سەرۆکێ هەرێما کوردستانێ نێچیرڤان بارزانی دوهـ رۆژا یەکشەمێ ل سەر ڤەخواندنا فەرمی یا رێبەرێ کۆمارا ئیسلامی یا ئیرانێ گهیشت تەهرانێ و ئیرۆ ل گه‌ل عه‌لی خامنه‌یی و رێڤه‌به‌رێن پایه‌بلند یێن ئیرانێ جڤیا، سەردانا سەرۆکێ هەرێما کوردستانێ بۆ ئیرانێ د مەدیایا ئیرانێ و هەرێمێ دە به‌رته‌كه‌ك ئه‌رێنی هه‌بوو و هەرکەسی ب ئەلەقەیەکە مەزن ئەڤ سەردان شۆپاندیە و چاڤدێر ژی د وێ باوەریێ دەنە کو ئەڤ سەردان دێ ببە خالەکە گوهەرتنێ د پێوەندیێن تەهران و هەولێرێ دە.
سه‌رۆكاتییا هه‌رێما كوردستانێ راگهاندیه كو د ڤێ سەردانێ دە، سەرۆک نێچیرڤان بارزانی دێ لگەل بەرپرسێن پایەبلندێن کۆمارا ئیسلامی یا ئیرانێ بجڤە و ل سەر گەشەپێدانا پەیوەندیێن ناڤبەرا ئیران و ئیراقێ و هەرێما کوردستانێ و هەڤکاریێن د ناڤبەرا وان دە گۆتووبێژ بکە. هەر وها دێ گەشەدانێن ل هەرێمێ ب گشتی گۆتووبێژ بکن.
سەردانا نێچیرڤان بارزانی بۆ تەهرانێ دەستکەفتەکە دن یا دیپلۆماسیا هەرێما کوردستانێ یە
بلندکرنا ئالا کوردستانێ و ب با كه‌تنا وی د تەهرانا پایته‌ختا ئیرانییان ده، یەکەم ئیشارەت بوو ئیسبات کر کو سەرۆکێ هەرێما کوردستانێ ب هه‌لوه‌سته‌كه بهێز سەردانا تەهرانێ دکە و مژارێن جڤینان ژی ئه‌ڤ یه‌ك ئیسبات کر. ئەم هەموو دزانن کو ئیرانێ تو جاران چاڤ ب پێشکەفتنێن کوردستانێ ب گشتی و هەرێما کوردستانێ ب تایبەتی نارابن و هەرتم هەول دایە کو تاكه حکوومەتا کوردستانێ یا رەوا بکە ئیتاعەتکارێ خوە و ژ بۆ ڤێ مەبەستێ ژی دودلی نەکریە کو ت تاوانەکێ بکە. ئێریشێن مووشەکی یێن ل سەر هەولێرا پایتەخت، شەهیدکرنا کەچەکە کوردا 11 مەهی و ئارمانجکرنا ناڤەندێن ژێرخانەیی و ئابۆری یێن کوردستانێ ژ ئالیێ ملیسێن وێ یێن كرێگرتی ڤه، میناکێن زەلالن کو نیەتا دژمنكارییا ئیرانییان ل هەمبەر کوردستانێ پشتراست دکن.
شاشیا رەژیما تەهرانێ ژی وەک هەموو داگیرکەرێن دن یێن کوردستانێ ئەو بوو کو ب وێ یەکێ باوەر دکر کو ب بۆمبەبارانکرنا کوردستانێ و فشارەکە بەرفرەها ئابۆری ل سەر کوردستانێ، دکارە حکوومەتا هەرێما کوردستانێ بندەست بکە و سەرکردەیێن کورد ژی بکە ئیتاعەتكارێن تەهرانێ. لێ وەک هەر جار ئیرادەیا کوردستانێ و سەرکردەیێن وێ ژ زەختێن رەژیما ئیرانێ گەلەک بهێزترە. د داویێ دە، رەژیما تەهرانێ نه‌چار ما د وێ یه‌كێ بگه‌هه كو هه‌ولێر پێگه‌هه‌كی گرنگ و راستیه‌كه سیاسی یا بهێزه و نایێ ئینكار كرن.
رایەدارێن ئیرانێ ل هەمبەری ڤین و بەرخوەدانا حکوومەتا باشوورێ کوردستانێ جارەکە دن نەچار مان سیاسه‌تا كو ژێ ره دبێژن «نەرمبوونا لەهەنگیێ» بکن.
ڤەخوەندنا فەرمی یا سەرۆکێ هەرێما کوردستانێ ژ بۆ تەهرانێ و هەڤدیتنا ب خامنەیی رە – ب ل به‌رچاڤوه‌رگرتنا وێ یه‌كێ كو «رێبه‌رێ ئۆلی یێ تەهرانێ ناخوازە ب هەر کەسی رە هەڤدیتنێ بکە» نیشانا وێ چه‌ندێ یه ئیران نەچار بوویە وێ راستیێ قەبوول بکە کو ئیرادەیا سەروەریخوازێن گەلێ کوردە ل باشوورێ كوردستانێ ژ هه‌ولێن وێ و ملیسێن وێ یێن تێكدانا هه‌رێما كوردستانێ و لاوازكرنا حكوومه‌تا وێ بهێزتره، ب گۆتنه‌كه دن ژ بۆی ته‌هرانێ ده‌ركه‌ت هۆلێ كو ده‌ما كوردستان دبێژه ته‌سلیم نابم، ئه‌ڤ نه ته‌نێ سلۆگانه‌كه د ئاڤێژه به‌لكو ب كریار جی ب جی دكه.
