بووبێ ئەسەر
د مالاکێ و د مالباتەکێ دە سەمیانێ وان، ستوینا مالا وان ئانگۆ باب تونە بە، دێ ئەندامێن مالێ ھەر یەک ل گۆر خوە تەڤبگەرن و ل گۆر خوە ھندەک تشتان ھلبژێرن یان ژێ ھەز بکن
ھندەک دێ بنە ئاقلمەندێن خەلکی، لێ نە یێن خوە. هندەک دێ بنە دزێن مالێ، ژ بۆنا خەرابکرن و تالانکرنا وەلاتێ خوە. ھندەک دێ بنە نۆکەرێن دژمنێ خوە، ژ بۆنا پشتا برایێ خوە ل ئەردی بدە.
دەما تفاقا مالێ تونە بە، تەڤگەرا مالێ ژی نابە و نامەشە. دێ تم ئاگر ژی ل سەر سەرێ وان بە. لۆما یەکا وان نابە دو. لێ مالێن ب تفاق تم خوە و مالباتا خوە پاراستنە و دپارێزن.
بێ دەولەتێ ژی وەھایە. ژ بەر کو دەولەت بابە. دەما مە دەولەتا خوە نەبە. دێ ھندەک ژ خەلکێ بێ دەولەت بنە ئۆلپەرەست، هندەک دێ بنە سۆسیالیست، هندەک دێ بنە دەمۆکرات، هندەک دێ بنە لیبەرال و هتد… ھەمی دێ نە ژ بۆنا خوە، بەلکو ژ بۆ خەلکی بنە ئەو.
ئەو کەس، پارتی و کەسایەتیێن بکەڤن خزمەتا دژمنێ گەلێ خوە ژی، دێ دەم هێت کو ل شوونا ل سەر ئاریشەیێن گەلێ خوە باخڤن و موناقەشێ بکن، دێ ژ بۆنا خورتکرنا داگیرکەرێن خوە بنە خزمەتکارێن وان.
بێ دەولەتی، تە ژ ھەڤ پەرچە دکە. ناھێلە برا ل گەل برا ببە یەک. لەورا ژی دێ تم ناکۆکی، فەسادی و مەلاقی د ناڤا وی خەلکێ بێ دەولەت دە ھەبە دا کو نکاربن دەولەتا خوە ئاڤا بکن. ئەم کورد ژی نھا د ڤێ قۆناغێ دە نە.
ب پەرچەبوونا وەلاتێ مە، ئەم ژی ھاتنە پەرچەکرن. وەھا پەرچە کرنە کو گەلەک ژ مە، ئێدی وەلاتێ خوە و خوە ناس ناکن کو ئەو کوردن و وەلاتێ وی/ێ کوردستانە. ژ بەر کو ئێدی مەژی ل گۆری پەروەردەھیا داگیرکەران شکل گرتیە و دگرین.
ب ڤێ پەرچەبوونێ، مێرخاسێن کورد یێن بوونە ئۆلدار، سۆسیالیست ئانگۆ دبن ئایدۆلۆژیک، د بەر ئایدۆلۆژیان دە ھەر تشتی، کار و خەبات کرنە و دکن. لێ مخابن وەلاتێ خوە ژ بیر دکن. چ قازانج ب دەست خستبن یان دخن، نە ژ بۆنا گەلێ خوە، د بەر ئایدەۆلۆژیان دە پووچ دکن و کرنە. میناکا ڤێ یا ڤەکری ئەوە کو دەما ئەم ل تەڤگەرێن باکورێ کوردستانێ یێن سالێن 1970 ھەتا 1980 بنێرن ڤێ ب زەلالی دبینن.
دەما ئەم، ل نەتەوەیێن کو بوونە دەولەت دنێرین، دبینین کو ھەمیان کار و خەبات کرنە دا کو دەستپێکێ ببن دەولەت. دوورە ژی خەلکێ وان ھەر یەکێ فکرا خوە یان ئایدۆلۆژیا خوە پاراستنە. بپارێزن مافێ وانە. لۆما دڤێت دەولەت پر رەنگی بە دا کو بکاربە کەسێن خوە ل گەل ھەمی رەنگێن، وان ھەمبێز بکە.
دەما کو ئەم ل تەڤگەرا بارزانیان دنێرن ژ دەستپێکێ ھەتا نھا ئەم ڤی رەنگی و ڤێ دەولەمەندیا کو دخوازن دەولەتەکا کوردی ئاڤا بکە، دبینن. ژ بەر کو وان ئاڤاکرنا دەولەتەکا کوردی ژ بۆی خوە کربوو خالەکا ڤێ رێبازا پیرۆز. ھەبوونا دەولەتا کوردی یا ئیرۆ کو ل باشوورێ کوردستانێ ھەیە، ژ بەر ڤێ تێ.
ژ بەر کو بارزانیان باش دزانیبوون کو بێ دەولەتی مرنە، ژار و ستوخارییە. بێ دەولەتی تە ل سەر ئەردێ تە ژ بۆنا داگیرکەران دکە کۆلە و رێنجبەر. ژ بەر کو وان باش زانیبوون کو دەما دەولەتا تە تونە بە، تو نە خوەدی چ ماف و حەقەکێیی. ژ بەر ڤێ بوو کو بارزانیان خالا دەولەتبوونێ ل رێبازا پیرۆز زێدە کرن. زێدەکرن دا کو ھەمی تەکۆشین و بەرخوەدانێن کوردان ژ بۆنا دامەزراندنا دەولەتا وان بە.
