سمکۆ عەبدولعەزیزی

وەکهەڤیێن پڕ زێدە د نێڤبەرا دەستهلاتا ترکیێ یا کو ژ ئالیێ ئاکەپێ ڤە تێ برێڤەبرن و دەستهلاتا رۆژئاڤا کوردستانێ کو ژ ئالیێ پەیەدێ-پەکەکێ ڤە تێ برێڤە برن هەنە، ئاکەپێ ب پارتیەکە گرێدایی پرەنسیبێن ئیسلامی خوە دایە ناساندن، پەیەدە-پەکەکە ژی کار ب مەتۆدا سۆسیالیزمێ دکن.

 گەر مرۆڤ ب ئاوایەکی بێ ئالی ل هەر دو پارتیان بنێرە، وێ مێزە بکی کار و کریارێن وان ل همبەر پارتی و کەسێن وەکە وان نەفکرن پڕ دشبهن هەڤ، تەڤی کو هەر دو ئالی بانگەشەیا دەمۆکراسیێ دکن ژی، لێ ب پراتیکی هەردویان باهوەری ب دەمۆکراسیەتێ تونەیە، بەلکو هەردویان باوەری ب پەرگالا تەک پارتیێ و دکتاتۆریەتێ هەنە ژ بۆی برێڤەبرنا دەستهلاتێ، میناکێن کو تێ دە دیار دبن ئەڤ پارتی پڕ دشبهن هەڤ پڕ زێدەنە، ئەزێ ل ڤر باسی هن ژ وان میناکان بکم:

1- ئاکپارتیێ باهوەری ب یەکپارچەبوونا ترکیێ هەیە، پەیەدێ-پەکەکێ ژی باهوەری ب یەکپارچەبوونا سووریێ هەیە.

2- هەر دو پارتیان باهوەری ب وێ یەکێ هەیە کو ت پرسگرێکەک ب ناڤێ پرسگرێکا کوردان تونەیە.

3- ئاکەپە دبێژە ئەم خەباتێ ژ بۆنا بهێزکرنا دەمۆکراسیا کۆمارا ترکیێ دکن، و پەیەدە-پەکەکە ژی ل رۆژئاڤا دبێژە ئەم ژ بۆنا دەمۆکراتکرنا سووریەیێ دخەبتن، یا دبە جیهێ پێکەنۆکێ ئەڤ کو هەردویان ژی باهوەری ب دەمۆکراسیێ تونەیە.

4- هەردو پارتی رۆژانە کەس و پارتیێن وەکە وان نەفکرن و وەکە وان تەڤ نەگرن قەپات و دەستەسەر  دکن، ل ترکیێ زندان ژ چالاکڤان و سیاسیێن کورد تژە بوونە، ل رۆژئاڤا ژی زندانێن پەیەدێ ژ چالاکڤان و سیاسیێن کورد یێن ولاتپارێز تژی بوونە، تەڤ ژی ئەون یێن کو وەکە وان نەفکرن.

5- بارەگەهێن پارتیێن موخالف ل هەر دو جهان تێن بەربارانکرن و شەوتاندن، د 23-24/4/2024ان دە نڤێسینگەهێن پەدەکەسێ ل رۆژئاڤا هاتن شەوتاندن و کاڤلکرن، ئەڤ نە جارا یەکەمین بوو کو پەیەدێ-پەکەکێ ئەڤ یەک ئەنجامدایی، پێش نها ژی چەندین جاران کارێن ب ڤی ئاوا یەنجام داینە، هەر کەس دزانە ئەڤ کار ژ ئالیێ پەکەکێ ڤە تێن ئەنجامدایین لێ بەلێ رێڤەبەریا خوەسەر دبێژە ئەم نزانن کی ب ڤان کاران رادبە، د رۆژێن 7-8/5/2024ان دە ئێریشێن چەکداری ل دژی ئاڤاھیا دەم پارتیێ یا ل ناڤچەیا بێرەجووکێ یا رحایا باکورێ کوردستانێ پێک هاتن، هەر ب هەمان ئاوا ل ڤڕ ژی ئاکەپە ب ڤان کارێن دوور ژ دەمۆکراسیێ رادبە، لێ دەستهلاتا ترکیێ دبێژە ئەم نزانن کی ب ڤان ئێرشان رادبە.

6- ئالا کوردستانێ د بن سێبەرا هەر دو دەستهلاتان دە قەدەغەیە و هەر کەسەکی ئالا رەنگین بلند بکە وێ ب توندی وەرە سزادان.

 یێن مە ل ژۆر باس کرین هن میناکێن پڕ هندکن ژ وان میناکێن هەڤبەش یێن د نێڤبەرا ڤان دو ئالیان دە هەیی، د راستیێ دە ئەڤ دو پارتی ب ئاوایەکی دشبهن هەڤ کو مرۆڤ دکارە ب رەحەتی ببێژە، “ئەڤ دو پارتی روحەکن د دو جەستەیان دە”.