گەلەک جارا دەربارێ سیاسەتێ دە و ھندەک بوویەرێن جڤاکی دە روویدان ھەنە کو، مرۆڤ بەحسێ وان ناکە. بەحسنەکرن نە کو ژ خەمساریەکێ یە، بەلکی ژی ل گۆرا قۆناغا کو تێ ژیاندن ھەلوەستەکە. گەلەک جارا د جڤاتا مە دە بێدەنگی ب خوە ژی وەک ھەلوەستەکی تێ نرخاندن.
پرس و بوویەرێن د دەربارێ کۆبانێ دە روو دایین ژی، ژ بوویەرەکا ب ڤی ئاوایی یە. راستی ھەلوەستا پەکەکێ و نرخاندن و شرۆڤەیێن پەکەکێ و ئالیگرێن وان بوون سەدەمەک کو کۆبانێ ژ راستیا کو ھاتی ژیاندن دوور خستن و جاردن ژ خوەرە کرن ئارمانجەکا پرۆپاگاندەیێ.
ھەرکەسەک دزانە کو د ئازادکرنا کۆبانێ دە رۆلێ پێشمەرگەیێن کوردستانێ گەلەک بوو. ھەروەھا ڤێ یەکێ ھێڤیا ژ بۆ دەستپێکرنەکا نووژەن و ھەڤکاریا ناڤبەرا رێخستنان دە ژی خۆرت کر. ھەتا رادەیەکی رێدانا ترکیێ ژ بۆ دەرباسبوونا پێشمەرگەیێن کوردستانێ و ل باکور پێشوازیا خەلکێ باکورێ کوردستانێ یا ل پێشمەرگەیان بوویەرەک ئەرێنی و دیرۆکی بوو.
لێ پەکەکە ژ ڤێ ئاوەیا پێشوازیکرنێ ترسیا و دەست ب پرۆپاگانەدا و دەرەوان کر.
ل باکورێ کوردستانێ، نیک دلەکێ ژ بۆ کۆبانێ بەرپرسێن پەکەکێ بانگا خوەپێشاندانا کرن، د ھەمان دەمی دە ھەدەپێ ژی بانگا خوەپێشاندانا کر و 6-8 جۆتمەھا 2014 ل گەلەک باژارێن باکورێ کوردستانێ ئالیگرێن پەکەکێ د ھەمان دەمی دە ئەندامێن ھەدەپێ داکەتن کۆلانا. یا ھاتیە کرن نە خوەپێشاندانێن نۆرمال بوون، د خوەپێشاندەران ئێریشێ گەلەک جھان کرن، دبستان، نەخوەشخانە، کتابخانە و گەلەک دوکان و جھێن کارێ خەلکێ شەوتاندن. مەسەلە نە مەسەلا کۆبانێ بو، کۆبانێ تەنێ کرن ھێجەت.
رۆژا 6 جۆتمەھێ ئەندامێ کۆنسەیا رێڤەبرا پەکەکێ موراد کارایلان داخویانیەک دا ئاژانسا پەکەکێ یا ب ناڤێ ANF و گۆت: دەما سەرۆکێ پەیەدێ سالح مووسلم سەردانا ئەنقەرە کری، ترکیێ سۆزا ڤەکرنا کۆریدۆرەکی ژ بۆ کۆبانێ دابوو لێ ئەڤ سۆزا خوە ب جھ نەئانی.
د ئەنجاما خوەپاشاندانێن 6-8ێ جۆتمەھێ دە، 35 کەسان ژیانا خوە ژ دەست دا، 435 سڤیل و 326 پۆلس برینداربوون. ب سەدان جھ و ئاڤاھی ھاتن شەوتاندن. ژ بۆ ڤان کریاران گەلەک ئەندامێن ھەدەپێ ھاتن بنچاڤکرن .
ھەر ب ڤێ مەبەستێ ژی ھەڤسەرۆکێن ھەدەپێ ھاتن گرتن و دادگەهکرن.
دادگەھێ د دەربارێ گرتیان دە پشتی 10 سالان بریار دا و د سەری دە دەمیرتاش و یوکسەکداغ ب سزایێن گران ھاتن سزادان. دەمیرتاش 42 سالان و یوکسەکداغ 30 سالان سزا وەرگرتن. ھندەک کەسایەتیێن دن ژی ھاتن سزادان و ھندەک ژی، ژ ڤێ دۆزێ ھاتن ئازادکرن. هێژان رێیا نەرازیبوونێ ژ بۆ دادگەھێن بلند ھەنە و دکارە ئەنجامێن دن ژی دەرکەڤن ھۆلێ.
نرخاندنا ڤێ بوویەرێ ب ئاوایەکێ ھەسانە، ئەگەر مرۆڤ راستیا روو دایی و ئەنجامێن وێ بێژە. لێ مخابن پرۆپاگاندەیا مەدیا پەکەکێ و چەپێن ترکان باندۆرا خوە د ڤێ دەربارێ دە ل ھەموو مەدیا کوردی ژی کر.
ئەڤ بوویەر و بریارا دادگەھان سیاسی یە. ئەڤ یەک نایێ مناقەشەکرن. لێ گەلۆ کی و چەوا رێ دان ڤان بوویەران؟ ژ بۆ چ نایێ نرخاندن؟
ھەتا کو تەرۆرا فکری یا پەکەکێ بەردەوام بە نە کورد دکارن دژمنێن خوە باش ناسبکن و نە ژی گرێدانا دەزگەھێن دەولەتا کوور و پەکەکێ دبینن.
مەسەلەیەک ھەیە کو دبێژن: جارەکی ھندەک دز کەتن مالا بەھلوول و مالا وی ڤالاکرن و ھەموو تشتێن وی دزین. رۆژا دن جیرانێ وی کۆم بوون، ھندەکا گۆت چما تە دەری ئاسێ نەکربوو، ھندەکا گۆت ما تە قوفل ڤەکری ھشتیبوون؟ ئاخر ھەر یەکی تشتەک گۆت تاوانێ دزان ژی ب ئاوایەکی کرن ستوویێ بەھلوول دە. داویێ دە بەھلوول گۆت: ئەرێ باشە خەلەتیا من چبوویە، لێ گەلۆ قەت سوچا دزا تونەیە؟
رۆژەڤاکورد
