ئیرانێ بھێز بکە، باڤێژە. پەکەکێ کو ل گەل دەولەتێن ئیراق و ئیرانێ ل دژی حکوومەتا ھەرێما کوردستانێ جھ گرتیە، ب تایبەتی د چار خالان دە خوە ئامادە دکە کو ئێرشی ھێزێن پێشمەرگە بکە و ب قەستی دەرەوان دکە کو رایا گشتی ھێرس بکە و ئێریشێن خوە رەوا بکە. ژ بۆی ڤێ یەکێ ژی نەمازە ڤێ داویێ نووچەیێن دەرەو د مەدیایا خوە دە پارڤە دکە.
ئیستیخباراتا پەکەکێ ژ بۆ ئێریشان ناڤەندەک ئاڤا کریە
ھاتە زانین کو ژ بۆ ئاڤاکرنا بنگەھێ بریارا بارەگەھا پەکەکێ یا ئێریشا ل سەر ھێزێن پێشمەرگە، پەکەکێ ھەموو مەدیایا خوە ئەرکدار کریە کو ب رێیا نووچەیێن دەرەو ل دژی پەدەکێ و ھێزێن پێشمەرگە، زەمینەیا ئێرشێ ئامادە بکن. ب تایبەتی رێخستنا NLP یا پەکەکێ ل سلێمانی، مەخموور و قامشلۆیێ ژ بۆ ڤێ مژارێ ھاتنە وەزیفەدار کرن. رێخستنا ئیستیخباراتێ یا پەکەکێ کو ب ناڤێ ناڤەندا لەکۆلینێن پۆلیتیک NLP تێ ناسکرن، رێخستنەکە کو راستەراست د بن سەرۆکاتیا ھەڤسەرۆکێ کەجەکێ جەمیل بایک دە دخەبتە. د ڤێ رێخستنێ دە مالپەرەک ب ناڤێ لێکۆلین ژی ھەیە. ئەڤ مالپەر سازیەکە کو نووچەیێن سەختە ژ بۆ مەدیایا پەکەکێ چێدکە. ھەر وھا د ڤان دەمێن داوی دە ب ناڤێ رۆژەڤا مەخموور، رۆژەڤا باشوور، رۆژەڤا رۆژئاڤا و ھتد… حەسابێن مەدیایا جڤاکی ڤەکرنە و ژ ور نووچەیێن دەرەو بەلاڤ دکن. کەسەر بولدان و ھندەک کەسێن دن کو د مەدیایا پەکەکێ دە ژی دخەبتن، لگەل NLP ژی کار دکن.
سەدەما دەرەوا پەکەکێ یا کو تێ دە دبێژە: “پێشمەرگە جل و بەرگێن لەشکەری یێن لەشکەرێ ترک ل خوە کرنە” چیە؟
ئەڤ سازییا کو ژ ئالیێ NLP ڤە ھاتیە ئۆرگانیزەکرن، د ڤان دەمێن داوی دە ڤیدیۆ و وێنەیێن سەختە پارڤە دکە کو نیشان ددە ھێزێن پێشمەرگە و لەشکەرێن ترک ب ھەڤ رە ل خەتێن بالندا، مەتینا، رەشاڤا و ھتد تەڤدگەرن. ب ڤی رەنگی، ب ئافراندنا تێگھشتنا کو “لەشکەرێن ترک و پێشمەرگە ب ھەڤدوو رە نە” زەمینێ ئامادە دکن کو د دەمێن پێش دە ببێژن کو “مە دگۆت قەی ئەو لەشکەرێن ترکن، لەوما مە گولـلە ل وان رەشاندن، جل و بەرگێن ئارتێشا ترک ل خوە کربوون”.
ھەر وھا ڤان سازیان ھەری داوی نووچەیێن کو تێدە تێ ئیدیعا کرن، “پەدەکە دخوازە پێشمەرگەیان بکوژە و ب ڤی ئاوا پێشی ل ھلبژارتنان بگرە” پارڤە کرنە. ئەڤ پێنگاڤا پەکەکێ یە ژ بۆ شەھیدکرنا پێشمەرگە و پرۆپاگاندایا “پەدەکێ ئەو شاندنە مرنێ”.
