باوەرم ئەڤ یەک ژ قەلسیا ھزرێن نەتەوی د ناڤا کوردێن باکور دە دەردکەڤە پێش. ژ بۆ ڤێ یەکێ گەرەک ئالی و پارتیێن سیاسی یێن خوە کوردستانی دبینن ل سەر ڤێ یەکێ سەرێ خوە بێشینن. ل ترکیێ و باکورێ کوردستانێ، ب دەھان سالان کورد ب گۆتنێن وەک “دەمۆکراسی، عەدالەت، وەکھەڤی” و “براتیا گەلان” ھاتنە خاپاندن. کورتاھی پرس ئەوە کو، ھەتا پرسگرێکا کوردا ل باکورێ کوردستانێ ل سەر بنگەھێ مافێن رەوایێن ملەتێ کورد نەیێ چارەسەرکرن، ھەموو گۆتنێن، وەکھەڤییێ، عەدالەتێ و براتیا گەلان ژ بۆ کوردا بێ واتەنە و ناڤەرۆکا وان ڤالەیە.
گەلەک جارا د ناڤ سیاسەتمەدارێن کوردا دە، دەما بەحسا کەسایەتەک سیاسی یێ ترک تێ کرن، دبێژن: فلان کەس دەمۆکراتە. لێ کەسەک بەحسا پیڤانا دەمۆکراتبوونێ ل ترکیێ و باکورێ کوردستانێ ناکە.
ل ترکیێ سیاسەتمەدارەک، چ بێژە بلا بێژە، گۆتنێن ل گوھێ مە خوەش تێن بلا ھەتا ئێڤارێ بێژە ئەگەر د پرسا کورد دە نە خوەدی ھەلوەستبە تو جودابوونا وی ژ بۆ کوردا ژ کەسایەتەک کو ئەم وەک نژادپەرەست ب ناڤ دکن تونەیە. ژ بەر کو، ل با مە گەرەک پیڤان پرسگرێکا کورد بە و دیتنا کەسایەتێن سیاسی ل گۆرا ڤێ بێ نرخاندن.
ژ ئالیەک دن پرسا کوردان ل ترکیێ و باکورێ کوردستانێ نە تەنێ گۆتنێن پۆپۆلیست و دەمۆکراسی، وەکھەڤی، ئاشتی و براتیا کو ئەو بەحسێ دکنە. پرسا کوردا پرسەک نەتەوییە. گەرەک خەتا کو ناڤبەرا مە و رەوشەنبیرێن ترکان دە ھەبە ئەڤ بە. ئەڤ خەت گەلەک زیزە و نایێ دیتن. بەلکی ژی نەدتنا ڤێ زیزییێ شاشتیا مەیا ھەری مەزنە.
