سمکۆ عەبدولعەزیزی

بەشا سێیەمین: كوشتنا ولاتپارێزێن کورد ژ ئالیێ پەکەکێ ڤە

د بەشا پێشین دە مه ‌گۆت هش ئارمانجێ دیار دكه‌ و ئارمانج رێیێ به‌رچاڤ دكه‌ و رێ ره‌فتارێ دیار دكه‌.

ده‌ما عەڤدللا ب ئاڤا ماركسیه‌تێ هاتیه ئاڤدان و ب سیستەما سۆسیالیستێ مەندەهۆش و داخبار بووى، ئه‌ڤ سیسته‌م کر به‌رێ بنیاتێ یێ ئاڤاکرنا پارتیا كاركه‌ران و كادرۆێن ڤێ پارتیێ بوونه‌ كاركه‌رێن ئه‌نجامدانا ڤێ رێبازێ و هزر و كه‌دا كرێكاران خسته‌ سه‌ر هزر و كه‌دا جۆتکاران، واته‌ كارگه‌هـ گرنگتره‌ ژ ئاخێ، مرۆڤێ كاركه‌ر ب كارگه‌هێ ڤه‌ دهێته‌ گرێدان و مرۆڤێ جۆتکار ب ئاخێ ڤه‌ دهێته‌ گرێدان.

ده‌ما عەڤدللا لێکۆلین لسه‌ر جڤاكا كوردى كرى ب هه‌موو روویێن خوە ڤه‌ (دیرۆكى، جڤاكى، چاندى، ئابۆرى)، گهشت وێ بریارێ كو پێدڤیه‌ به‌رى هه‌ر كاره‌كێ ئه‌و و پارتیا وى ده‌ست ب شۆره‌شه‌كە ناڤخوەیى بكن‌ و د ڤێ شۆره‌شێ دە مرۆڤێ کورد ژ روویێ ئارمانجێ ڤه‌ بگوهەرە، ئانکو ژ ئارمانجا جۆتکاریێ به‌ر ب ئارمانجا كرێكارىێ ڤە ببه‌، یانژى دكارین ببێژین ژ ئارمانجا پاراستنا ئاخێ به‌ر ب ئارمانجا پاراستن و گه‌شهپێدانا كارگه‌هێ ڤە ببه‌، ژبۆی بجهئانیا ڤێ شۆره‌شێ پێدڤى ب دانینا به‌رنامه‌یەکێ بوو.

ئەڤ بوو کو پێش کو كۆنگرەیا خو ساز بکن به‌رنامه‌یه‌ك هات‌ رێكخستن، د ڤێ به‌رنامه‌یێ دە ب شێوه‌یه‌ك نهێنى كه‌تن‌ كاروچالاكیا ژ بۆ ئه‌نجامدانا ڤان کاران د ناڤا جڤاكا كوردی دە:

1. هه‌موو هێزا خوە بكارئانی کو ب ریێا سمینار و به‌لاڤۆكان ژ گەلێ کورد رە بدە قەبوولکرن كو شۆره‌شێن كوردى (شۆرشا شیخ سه‌عیدێ پیران، شوره‌شا سەیید رەزا، …. هتد) یێن کو پێش پەکەکێ هاتینه‌ ئه‌نجامدان شۆره‌شێن کەڤنەشۆپینە و رێبەرێن ڤان شۆرەشان کرێگرتییێن ده‌وله‌تێن كولنیالیزمن.

2. دانین و بجهئانینا به‌رنامه‌یەکە رێكخستى ژبۆی ژ هۆلێ راکرنا كه‌سێن خوەدی هزرێن نه‌ته‌وه‌ی کو د ناڤا جڤاكا كوردی دە بوونە جهێ رێز و تەقدیرێ.