لۆما بارزانیان دزانیبوون کو ملەتێ بێ دەولەت خوەدانێ خوە چ مافان نابیت. ھەبوونێن وان دێ ھەمی ژ بۆی داگیرکەران چیت. ب گۆتنەکا دن، کەسێن بێ دەولەت و ب تایبەتی کورد، ھەتا نەبن خوەدی دەولەتا خوە، دێ وەکە کورد نکاربن بژین. ب سەردە ژی دێ وەکە شۆرەشێن ل کۆچگرییێ، زیلان، ئاگری، دێرسمێ و گەلەکێن دن تێک چیت کو ئێدی کورد نەشێن خوە ل سەر لنگێن خوە بگرن. دەما دەولەتا تە تونە بە، ئەنفالێ دێ هێتە سەرێ تە، بۆمبەیێن کیمیایی دێ ب سەر ملەتی دە ببارن، وەکە حەلەبچە…
ژ رۆژا بارزانیان دەست ئاڤێتن تەکۆشینا ئازادی و سەرخوەبوونا کوردستانێ. وان خالا بێ دەولەتی وەکە خالەکا ژیانا کوردان بە، د رێبازێ دە ب جھ کرن. ئارمانجا وان ئەو بوو کو ھەمی بەرخوەدان و سەرھلدانێن کوردان، ببن سەدەما رێڤەکرنا ژ بۆنا ئاڤاکرنا دەولەتەکا کورد و کوردستانی.
دەما کو ئەم ئیرۆ بالا خوە ددن ھندەک تەڤگەرێن کوردان کو ژ خوە پتر، د خزمەتا داگیرکەرێن خوە دەنە، دبینین کو وێ ژی ل سەر ناڤێ ئۆل یان ئایدۆلۆژیان دکن. ژ بەر کو بێ دەولەتی تە دکەتە خەزمەتکارێ هندەکێن دن.
ژ بەر ڤێ گرینگیێ بوو کو بارزانیان ژ بۆنا دەولەتەکا کورد و کوردستانی ئەڤ سەد سالن تەکۆشینێ دکن. ب سایا وێ تەکۆشینێ ئەم ل باشوورێ کوردستانێ بوونە خوەدی دەولەتا خوە. لۆما ب ھەبوونا وێ دەولەتێ رەنگ و دەنگێ ملەتێ مە یێن ل سەر ئەردێ خوە دژین ژی ھاتە گوھەراندن. واتە بوونە وەکە خوە، کورد و کوردستانی.
کار و خەبات، سەرکەتن و پێشکەتن ھەمی ژ بۆنا خورتکرن و ب پێشڤەبرنا دەولەتا کوردی تێ کرن. ئێدی کورد ب سایا وێ دەولەتا خوە بوویە خوەدی شەخسیەت. د شەخسیەتا وێ دەولەتا فەدەرال دە، کورد بوونە خوەدی گەلەک خەلات و دیاریێن ناڤنەتەوەیی کو ل سەر ناڤێ کوردستانێ وەردگرن. ئالایێ خوە د پێشبرکیان دا بلند دکن.
ئاھا دەولەتبوون ئەڤەیە. دەولەت تە دکەتە تە، دا کو تو ژی خوەدی ل ھێژاییێن خوە دەرکەڤی. دەولەت ژ نوودە ژیان و روحێ ملەتبوونێ ددە تە دا کو تو ژی وەکە ملەت بژی.
ئیرۆ ل باشوورێ کوردستانێ نیڤ دەولەتەکا کوردان ھەیە. ب سایا تەکۆشین و بەرخوەدانا پێشمێرگەیێن قەھرەمان، رێ و رێبازا بارزانیێ نەمر، ل باشوورێ کوردستانێ دەولەتەک ب دەست کوردان کەتیە. ئەڤ دەولەتا نیڤ دەولەت خوەدیتیێ ل ھەمی کوردان دکە.
ل باشوورێ کوردستانێ بنێرن، ملەتێ کورد ل ڤر چاوا ب سایا دەولەتا خوە یا ب خوین و تەکۆشینەکا دوور و درێژ ھاتیە دامەزراندنێ، دژین. کورد چاوا ب ئازادی و ب ئارامی تێدە کێف و شاھیێ دکن. بنێرن و ببینن ل ور د بن سیا ئالایێ کوردی، ب ستران و ژیانەکا خوەش کو ڤێ رێبازێ دایێ کوردان، چەوا دژین.
ژ بۆنا کوردێن پارچێن دن ژی ب ئارامی، خوەشی و ب شاھی بێژن، دڤێت ڤێ رێبازێ فێر ببن دا کو بکاربن د تەکۆشین و بەرخوەدانێن خوە دە بسەربکەڤن.
ئیرۆ ڤێ رێبازا پیرۆز ب ھێز و قاوەتا خوەیا ھەیی، ھەمی کوردان ھەمبێز دکە و خوەدی ل وان دەردکەڤە. ل دیپلۆماسیا کو نھا ئەڤ رێباز دمەشینە بنێرن و ھوون دێ ھەمی راستیان تێدە ببینن. ژ بەر کو رێباز ھەبوون و خوەدی ل خوە دەرکەتاندنە…