یەک ژ دامەزرینەرێن پەکەکێ و ھەڤسەرۆکێ کەجەکێ جەمیل بایک د گۆتارا خوە یا 15 نیسانێ یا ل ANF دە ئیشارەتا ڤێ پێڤاژۆیێ دا. وێ دەمێ دارکا مازی دیار کربوو کو گۆتارا بایک ژ بۆ خەباتکارێن وی مانیفەستۆ و تەعلیماتەکە و ھشیاری دا رایا گشتی.
بایک د گۆتارا خوە دە وھا گۆت: “پەدەکە جل و بەرگێن پێشمەرگەیان دکە بەر لەشکەرێن ترک و دەما پێویست بکە پێشمەرگە ژی کنجێن ئارتێشا داگیرکەر دکن بەر خوە. واتە دخوازن ببێژن پەدەکە ب ئاوایەکی راستەراست یان نەراستەراست بەشداری ڤی شەری بوویە و د راستیێ دە فەرمان دا کارمەند و ناڤەندێن خوە یێن پرۆپاگاندایێ کو تێگھشتنەکا وەھا چێبکن.
پەکەکە دێ ئێریشێن خوە زێدەتر بکە
ئێریشێن پەکەکێ یێن ل دژی ھێزێن پێشمەرگە ب راستی نە نوو نە. ژ سالا 2019 ڤە پەکەکێ شەرەکی دژوار یێ دەروونی و مەدیایی و شەرێ چەکداری یێ ب توندی ل دژی ھێزێن پێشمەرگە دمەشینە. پەکەکێ ژ سالا 2019 ھەتا نھا 13 پێشمەرگە شەھید کرنە. یەک ژ وان غازی سالح ئەلیخان، رێڤەبەرێ ئاساییشا دەرگەهێ سینۆری یێ سەر زێرێ بوو کو ل بەر چاڤێن زارۆکێن خوە ھات قەتلکرن. ژ بەر نەرەحەتیا گەل پەکەکێ پرانیا ئێریشێن خوە ب ئاوایەک ڤەشارتی پێک ئانین. لێ ل سەر گەلەک مژارێن وەکی دانینا ماینان ل ھەرێمێ قەت رانەوەستیا.
نھا پەکەکە د مژارێن لھەڤکرنا ھەولێر و بەغدایێ، لێگەرینا ھەڤپاریێ ل ئەنیا کورد د دەربارێ ھلبژارتنێن پارلامەنتۆیا کوردستانێ و ھتد دترسە. ژ بۆ ڤێ ژی ب راستی پەیامەکێ ددە ئەنیا دژە ھەولێرێ: “بەدەلان نەدن، ئەم دێ ئێرشی وان بکن و پاشڤە ببن”. د ئەسلێ خوە دە، پەکەکە دێ ئێریشێن خوە زێدەتر بکە دا کو دژمنێن ھەولێرێ هان بدە، دەستێن وان خورت بکە و ھەولێرێ نەچار بکە کو تەسلیمی بەغدا و حەشدا شەعبی ببە. تێ چاڤەرێکرن کو پەکەکە ل خەتێن شێلادزێ، ئامێدیێ و گارێ و ل ھەرێما خاخورک-برادۆستێ ژی ئێرشی ھێزێن پێشمەرگە بکە.
ئێریشا پەکەکێ یا ل دژی دەستکەفتیێن شۆرەشا باشوورێ کوردستانێ نیشان ددە کو پەکەکە وەکە پێکھاتەیەکە دژبەرێ کوردان ل گۆری بەرژەوەندیێن داگیرکەران تەڤدگەرە. دڤێت ئەڤ راستیا پەکەکێ و چاپەمەنییا دژ-کورد دەرکەڤە ھۆلێ و ھەموو رایا گشتی ل ھەمبەر ئێریشێن پەکەکێ یێن ل سەر شۆرەشا باشوور هشیار بە.