3. دروستكرن و زێدەکرنا ناكۆكیان د ناڤا عه‌شیرێن كوردان دە و پڕ جاران پەکەکێ ناكۆكى دروستكرن و پالدانه‌ سه‌ر عه‌شیره‌ته‌كێ تاكو عه‌شیرا دن ل همبەر وێ عه‌شیرێ راوه‌ستە، پەکەکێ ناکۆکیێن د نێڤبەرا عه‌شیرێن د ئەساس دە ناكۆكى لگەل هەڤ دو دە هەیی زێدەتر دکرن، ئارمانج ژڤان کاران ئه‌ڤ بوو كو جڤاكا كوردى ژ یه‌كگرتنی به‌ر ب ژێكڤه‌كرنێ ببن و ئه‌و ببن هێزه‌ك سه‌ره‌كە دجڤاكا كوردی دە و كۆنترۆلا هه‌موو جڤاكێ بکن، ژ بەر کو تێگه‌هه‌ك ماركسی هه‌یه‌ دبێژه،‌ رێكخستن هه‌رتم دكارن لسه‌ر تەڤلیهەڤیان سه‌رده‌ست ببن.

4. پشتى کو شۆره‌شین كوردى ل باكورێ كوردستانێ راستی شكه‌ستنێ هاتین، هەژمارەک ره‌وشه‌نبیر و كوردپه‌روه‌رێن كوردان چه‌ندین پارتێن سیاسی یێن نه‌ته‌وى دامەزراندبوون و ئارمانجا وان رزگارکرنا مرۆڤێ كورد و ئاخا كوردستانێ بوون، عەڤدللا و پارتیا وى به‌رنامه‌ دانا ژ بۆی ژناڤبرنا ڤان پارتیان ب رێیا كوشتنا رێڤەبەرێن وان پارتیان، و ب ڤی ئاوا ئەو پارتییێن كوردى ته‌رابه‌را كرن و هەژمارەکە مه‌زن یا وان ره‌وشه‌نبیر و وەلاتپاریزان كوشتن.

5. چه‌ندین شه‌رێن ناڤخوەیى ل دژی وان کوردێن وەکە وان نەفکرن ئەنجامدان، ب تایبەتی ل دژی پارتییێن سیاسی یێن نه‌ته‌وى .

6. ده‌ما کۆدەتایا سالا 1980 ل ترکیێ هاتیە ئەنجامدایین، هەژمارەکە زێدە یا كوردان ژی هاتن‌ دەستەسەرکرن و كه‌تنە‌ د زیندانان دە، د ڤان زیندانان دە دو جورەیێن زیندانیین كورد په‌یدابوون، جوره‌ك ژێ بوونه‌ ئێعتێرافچی و جورێ دن ژی بوونه‌ به‌رخوەدێر.

عەڤدللا و پارتیا خوە ل همبەر ڤان زیندانیان ب ڤی ئاوا تەڤ گەریان:

– ژیاننامه‌ و به‌رخودانا کەسێن ل بەر خوە دایی كر مادەیێن پروپاگندایێ ژ بۆی مەزنکرنا پارتیا خوە.

– زیندانیێن ئێعتێرافچی پشتى د زیندانێ دە ده‌ركه‌تین ژ ئالیێ عەڤدللا ئۆجالان ڤە هاتن خەلات کرن و بەرپرساتیێن بلند د ناڤا پەکەکێ دە ب وان دان.

– دەما زیندانییێن به‌رخوەدێر ژ زیندانێ ده‌ركه‌تین، عەڤدللا و پارتیا وى ئه‌و شۆره‌شگێر ب خائین و ئێعتێرافچی دانه‌ ناساندن، د ئه‌نجاما ڤێ یەکێ دە هەژمارەکا هه‌ری ‌زۆر یا ڤان لەهەنگان ل دۆلا بیقاع و لۆلانێ ژ ئالیێ پەکەکێ و ب تەعلیماتێن راستەراست یێن عەڤدللا هاتن کوشتن و یێن مایی ژى ژ ترسا هەمان چارەنڤیسێ هەیانی نها نکارن ب ئازادى هاتن و چوونێ بکن و وەکە مرۆڤێن نۆرمال دەبارا ژیانا خوە بکن.