بەلگەیەکە دن ژی کو شاندا هەرێما کوردستانێ ب ئاوایەکی بهێز سەردانا تەهرانێ کریە، ئەوە کو سەرۆکێ هەرێما کوردستانێ ب ئەشکەرە و د دلێ تەهرانێ دە بەحسا ئاساییش و ئارامیا هەرێما کوردستانێ و ئیراق و هەرێما کوردستانێ دکە. هەلبەت گهاندنا ڤێ پەیامێ ژ بۆ ئیرانیان تەنێ ژ هەبوونا هێزێ تێ. ئەڤێ ژی پەیامه‌ك زەلال تێ ده یه کو «ئیران چاڤکانیا بێئەولەهی و بێئیستیقرارێ یە ل ئیراق و هەرێما کوردستانێ». هەلبەت گهاندنا ڤێ پەیامێ ژ بۆ ئیرانیان تەنێ ژ هەبوونا هێزێ تێ.
چاڤکانیێن هێزا هەولێر و هەرێما کوردستانێ
مە ژ بیر نەکریە کو پشتی راوەستاندنا فرۆتنا پەترۆلا هەرێما کوردستانێ، بریارێن دژمنانەیێن دادگەها فەدەرالی یا ئیراقێ، راوەستاندنا بوودجە و مووچەیێن هەرێما کوردستانێ، مووشه‌كبارانكرنا هەولێرا پایتەختێ و…هتد، دژمنێن کوردان و كۆله‌یێن وان خەونا وێرانبوون و نه‌مانا ستاتۆیا سیاسی و نەتەوی یا هەرێما کوردستانێ ددیتن، هنەک شۆڤەنیستێن عەرەب ژی د مەدیایێ دە پەیڤا «هەرێما کوردستانێ یا بەرێ» بکار ئانین. لێ ب سایا سیاسەتا ژیر و ئاقلانە یا سەرکردەیێن هەرێما کوردستانێ و هەولێن وان یێن دیپلۆماتیک، ئەڤ خەونا قرێژ بوو بلقا ل سەر ئاڤێ، کو مرۆڤ دکارە سەردانا سەرۆکوەزیرێ هەرێما کوردستانێ مه‌سروور بارزانی بۆ ئامەریکایێ. وەک میناکەکە بەربچاڤا ڤێ تێکۆشینا دیپلۆماتیک حه‌ساب بكین.
سۆدوه‌رگرتنا هەرێما کوردستانێ ژ ناکۆکیێن د ناڤبەرا ترکیە و ئیرانێ دە و بكارئانینا ڤێ ژ بۆی خزمەتا پرسگرێکا کورد و بهێزکرنا پێگەها هەولێرێ، میناكه‌كه دنه ژ لێزانی و زیرەکیا سیاسی و دیپلۆماسی یا سەرکردەیێن هەرێما کوردستانێ، لۆما پێشوازیا بێمیناکا ئیرانێ ژ سەرۆکێ هەرێما کوردستانێ ژی رە، دکارە وەکە بەرتەکا ل هەمبەر سەردانا ئەردۆگان یا ژ بۆی پایتەختا کوردستانێ هەولێرێ وەرە شیرۆڤەکرن.
پەیاما سەردانێ ژ بۆ کوردان
خورتبوونا پێگەها هەولێرێ د دەمەکێ دە یە کو مخابن د ناڤا کوردستانێ دە هنەک دەنگێن خه‌راب هەنە کو ل شوونا کو خوە بسپێرن ئیرادەیا گەلێ کورد، ل هێڤیا خێره‌كێ نه ژ داگیرکەرێن کوردستانێ. ب گۆتنەکە دن، ئەگەر ئەڤ ئالی ل شوونا کو هه‌ولا تێكدانا ناڤ مالا کوردان بكن، پشتگریا سەرکردە و حکوومەتا خوە یا کورد بکن، هەرێما کوردستانێ دێ ده‌رفه‌تا وێ چه‌ندێ هه‌به كو بهێزتر ژی ببە.
دڤێ هەموو کورد ب پێگه‌ها سیاسی و دیپلۆماتیک یا ته‌كانه حکوومەتا خوە یا رەوا و نەتەوی شاناز و سەربلند بن و زەختێ ل ئالیێن ژ رێ ده‌ركه‌تی بکن کو ڤەگەرن سەر خەتا نەتەوی و ل شوونا دژمناتیا حکوومەتا هەرێما کوردستانێ بكن، ئەنەرژیا خوە ژ بۆ سەرکەفتن، ئاشتی و گەشەپێدانا کوردستانێ بکار بینن.
